स्वन्ति व छठ नखः लिपा हिउपाः

नेपाःया राजनीतिइ मोहनि व स्वन्ति नखः न्ह्यः छुं नं तःधंगु कथंया हिउपाः वइगु अवस्था मदु । न्हापा न्हापा जूसा मोहनि व स्वन्ति नखः वलकी हे थ्व हे नखःया इलय् लाका जनताया विरुद्धय् सरकार न्ह्यः वनी धकाः जनतातय्सं तायेकेगु यानाच्वंगु खः । जुजुपिनिगु इलंनिसें लिपांगु इलय् संविधान निर्माण न्ह्यः तक नं मोहनि व स्वन्ति नखः वलकी जनताया भावनाया अःखः निर्णय यायेगु अवसर शासकतय्त वल धकाः तायेकीगु खः ।

मोहनि व स्वन्ति नखः नापं छठ पर्व तक वइगु ई धइगु सकल नेपाःमिपिं राजनीतिपाखें तापाक्क च्वनीगु, पारिवारिक वातावरण ब्वलनीगु अले छुं तःधंगु कथंया राजनीतिक निर्णय यात धाःसां नं उकियात कया काचाक्क विरोध मयाइगु अवस्था कथं नाला वयाच्वंगु खः । अथे धकाः मोहनि नखः न्ह्यः राज्य पक्षं छुं नं कथंया कुतः धाःसा मयाःगु अवश्य नं मखु ।

बनेपाया सांगाय् अरनिको राजमार्गयात तब्या यायेगु नामय् जनताया छेँ बुँ कायेगु कथं डोजर चलेयायेगु अले इचंगुइ नं सतक तब्या यायेगु नितिं छेँ थुनेगु धकाः चिं तयेगु ज्या नं याःगु खः । सांगाय् ला सच्छिखां मल्याक छेँ थुनेगु तकं यात तर स्थानीयवासीत, स्वनिगः न्यंकंया सडक विस्तार विरुद्ध आन्दोलन याना वयाच्वंपिं मनूत जाना विरोध यायेगु व सतकय् तकं प्रदर्शन यायेवं धाःसा उगु कथंया ज्या नं दिकेत बाध्य जूगु दु ।

उकिं राजनीतिक रुपं तःधंगु हिउपाः हयेगु कुतः मयासां सतकया सवालय् धाःसा राज्यपक्षं मिखा तयेगु ज्या धाःसा याःगु खने दु । थुगु ल्याखं स्वल धाःसा राज्यपाक्षं जनताया विपक्षय् निर्णय यायेगु अले पलाः ल्ह्वनेगु कुतः हे थुगुसी नं याःगु हे मदु धकाः धायेफइगु अवस्था मदु । अय्नं आः तकया राजनीतिक घटनाक्रमयात स्वल धाःसा नेपाःया राजनीतिइ हिउपाः धइगु आः स्वन्ति नखः लिपा जक वइगु अवस्था दु धकाः धायेछिं ।

पार्टी एकता जूगु दच्छि फुना वने धुंकूगु अवस्थाय् नं पार्टीयात क्वय्या तह तक एकता याये मफयाच्वंगु, बरिष्ठ नेता माधव कुमार नेपालं ओली सरकारयात हे तसकं
आलोचना याःगु, मेम्ह बरिष्ठ नेता नारायणकाजि श्रेष्ठ प्रकाशनिसें झलनाथ खनाल तकं असन्तुष्ट जुयाच्वंगु अवस्था दु ।

राजनीतिक पार्टीत मध्ये संसदया दक्ले तःधंगु अले चुनावं नं दक्ले तःधंगु दल दयेका बिउगु पार्टी धइगु नेपाल कम्युनिष्ट पार्टी खः । एमाले व माओवादी केन्द्र एकता जुइ धुंकाः थ्व पार्टी नेपाःया दक्ले तःधंगु पार्टी जक जूगु मखुकि तसकं बःलागु पार्टी नापं सरकार तकं आः तकया दुने छगू कथं शक्तिशाली जुया बिउगु दु । नेकपाया अध्यक्ष केपी शर्मा ओलीया नेतृत्वया वर्तमा सरकारय् दुई तिहाई बहुमत दु ।

थुकिया अर्थ थ्व सरकार आन्तरिक कारण मजुल धाःसा न्यादँ तक गुगु नं हालतय् क्वःदली मखुगु सरकार जुया बिउगु दु । अले थ्व सरकारं छु चाहाना यात व यायेफइगु अवस्था दु । प्रदेशया सरकारया हकय् स्वल धाःसां नं नेकपाया नेतृत्वय् खुगू सरकार दुसा मेगु छगू नं वर्तमान ओली सरकाया हे नेतृत्वलिसे सहकार्य याना वनाच्वंगु संघीय समाजवादी फोरम नेपालया सरकार खः ।

अथे हे स्थानीय तहलय् नं नेकपाया हे बर्चस्व कायम जुयाच्वंगु दु । थज्वःगु सरकारया नेतृत्व यानाच्वंगु पार्टीं दुने नं स्वन्ति न्ह्यः तक आः आन्तरिक समस्या समाधान यायेगु बाहेक मेगु छुं नं याइगु अवस्था मदु । पार्टी एकता जूगु दच्छि फुना वने धुंकूगु अवस्थाय् नं पार्टीयात क्वय्या तह तक एकता याये मफयाच्वंगु, बरिष्ठ नेता माधव कुमार नेपालं ओली सरकारयात हे तसकं आलोचना याःगु, मेम्ह बरिष्ठ नेता नारायणकाजि श्रेष्ठ प्रकाशनिसें झलनाथ खनाल तकं असन्तुष्ट जुयाच्वंगु अवस्था दु ।

थुगु कथं स्व धाःसा ओली सरकारयात विपक्षतय्सं लां विरोध याइगु जुल तर आन्तरिक रुपं नं तःधंगु विरोध व असन्तुष्ट दु धकाः प्रस्त जूगु दु । उकिं थुगु इलय् आः नेकपां आन्तरिक कथंया समस्या समाधान यायेगुयात प्राथमिकताय् तःगु दुसा मेगु छुं तःधंगु कथंया हिउपाः हयेगु तयारी याःगु खने मदु । प्रमुख प्रतिपक्ष दल नेपाली कांग्रेसं नं आः स्वन्ति व छठ नख तकया दुने पार्टीया आन्तरिकतायात क्वातुकेगु अले पार्टीया विधान तकं न्हूगु कथं तयार याना वनेगु व कार्यकर्तायात प्रशिक्षण यायेगु कथंया योजना सहित वनाच्वंगु दु ।

उकिं थ्व इलय् नेपाली कांग्रेसं नं ओली सकारयात तःधंगु दबाव बिइगु अवस्था नं खने मदु । अथे हे ओली सकारय् दुथ्याःगु राजनीतिक दल संघीय समाजवादी फोरम नेपालं नं आः स्वन्ति व छठ पर्व लिपा जक थःपिनिगु संविधान संशोनया मुद्दायात ल्ह्वनेगु कथंया तयारी याःगु दु । संघीय कानुन दयेके धुंकाः जक संविधान संशोधनया नितिं न्ह्यः वनेगु धकाः आन्तरिक रुपं ओली सरकारं तयारी याःगु धकाः धयाच्वंगु अवस्थाय् आः छठ पर्व तक ला संघीय समाजवादी फोरमं पिइगु अवस्था खने दत ।

अथे हे संविधान संशोधनया मुद्दायात मूल मुद्दा दयेका वयाच्वंगु राष्टिय जनता पार्टीपाखें नं छठ पर्व तक पिइगु अवस्था दु । छठ पर्व तकया दुने नं संविधान संशोधनया नितिं ओली सरकारं पलाः ल्ह्वनेगु ज्या मयात धाःसा वर्तमान सरकारयात बियातयागु समर्थन तकं लित कायेगु धकाः धाःगु दु । उखे फोरमं नं छठ पर्व लिपा नं संविधान संशोधनया नितिं प्रक्रिया न्ह्याकेगु ज्या मयात धाःसा सरकार त्वःतेत बाध्य जुइ धकाः धायेगु यानाहःगु दु ।

थुगु ल्याखं स्वल धाःसा आःया अवस्थाय् स्वन्ति व छठ पर्व लिपा जक नेपाःया राजनीतिइ हिउपाः हयेगु कथंया कुतः जुइगु अवस्था वइ । अबले दक्ले न्हापां संविधान संशोधनया मुद्दा हे प्रमुख मुद्दा जुया वइगु अवस्था दु । थ्व फुक्क राजनीतिक दलतय्गु तयारीनिसें इमिसं यानाच्वंगु गतिविधियात स्वल धाःसा आः देशय् राजनीतिक रुपं हिउपाः हयेगु ज्या स्वन्ति व छठ पर्व लिपा जक जुइ धाल धाःसां छुं पाइमखु ।

सम्बन्धित बुखँ

LEAVE YOUR COMMENTS