उत्तर कोरिया व दक्षिण कोरियाया दथुइ हाकनं हटलाइन सेवा शुरु

एजेन्सी- उत्तर कोरिया व दक्षिण कोरियाया दथुइ हटलाइन सेवा शुरु जूगु दु । निगू कोरियाली देय् दथुइ दछि लिपा उच्च राजनीतिक तहं तप्यंक स्वापू तयेफइगु हटलाइन सेवा मंगलवाः निसें हाकनं शुरु जूगु खः । थगुने जुन महिनाय् उत्तर कोरियां हटलाइन बन्द याःगु खः । निगू देय् दथुइ जूगु उच्चस्तरीय वार्ता असफल जुइवं उत्तर कोरियां हटलाइन सेवा बन्द याःगु खः ।

दक्षिण कोरियाया राष्ट्रपति कार्यालयं बिउगु जानकारीकथं निगू देय्या दथुइ आः हाकनं विश्वास दयेकेत व स्वापू बांलाकेत हटलाइन शुरु याःगु खः । राष्ट्रपति कार्यालयं अप्रिलय् निगू देय्या दथुइ पौ कालबिल जूगु नं धाःगु दु । दक्षिण कोरियाया अधिकारीतय्सं धाःकथं निगू देय्या दथुइ स्वापू तयेगु सहमति लिपा वार्ता जूगु व थ्व वार्ता आः जारी जुइ । दक्षिण कोरियां दछि लिपा हाकनं वार्ता जूगुलिं थःपिं तसकं लय्ताःगु व थ्व वार्ता सकल कोरियालीतय्गु निंतिं लसताया खँ जूगु धाःगु दु ।

सन् २०१८ लिपा निगुलिं देय् दथुइ स्वापू बांलाना वःगु खःसा उत्तर कोरियाया नेता किम जोङ व दक्षिण कोरियाया राष्ट्रपति मुन जाइया दथुइ स्वकःतक वार्ता नं जूगु खः । थ्वया हे दथुइ उत्तर कोरियाया नेता किम जोङ व अमेरिकाया पूर्व राष्ट्रपति डोनाल्ड ट्रम्पया दथुइ जूगु वार्ता असफल जुइवं निगु कोरियाया सम्बन्ध हाकनं स्यंगु खः । थ्व लिपा उत्तर कोरियां सन् २०२० या जुनय् एकतर्फी रुपं हटलाइन नं बन्द याःगु खः ।