लुम्बिनी क्यबय् हाकनं त्रिपिटकया सः – २

थपाय्जि तःधंगु ज्या यानाः नं मगाःमचाः धइगु दयाच्वनीगु स्वभाविक खः । थन छुं छुं खँ कुलेत स्वयागुया उद्देश्य आकिवं जुइगु थज्याःगु ज्याझ्वः अझ भव्य जुइमा धइगु मनंतुना हे जक खः । आयोजक संस्थाया धिसिलाःगु थां धइगु हे अखिल नेपाल भिक्षु महासंघ खः । नेपालय् जूगु थज्याःगु ज्याझ्वः थेरवादी बौद्धपिनिगु प्रमुखताय् जुइमाःगु व ज्याझ्वलय् महासंघया पदाधिकारीपिं हे सकलें मथ्यनेगुयात अन ब्वति काःवःपिंसं तसकं अर्थपूर्ण कथं काल ।

कथिन नं सिधयेधुंकल, मेगु अज्याःगु येँय् छुं ज्याझ्वः नं मदु, अथेसां थज्याःगु पुण्यया ज्याय् हे सहभागिता क्यने मफुगु महासंघं आः नेपाः थेंज्याःगु बुद्धधर्मयात खनेदयेक वा मदयेक क्वत्यलातःगु देसय् थःगु पहिचान वा धार्मिक समानाधिकारया लागि गुकथं ल्वाइ धइगु न्ह्यसःचिं नं थुकिं थंगु दु ।

लसताया खँ खः कि थन थीथी देसं द्वलंद्वः धयाथें सहभागी जुल । भिक्षु, भिक्षुणी, लामा, आनीपिं नेपाः लगायत थीथी देसं वःपिं खनेदत । दकलय् सकलय् सःसिउपिं अले पाठया नेतृत्व याइपिं धकाः सकसिनं हनबना तःगु खः । तर वसपोलपिं हे स्वन्हु तक धिसिलाक्क थःथःगु थासय् च्वनाः थःगु पालय् वाचन यायेगु व मेपिनिगु पालय् एकचित्तं श्रवण यायेगु मयाःगु खनेदुबलय् उपासक उपासिकापिं उसिंचाइगु स्वाभाविक खः ।

आःया सन्दर्भय् चीबर पुनातःपिंसं धर्मसंघया नेतृत्व कायेगु जक मखु आदर्श जुयाः हे न्ह्यःने च्वनाः समाजयात लँ क्यनेमाःगु अवस्था दु । भन्तेपिं गुरुमांपिं थःगु पाःसिधयेवं दनावनेगु चलन वःबलय् समारोहस्थल खाली खाली खनेदइगु हे जुल । उकिसनं विदेशं वःपिं नं गुलिं गुलिं ला थातं च्वं तर यक्व धयाथें थःगु पालय् जक वयाः ब्वनेगु अले लिपा वनेगु यायेवं थथे हे यानातःगु खः ला वा आयोजकया कमजोरी धकाः थुइके थाकुल ।

लाओसया भन्तेपिं खनेमदइगु, भियतनामया भन्तेपिंसं थःगु पालय् मब्वनेगु अले कोरियां छम्ह जक भन्तेया उपस्थित जुइगु धइगु बांलाःगु खँ जुइ फइमखु । अनंलि उपासक उपासिकापिनिगु खँ । धायेम्वाः, लुम्बिनी बुद्ध जन्म जूगु जूसां आःया अवस्थाय् अन स्थानीयवासी बौद्ध मदु, वंगु सछिदँया अभियानं नं अन स्थानीयवासीयात धाथें श्रद्धादुपिं बौद्ध दयेके मफयाच्वंगु दु ।

थज्याःगु अवस्थाय् लुम्बिनीइ गुगुं नं ज्याझ्वः जुइ उकियात सफल यायेत स्वनिगः व मेमेगु नेवाः लागाया नेवाःत व हिमाली प्रदेशया जनजातिपिंसं हे छ्यं ग्वः खाकेगु अले उकियात भव्य यायेगु खः । थुगने स्वयां थुगुसी स्वनिगःया नेवाःतय्गु सहभागिता म्हो जुल धइगु खँ नं अन बय्बय् जुल ।

न्यनेदुकथं अन वनेगु आयोजना याःपिंसं नं थगुने स्वयां थुगुसी तसकं यक्व ध्यबा म्हःगु खनेदत । ध्यबा कमे यायेगु स्वयां म्हो खर्चं थज्याःगु पुण्य ज्याझ्वलय् गुलि फु उलि यक्व मनू थ्यंकेकथं मुंकूसा दक्वं लय्ताये खनीगु खँय् शंका मदु । अन वयेगु धइगु त्रिपिटक पाठ यायेत खः ।

अथे खःसा थम्हं हे कण्ठ यानाः दक्व पाठ यायेसःपिं मदुगु अवस्थाय् अन पाठ जुइगु दक्व गाथाया सकसिनं ब्वने जीक सफूया व्यवस्था मजूगु धइगु नं मेगु कमजोरीया रुपय् कायेमाः । ल्हातिइ ब्वनेत सफू मदयेवं सकसिनं छसलं पाठ याये मखनेवं दक्व उसिं चाइगु, थःथवय् कालकुल खँ ल्हायेगु वा असभ्य तरिकां फ्यतुनाबीगु वा स्थल हे त्वःताः वंसां अजू चायेमाःगु खँ मंत ।

स्वन्हुतक छु छु गबलय् पाठ यायेगु व दक्व गाथा दुगु सफूया व्यवस्था जूगु जूसा अन स्वन्हु च्वनाया अर्थ नं पिहां वइगु खइ ।खतुं त्रिपिटक धइगु पवित्र बुद्ध वचन धायेवं उकियात पाठ हे मयाःसां न्यनाजक च्वंसां पुण्यलाभ जुइ । तर थज्याःगु खँ कनेगु, थःथःगु विहारय् वइपिं उपासक उपासिकापिंत त्रिरत्न वन्दना व परित्राण दुने लाःगु गाथा पाठ याकेगु स्वयां मेगु स्यनेगु यानातःगु मदु जुइमाः ।

अथे मेमेगु गाथा पाठ स्यना मतःगुलिं हे झी उपासक उपासिकापिं थ्व पुण्यपाखें बञ्चित जुल । अले झीगु थेरवाद बुद्धशासन पुनरुत्थान जूगु चय्दँ दयेधुंकूसां झी उपासक उपासिकापिंके अज्याःगु तालिम वा शिक्षणया अभाव जुयाच्वंगुलिं थज्याःगु ज्याय् इपिं सहभागी जूसां संयमित व अनुशासित जुयाः च्वनेमफुगु खनेदत ।

द्यां लानाः सुं नं च्वने फइमखु । भन्ते गुरुमांपिंत थाइ व चिनिया विहारय् व उपासक उपासिकापिंत गौतमी विहारय् नयेगु व्यवस्था यानातःगु अतिकं बांलाः। अथे हे स्वयंसेवकपिनिगु ज्या नं च्वछायेबहजू । लिक्कसं खाली थाय् दयेक दयेकं नं तापाक नयेगु व्यवस्था यानातःबलय् वये वनेत थाकुगु जक मखु, श्रद्धा मगाःपिं अनं लिहां मवयेगु तकं स्वःगु खनेदत ।

मधासे मगाःगु खँ थ्व नं दु कि द्वलंद्वः स्वदेशी व विदेशीयात पाहांकथं ब्वनातःथाय् चःबि छगू हे गतिलाःगु व्यवस्था मदुबलय अन वःपिनि बेहाल स्वये लायक जुल । थपाय्धंगु लुम्बिनी उद्यानय् न्हियान्हिथं वइपिं द्वलंद्वः तीर्थयात्री व पर्यटकतय्त व हे प्यम्ह, च्याम्ह तक वनेजउिगु तसकं स्यंगु, नवःगु अले घचायापुसे च्वंगु चःबि हे जक दयाच्वनेगु धइगु आयोजक लुम्बिनी विकास कोषया लागि लज्जाया विषय खः ।

आयोजकयापाखें लुम्बिनी विकास कोषया कार्यकारिणी समितिया दुजः राजेश ज्ञवालीं आयोजना व्यवस्थापनय् छुं कमजोरी दुगु स्वीकार यासें आकिवं थुकियात सुधार यायेगु बचं धाःसा बियादीगु दु । आकिवं नं थ्व हे इलय् लुम्बिनीइ स्वक्वःगु अन्तर्राष्ट्रिय त्रिपिटक पाठ कार्यक्रमया आयोजना जुइ । अले लुम्बिनीइ दँय्दसं थीथी देशया बौद्ध भिक्षु भिक्षुणीपिं वयाः छसलं त्रिपिटक पाठ यायेगु परम्परा जुया वनी ।

फक्व यक्व भिक्षु भिक्षुणी उपासक उपासिकापिं व थीथी संस्थातय्गु मेहनत, लगन व सहकार्यं यानाः हे थ्व ज्याझ्वः सफल जूगु दु । आकिवं थ्व स्वयां अझ भव्य यायेमानि, राष्ट्रिय व अन्तर्राष्ट्रियस्तरय् थुकियात व्यापक यायेमानि । उकिया लागि आवंनिसें हे पुलांगु इष्र्या व दम्भ त्वःताः, मगाःमचाःगु वाःचायेकाः, दक्व छथासं च्वनाः यक्व सहभागी दयेकाः दक्वसिया सहकार्यं थुकियात अझ यक्व व्यापक व सफल यायेमाःगु दु ।
(क्वचाल)

 

सम्बन्धित बुखँ

LEAVE YOUR COMMENTS