विश्वकप छनोट : अर्जेन्टिना त्यात, ब्राजिल बराबरीइ

एजेन्सी- विश्वकप फुटबल दक्षिण अमेरिकी छनोटय् अर्जेन्टिना त्याःगु दुसा ब्राजिलं बराबरी म्हितूगु दु । शुक्रवाः जूगु कासाय् अर्जेन्टिनां पराग्वेयात बुकूगु खः । विश्वकप विजेता अर्जेन्टिनां सन् २०२६ या निंतिं जूगु छनोट कासाय् पराग्वेयात १–० गोलं बुकूगु खः । घरेलु मैदानय् जूगु कासाय् अर्जेन्टिनाया निंतिंया कासाया स्वंगूगु मिनेटय् निकोलस ओटामेन्डीं गोल याःगु खः । छनोटया झ्वलाकः स्वंगू कासा त्याकूगु अर्जेन्टिना शीर्ष थासय् दु ।

विश्वकप छनोटया मेगु कासाय् ब्राजिलं भेनेजुएलालिसे छगू छगू गोलया बराबरी म्हितूगु खः । ब्राजिलं ग्राबिएलया गोलं कासाय् अग्रता काःगु खःसा भेनेजुएलाया निंतिं इडवार्ड बेलों बराबरी गोल याःगु खः । बराबरी लिपा ब्राजिल विश्वकप फुटबल दक्षिण अमेरिकी छनोटया निगूगु थासय् दु । दक्षिण अमेरिकी छनोट अन्र्तगत जूगु मेगु कासाय् चिलीं पेरुयात २–० गोलं, इक्वेडरं बोलिभियायात २–१ गोलं बुकलसा कोलम्बियां उरुग्वेलिसे निगू निगू गोलया बराबरी म्हितल ।

अथेहे बिहिवाः चान्हय् जूगु युरोकप छनोट कासाय् स्पेनं स्कटल्याण्डयात बुकल । स्पेनं स्कटल्याण्डयात २–० गोल बुकुगु खः । स्पेनया निंतिं अल्भारो मोराटा व ओइहान सान्चेजं गोल याःगु खः । अथेहे मेगु कासाय् नर्वें साइप्रसयात ४–० गोलं बुकल ।

नर्वेया निंतिं हालान्डं निगू गोल याःगु खःसा एलेसान्दार सोर्लोथ व फ्रेडरिक असनेलं छगू छगू गोल याःगु खः । थ्व पुचलं स्पेनलिसे पराजित जुसा स्कटल्याण्ड शीर्ष थासय् दुसा स्पेन निगूगु व नर्वे स्वंगूगु थासय् दु । युरो छनोटया मेगु कासाय् क्रोएसियां टर्कीयात १–० गोलं व लात्भिया अर्मेनियायात २–० गोलं बुकल ।

सम्बन्धित बुखँ

LEAVE YOUR COMMENTS