सुनचाँदी व्यवसायी संघया तालिम भवन शिलान्यास

येँ- काठमाडौं सुनचाँदी व्यवसायी संघया तालिम भवनया शिलान्यास याःगु दु । येँ महानगरपालिकाया मेयर विद्यासुन्दर शाक्यं येँ मनपा २५ वडाया झ्वाःबहाःस्थित कुसुमबियालाछिइ दयेकत्यंगु तालिम भवनया शिलान्यास यानादीगु खः ।

विशेष पुजालिसें जूगु शिलान्यास ज्याझ्वलय् येँ मनपाया उपप्रमुख हरिप्रभा खड्गी श्रेष्ठ, येँ मनपा १७ वडाअध्यक्ष नवीन मानन्धर, २५ वडाअध्यक्ष नीलकाजी शाक्य, लुँवहः व्यवासायीलिसें थीथी व्यक्तित्वपिनिगु उपस्थिति दुगु खः ।
ज्याझ्वलय् नवासें येँ मनपाया मेयर शाक्यं लुवहः ख्यःया विकासया निंतिं संघं याना वयाच्वंगु ज्याय् आवश्यक जूगु खण्डय् येँ मनपा नं ग्वाहालि यायेत तयार दु धासें लुँवहःया कला व सीपया विकास याना वने फत धाःसा उकिं आर्थिक विकासलिसें रोजगारीइ नं तिबः जू वनीगु विश्वास प्वंकादिल ।

उपप्रमुख हरिप्रभां ल्याय्म्ह पुस्तां सीपया तालिम कयाः स्वरोजगार जुइत संघं हःगु योजना सकारात्मक जूगु विचाः प्वंकादिल । वय्कलं लुँवहःया बजाःयात स्थानीय जनशक्तिपाखें विकास यायेत संघं म्हिताच्वंगु भूमिकां थ्व ख्यःयात विकास यायेत तिबः जुइ धयादिल ।

संघया अध्यक्ष महेन्द्ररत्न शाक्यं लुँवहःया क्षेत्रयात अझ व्यावसायिक यायेगु नापं सीपया विकास यायेत लुँवहःया तालिम सम्बन्धी विद्यालयया अवधारणा न्ह्यःने हयागु जानकारी बियादिल । थुगु भवनयात नमूना तालिम केन्द्रया रुपय् विकास यायेगु योजना दुगु जानकारी बियादिसें वय्कलं थ्व ख्यःया निंतिं आवश्यक जनशक्तिया विकास, सीप व व्यावसायिक क्षमताया पूर्वाधारया निंतिं प्रशिक्षण केन्द्र निर्माण यायेगु योजनाकथं हे तालिम केन्द्र दयेकेत्यनागु धयादिल ।

वइगु खुला लिपा तालिम केन्द्रयात संचालनय् हयेगु योजना दुगु संघं जानकारी बिउगु दु । थुगु तालिम केन्द्रय् कालिगढ तयार यायेगु, बजाः व्यवस्थापन व सेल्सम्यान तयार यायेगु नापं सैद्धान्तिक व प्राविधिक तालिम नं बीगु योजना संघं दयेकूगु दु ।

तालिमय् अपांगतापाखें १०, मिसापाखें १५, उत्पीडित वर्ग व जनजातिपाखें १५, परम्परागत पेशाय् आवद्ध जुयाच्वंपिं ६० प्रतिशतयात तालिम बीगु व उत्कृष्ट २० म्ह प्रशिक्षार्थीयात मेगु चरणया प्रशिक्षणय् प्रशिक्षक दयेकेगु योजना संघया दु ।

सम्बन्धित बुखँ

LEAVE YOUR COMMENTS