सुशान्तया आत्महत्या, मिडिया व राजनीति

देसंदे, बीबीसी

सुं नं जवान, चर्चित कलाकार मन्त धायेवं विश्वय् न्ह्याथाय् जूसां तःधंगु खबर जुइ । तर बलिउड कलाकार सुशान्त सिंह राजपूतया मृत्य व वया प्रेमिका धयातःम्ह कलाकार रिया चक्रवर्तीया दानवीकरण गुगु स्तरं भारतया मूल समाचारय् कब्जा यानाच्वन, उकिं गुलिखे मनूतय्त राष्ट्रिय संकटयात हे किचलय् लाकाच्वन धयाथें तायाच्वंगु दु ।

संचार माध्यमतय् थ्व असाधारण चिउताः जून महिनाय् मुम्बइलय् च्वंगु थःगु हे छेँय् राजपूतया लाश लुसां निसें सुरु जूगु खः । प्रहरीं ३४ दँया कलाकारं आत्महत्या याःगु धाल, लिसें समाचारय् नं राजपूत मानसिक स्वास्थ्यलिसे ल्वानाच्वंगु धयागु खँ वल । तर राजपूतया अबुं चक्रवर्तीं वयात आत्महत्या यायेत उक्से याःगु, थः काय्या ध्यबा खुयाकाःगु व वासःया ओभरडोज बिउगु लिसें हत्या हे याःगु द्वपं बिइवं थ्व मामिला संघीय प्रहरीं छानविन यानाच्वंगु दु ।

थ्व द्वपंत अप्रमाणित खः, अले रियालें नं थुकियात अस्वीकार याना वयाच्वंगु दु। अय्सां राजपूतयात गाँजा न्यानाबिउगु द्वपनय् मंगलवाः रिया चक्रवर्तीयात भारतया लागूवासः नियन्त्रण सम्बन्धी निकाय एनसीबिं ज्वन। थ्व द्वपंयात नं रियां अस्वीकार याना वयाच्वंगु दु ।

मिडिया ट्रायल
सञ्चारमाध्यमतय् एकोहोरो छानविन वा मिडिया ट्रायलय् जथाभावी द्वपंत बियाच्वंगु दु। भारतया चर्चित टेलिभिजन प्रस्तोतातय्सं चक्रवर्तीयात हे दोषी ठहर यायेधुंकूगु खनेदु। ‘छुं नं रियालिटी शो थेंज्याःगु ज्याझ्वलय् मेगु प्रतिस्पर्धी मदु, फुकसिया ध्यान टेलिभिजन समाचारय् हे दु’ न्यू वेबसाइट द प्रिन्टया मिडिया सम्पादक शैलजा बाजपेइं धयादी ।

थ्व मिडिया सर्कस उबलय् खनेदुगु दु, गुबलय् भारत गुलिखे ततःधंगु महत्वपूर्ण संकट फयाच्वंगु दु। वंगु सोमवाः भारत सरकारं सार्वजनिक याःगु तथ्यांक कथं अनया अर्थतन्त्र ग्यानापुसे च्वनाच्वंगु दु। जूनय् क्वचाःगु स्वलाया अवधिइ भारतया अर्थतन्त्र २३.९ प्रतिशतं खुम्चे जूगु दु। थ्व सन् १९९६ य् भारतया त्रैमासिक तथ्यांक सार्वजनिक यायेगु सुरु यासां निसेंया हे दकलय् खराब अवस्था खः ।

ध्यान गुखे?
अर्थतन्त्रय् कोरोना भाइरसयामहामारीया उच्च प्रभाव लाःगु दु। भारतय् आः अमेरिका धुंकाः विश्वया हे दकलय् अप्वः कोरोना संक्रमितत लूगु दु। चीन लिसे सिमानाय् तच्वया वनाच्वंगु तनाव नं सन् १९६० लिपाया हे दकलय् खराब स्तरय् थ्यनाच्वंगु दु। तर फुक्क धयाथें टेलिभिजन समाचार च्यानलतय्सं थ्व विषयय् तसकं म्हो जक ध्यान वा ई बियाच्वंगु दु। छगू च्यानलय् ला छम्ह सहभागीं अर्थतन्त्रया खँ ल्ह्वंबलय् वयात न्व तकं वाके मबिल ।

‘जिं धाये चाहे जुया कि झीगु कुल गार्हस्थ उत्पादन २३.० प्रतिशतं कुहां वंगु दु, थ्व खं जितः दिक्क यानाच्वंगु….’ वं धयाच्वन, तर प्रस्तोतां वयात दथुइ हे पन । ‘छितः यदि दिक्क जुयाच्वंगु दुसा थ्व बहसय् सहभागी मजूसां जिउ । जिमिगु ई, छिगु ई, देशया ई, दर्शकया ई व जिगु ई बर्बाद यानादीमते’ प्रस्तोतां चिल्लाय् दनाः धाल ।

‘झासँ, छि झासँ’ धाधां प्रस्तोतां अर्थतन्त्र बारे सिइके चाहे जुयागु खःसा कन्हय् पत्रिका स्वयादिसँ धकाः सुझाव बिल ।

२ हजार घन्टा बियागु विवरण
मेमेगु च्यानलय् नं थज्याःगु नाटकीय दृश्यत खनेदयाच्वनी । गन प्रस्तोतय्सं सेलिब्रिटीया मृत्ययात थ्व ईया हे दकल् तःधंगु समचार घटना जूगु धकाः बारम्बार धयाच्वनी । चक्रवर्तीयात एनसीबीं ज्वनेवं छम्ह समाचार प्रस्तोतां थःगु च्यानलं थ्व समचारया निंतिं २ हजार घन्टा खर्च यायेधुंकूगु तकं धाल ।

राजपूतया मृत्य थथभेन छाय् मिडियां चिउताः प्वंकाच्वन, अले रिया चक्रवर्तीयात छाय् थथे दानवीकरण यानाच्वन?

चुनावया दाउपेच
दकलय् स्वाभाविक कारण ला राजनीतिक हे खः धकाः विश्लेषकतय्सं धयाच्वंगु दु। उमिगु धापू कथं प्रधानमन्त्री नरेन्द्र मोदी व भारतीय जनता पार्टी बिजेपीयात मछिंगु अवस्था मवयेमा धयागु अप्वः धयाथें च्यानतय्सं ध्यान बियाच्वुं दु।

‘राजपुतया गृहराज्य विहारय् थ्व हे दँया अन्त्यपाखे चुनाव जुइत्यंगु दु, अले राजनीतिज्ञतय्सं वयागु नामं भोट मुने चाहे जुयाच्वंगु दु’ विहारया राजधानी पटनाय् च्वंम्ह वरिष्ठ पत्रकार अमरनाथ तिवारीं धयादिल ।

सोमवाः मुख्यमन्त्री नितिश कुमारं थःगु न्हापांगु भर्चुअल चुनाव र्‍यालीइ राजपूतया नां काल । वय्कःया चुनावी गठबन्धन सहयोगी बिजेपीं सुशान्तया तस्बिर दुगु कार स्टिकर, मास्क व पर्चा इनाच्वंगु दु। तिवारीं धयादी, ‘चुनाव क्वचायेवं विहारय् सुनां नं सुशान्तया बारे खँ ल्हाइमखु ।’

पश्चिम महाराष्ट्रया राज्यया राजधानी मुम्बइलय् धाःसा थ्व समाचार अझं ताःई न्ह्यानाच्वनी तिनि । थन बिजेपी व वया पुलांम्ह ग्वाहालिमि, तर आः राज्य सरकारया नेतृत्व यानाच्वंगु प्रतिद्वन्द्वी शिवसेना दथुइ तिक्तता अप्वया वःगु दु। बिजेपीं शिवसेनाया मन्त्रीयात थ्व मामिलाय् ल्हाः दुम्ह धकाः द्वपं बियाच्वंगु दु, तर उम्ह मन्त्रीं धाःसा थ्व आरोपयात अस्वीकार यानाच्वंगु दु ।

‘बिजेपीं गुलिफु उलि याकनं थन शिवसेनाया सरकार क्वःथलेत स्वयाच्वंगु दु, तर उपिं शिवसेनाया छवि जनताया न्ह्यःने स्यंके चाहे जुयाच्वंगु दु। उकिं हे थ्व समचार न्ह्याना हे च्वनेमा धयागु उमिगु चाहना दु’ मुम्बइया वरिष्ठ पत्रकार अभय देशपाण्डें धयादी ।

सरकार दंग
तर प्रिन्टया बाजपेइं धाःथें थ्व समचारं मेथाय् हे ध्यान छ्वयेफुगुलिं सरकारयात धाःसा बां हेलानाच्वंगु दु ‘छगू अपराधया घटना, गुकी बलिउड, सिनेमा व राजनीति स्वानाच्वंगु दु। थुकिया केन्द्रय् छम्ह सुन्दर नायिका दु, थुकिं याउँक हे ध्यान साला कायेफइ । थज्याःगुलिं मनूतय्त वास्तविक मुद्दापाखें तापाका बी’ बाजपेइं धयादिल ।

‘सरकार दंग दु, छाय्कि सुनां नं वयात अर्थतन्त्र, रोजगारी वा अप्वया च्वंगु महामारीबारे न्यनाच्वंगु मदु। अले टिभी च्यानलतय् निंतिं थ्व व्यापारिक रुपं फाइदा हे जुल । थुकिं उमिगु रेटिब अप्वयेकाच्वंगु दु, यक्व स्वयां यक्व दर्शक व विज्ञापनया ध्यबा साला हे च्वंगु दु ।’

‘रेटिङ अप्वयाच्वंगु दु, छाय्कि मेपिनिगु निजी जीवनयात स्वःवनेगु झीगु प्रवृत्ति थुकियात सहज यानाबिउगु दु। दर्शकतय्सं समाचारया प्रत्येक
घटनाक्रमय् रुचि क्यनाच्वंगु दु। तर झीसं मखना थें यानाच्वनागु घटनाया नं सामना याये हे माः । थ्व प्रवृत्तिं झीगु समाजबारे छु क्यनी ले?’

थुकिं क्यनी हे झीगु थज्याःगु हे प्रवत्तिया कारण शायद रिया चक्रवतीया दानवीकरण जुयाच्वंगु दु ।

सम्बन्धित बुखँ

LEAVE YOUR COMMENTS