म्हय् न्ह्याबलें ५ किलो लुँ

मनूतय् अनेकथंया सोख दयाच्वनी । अले व हे सोख नं तसकं अजू चायापुगु जुयाच्वनी । गुलिं ला पत्या यायेत तकं थाकु । गुलिं विश्वास हे याये फयाच्वनी मखु । थज्याःगु हे सोखया दथुइ लिपांगु इलय् भारतया छम्ह मनू चर्चाय् वयाच्वंगु दु । ‘इन्डिया टुडे’ नाां पत्रिकाया कथं प्रशान्त लक्ष्मण सप्कल नांया छम्ह मनुखं थःगु म्हया लभगभ दक्वं धइथें ब्वय् लुँया प्रयोग यानातःगु दु ।

प्रशान्त थम्हं पुनीगु वसः बाहेक मेगु थःगु म्हय् गन तक छिं अन तक हे लुँया प्रयोग यानातःगु दु । छगू ल्याखं धायेगु खःसा वयाम्ह म्हधुछिं लुँ हे लुँ जक दु धाःसा पाइमखु । न्यनेबलय् पत्याः यायेथाकु तर थ्व यथार्थ हे खः । प्रशान्त न त सुं सेलिब्रिटी खः न त उच्च घरानिया, न त सम्भ्रान्त परिवारयाम्ह हे खः ।

भारतया छगू मध्यम वर्गया प्रशान्तं थःगु म्हया दक्वं धइथें ब्वय् लुँ प्रयोग यानाः सकसितं अजू चायेका बिउगु दु । खतुं प्रशान्त पेशां व्यापारी खः । तर व गरिबतय् निंतिं धकाः चायेकातःगु छगू संस्थापाखें कल्याणकारी ज्या नं यायेगु यानाच्वंगु दु । छगू सामान्य व मध्यम वर्गीय परिवारया जुयाः नं म्हधुछिं हे धइथें लुँया ज्वलं दुगु विषयय् वयागु धापू दु, ‘लुँलिसे जिगु मचांनिसे हे अत्याधिक रुपं लगाव व मोह दु ।’

प्रशान्त जब छेँय् नं पिहां वइ । अबलय् वयागु म्हय् थ्यंमथ्यं न्यागू केजी लुँया थीथी ज्वलं म्हय् दयाच्वनी । प्रशान्तं गःपतय् क्वखानातःगु थःगु नांया अंग्रेजी आखः ‘पी’या लकेट, ब्रासलेट, स्पोर्टस लाकामय् स्टड, घडीइ जक लुँया प्रयोग यानाच्वंगु मखु । वया निपा ल्हाःया झिपतिनय् नं लुँया हे जक अंगू दुसा वयाके दुगु आइफोनया ‘कभर’ नं लुँया खःसा दकलय् मध्ये आकर्षण वयागु गःपतय् च्वंगु सिख खः ।

छाय्कि व सिखः झ्वाट्ट स्वयेबलय् गलबन्दीथें च्वनेफु । प्रशान्त थथे लुँया प्रयोग याःगु यक्व मदुनि करिब दछि ति हे जक दत । सन् २०१८ निसें लुँया प्रयोग यायेगु यानाहःगु खःसा व थः न्ह्याथाय् वंसां नं आकर्षणया केन्द्रविन्दु जुयाच्वंगु दु ।भारतय् थुकथं म्हधुछिं लुँया प्रयोग याःम्ह प्रशान्त न्हापांम्ह व्यक्ति धाःसा मखु ।

थ्व स्वयां न्ह्यः दत्ता फुगे नांया मनुखं ला लुँया ज्याकेट हे दयेकाः फिना जूगु खः । दत्तां मिसातय्त प्रभावित यायेत धासें लुँया ज्याकेट, लुँया हे तांख, तःपु मछिं हे थीथी डिजाइनया लुँया सिखः, लुँया अंगू, लुँयागु हे पेटी, निपां ल्हातय् तःपू हे थीथी डिजाइनया लुँया ब्रासलेट न्ह्याना जूगु खः ।

थथे हे लुँया प्रयोग यायेगुलिइ सौखिन व्यक्तिमध्ये छम्ह खः भारतया नांजाःम्ह संगीतकार व म्येँ हालामि बप्पी लहरी । वयागु म्हय् नं न्ह्याबलें आपालं लुँया तिसा ज्वलं दयाच्वनी ।

सम्बन्धित बुखँ

LEAVE YOUR COMMENTS