अन्तरिम आदेश वइगु खः ला ?

लक्की शेर्पा । अस्टे«लियाया निंतिं नेपाःया राजदूत । विवादय् लाइ । पदं राजीनामा बी । थन । लक्की शेर्पाया विवादया विषयय् चर्चा यायेत्यनागु मखु । लक्की शेर्पाया टि.भी. अन्तर्वार्ता स्वयागु । वयागु विवादया बारे अनेक न्ह्यसः लिसः जुइ । तर टि.भी. अन्तर्वार्ताया छगू दृश्यं जितः तसकं थी । व स्मरणीय जुइ । लक्की शेर्पायात अन्तर्वार्ताकारं न्यनी ‘छि थौंकन्हय् थज्याःगु विवादय् ।

छितः न्ह्यः वःला ?’ लक्कीं आत्मविश्वासपूर्वक लिसः बी, ‘वः, एकदम वः, जिगु न्ह्यःयात विवादं थिउगु मदु । थी फइ नं मखु ।’ लिसः न्यने । अजू चाये । थज्याःगु गम्भिर विवादय् लानाच्वन । थःगु प्रतिरक्षा लक्की शेर्पां अनेकतर्क बियाः यानाच्वनी । अय्नं । न्यनीम्हेसिनं ‘फय् मसंकं सिमा हः सनीला ?’ पिहां वःगु आरोप, शंकापाखे नुगः सालनाच्वनी ।

ख नं खः । गम्भिर आरोपत दु । पिने छताछुल्ल जुइधुंकल । खः, मखुया खँ छखे तयेगु खःसां विवाद ला तीव्र जुइधुंकल । लक्की शेर्पां गथे नुगः तयाच्वन जुइ ? चां चां न्ह्यः मवये माःगु खः वया । तर वं अन्तर्वार्ताय् गर्व साथ धाइ, ‘जितः मज्जां न्ह्यः वः ।’ छे ! मनूत धइपिं नं गुलि ह्यामि जुइयः खनी । विशेष यानाः राजनीतिइ सना जुइपिं ।

सनाच्वंपिं ! मती वइ । तर । जब लक्की शेर्पां राजदूत पदं राजीनामा बी माःसां थःगु न्ह्यः विचलित मजूगु कारण कनी । तसकं मार्मिक धंगं । जि नं पलख भावुक जुइ । तिक्क मिनी । लक्की शेर्पां धाल । ‘खः, जि राजदूत जुल । जि अस्टे«लिया वने । व सुखद अवसर खः जिगु निंतिं । तर जि छेँ त्वःताः वने । जिलिसे विदेशय् छगू पीडाबोध, अत्यन्त घाः नं घाना वइ ।

जि मांअबुलिसे बाया वनेमाःगु पीडा जिगु निंतिं घाः जुया बी । गुकिं जिगु थःगु राजदूत कार्यकालय् नं गन गन जिगु नुगलय् जितः मचायेकं दुःख बियाच्वनी । आः । राजीनामा याना । जि कार्यभारं जक मुक्त जुयागु मखु । जि मांअबुलिसेया विदेशया पीडां नं मुक्त जुया । मुक्त जुइखन । जि थौं मांअबुया मुलय् लिहां वयाच्वना । तःधंगु सुख पुनरावृत्तिया अनुभूति जुइ ।

लक्की शेर्पां थःगु मिखां धरधर ख्वबि हायेकाः अन्तर्वार्ताय् लिसः बिउगु लु । तसकं हे मार्मिक । हृदयस्पर्शी । खः । व दृश्य स्वयाः गुलिसिनं धायेफु । कि थ्व राजनीतिज्ञ, कुटनीतिज्ञ धइपिं तसकं धूर्त जुइ । चलाख जुइ । नाटक यायेगुलिइ तसकं प्रवीण जुइ ।

गर्व जुइ । मांअबुया स्नेहलिसे जि थौंकन्हय् प्रत्यक्ष । जितः न्ह्यः वः । स्याक्क न्ह्यः वः । लक्की शेर्पां थःगु मिखां धरधर ख्वबि हायेकाः अन्तर्वार्ताय् लिसः बिउगु लु । तसकं हे मार्मिक । हृदयस्पर्शी । खः । व दृश्य स्वयाः गुलिसिनं धायेफु । कि थ्व राजनीतिज्ञ, कुटनीतिज्ञ धइपिं तसकं धूर्त जुइ । चलाख जुइ । नाटक यायेगुलिइ तसकं प्रवीण जुइ ।

लक्की शेर्पाया ख्वबि नं लोक आकर्षित यायेगु नाटक खंकीपिं दइ । व नाटक खः, मखु । जिं निर्णय यायेगु मस्वया । कपाः मस्याका । तर तर्क याये । लक्की शेर्पाया व ख्वबि, मांअबुप्रतिया वया भावनात्मक अभिव्यक्ति नाटक हे जक खःसां । व तसकं हे स्वाभाविक । तसकं हे दुरुस्त । सफल अभिनय !

लक्की शेर्पा थः मांअबुया सन्दर्भय् हायेकूगु ख्वबिया दृश्य खनी । जितः थःगु हे विगतया छगू घटना लुमनी । अथे हे । ख्वबि हाःगुया मार्मिक घटना । चिरस्मरणीय घटना । अबलय् जि एस.एल.सी ब्वनाच्वनागु । एस.एल.सी. पाठ््य क्रमय् अबलय् अंग्रेजी विषयय् अंग्रेजी साहित्यया नांजाःपिं कवितय् कविता ब्वनेमाः । शेक्सपियर, बर्ड स्वर्थ, शेली इत्यादि ।

जितः छेँय् अंग्रेजी साहित्य जिमि ब्वां ब्वंकीगु । कवि काउपरया ‘कास्ट आवय्’ नांया कविता नं पाठ््य क्रमय् दुगु । बाः नं ब्वंकी । व कविता ब्वंकुंब्वंकुं जिमि बाः नं कवि काउपरया मेगु वं ‘मांया किपा’ स्वयाः च्वःगु कविता नं न्ह्यथना हइ । बाःयाके अबलय् चलन कथं यक्व कविपिन कवितात कण्ठ वः । काउपरं मांयात कयाः च्वयातःगु कविता नं कण्ठ वः खनी ।

ब्वना हइ । ब्वँब्वं बाः ख्वया हइ । धुरुधुरुं ख्वया हइ । जि व जिमि तता मस्त हे तिनि । ब्वना च्वनापिं । बाः ख्वःगु खनाः छु याये, छु याये जुइ ! बाः नं थः मां लुमंगु खँ धाइ । गुलिखे दँ न्ह्यः मदयेधुंकूम्ह मां । बाःयात कवितां लुमंका बी । मचा थें ख्वइ । जिमिसं अबलय् मांअबु मदइगु, विछोडया पीडा मथूनि । अय्नं बाःया ख्वबि खनी । गम्भिर जुइ ।

लक्की शेर्पां थः मांअबुया प्रसंगय् गुगु ख्वबि हायेकल । उकिं बाः नं अबलय् हायेकूगु ख्वबि जिगु न्ह्यःने लुइ । मां–बाः मंत । जि नं ख्वया । जिं नं ख्वबि हायेका । जि छपु कविता च्वया । झीगु वंशवृझ धइगु हे स्वयं ख्वबिया श्रृंखला खः । ख्वबिया …. क्रमशः ।थौंकन्हय् देशं यक्व मनूत पिहां वनेधुंकल । गां गां हे खालि । विशेष यानाः ल्याय्म्हत विदेशय् ।

छेँय्छेँय् ला बुराबरि व मिसा मचात । संयुक्त परिवार विघटन जुइ । कायपिं विदेशय् । छेँय् ला ल्यंपुल्यं जक । ज्याथजिथिपिं मांअबु । खतुं विदेशं कायंपिसं ध्यबा छ्वया हइ । तर । विछोडया पीडा ध्यबां तंकी मखु । लक्की शेर्पां राजदूत पद स्वयां थः मांअबुलिसेया विछोडया मुक्ति थःगु निंतिं सुखया विषय खंकी । थ्व उक्तिइ तःधंगु मनोवैज्ञानिक सत्यता दइ ।

तर थौं छेँय्छेँय् यक्व ज्याथजिथिपिं मांअबुपिं मनोवैज्ञानिक रिक्ततां पीडित । निसहाय । कायम्ह्याय् नापं तये । च्वँ धाये । व नं सम्भव मजू । देय्या हालत नं थ्व हे खः । धाइ । विदेशं रेमिट्यानस वइ । देय्या आर्थिक भार रेमिट्यान्सं वहन यानाच्वंगु दु । तर युवावर्गया विदेश गमनं देशं फयेमाःगु सामाजिक, मनोवैज्ञानिक, भयावह समस्या विकराल, झंझं तीव्र जुइ ।

ज्याथजिथि जुइधुंकूपिं मांअबुया सामाजिक सुरक्षाया निंतिं सरकारं न्हूगु कानून दयेकेत्यंगु दु । मांअबुपिंत मस्तय्सं थःगु तलबया छुं प्रतिशत बी माः । न्यने । कानून वयेत्यंगु दु हँ ! ध्यबा माः खः । तर मांअबु–माचाखाचाया स्वापू ध्यबां जक जुइमखु । थ्वया थःगु हे आत्मीयताया पक्ष नं दइ । कानूनी विषय जक मजुसे नैसर्गिक पक्ष नं दइ थ्वया ।

छगू न्हूगु बुखँ ब्वने । छम्ह कायमचां ‘थःत छाय् बुइका, कायया इच्छा, स्वीकृति मदयेक’ धकाः मांअबुया विरोधय् अदालतय् नालिश तःगु दु हँ ! अदालतं छु पैmसला बीगु खः, ग्व ! तर अन्तिम निर्णय मजूतले सुनानं मचा बुइके मते । दइमखु धकाः अदालतं प्रजनन क्रियायात हे रोक्का याइगु खःला । अन्तरिम आदेश वइगु खःला ? युवा पलायन अन्त यायेगु आखिरी विधि थ्व हे जक जुइला ! ?