यलध्वाखाया बसपार्क चीकल

यल – यल महानगरपालिकां यल ध्वाखा पिने च्वंगु बसपार्क चीकूगु दु । बस पार्क चीकेधुंकाः उगु थासय् आः बसस्टप जक जुइगु खँ धाःगु दु । आः अन यात्रुयात बस गयेगु व कुहां वयेगु निंतिं जक बस दिकीगु खँ यल महानगरपालिकाया नगर प्रहरी प्रमुख सिताराम हाछेथुं धयादीगु दु ।
यल मनपाया प्रमुख चिरीबाबु महर्जनं नगर क्षेत्र दुने सतक दुर्घटना म्हो यायेत व सवारी साधन सुव्यवस्थित यायेत निर्देशन बीवं नगरप्रहरी व महानगरीय ट्राफिक प्रहरी महाशाखां, पाटनढोका बस व्यवसायी प्रालि, शान्ति युवा क्लब, मिखा बहाल टोल, ननि टोल सुधार समितिया ग्वाहालिइ बसपार्क चीकेगु ज्या जूगु खः ।

यलध्वाखा न्ह्यःने बसपार्क जुयाच्वंगुलिं अन फोहोर जुइगु, दुर्गन्ध व ध्वनी लिसें वायु प्रदुषण तकं अप्वया वंगुलिं बसपार्क चीकेमाःगु खँ धाःगु दु ।

आः अनं बसपार्क चीकेधुंकाः यल नगर चाःहिउ वइपिं पर्यटकयात थप सुविधा चूलाइगु खँ धाःगु दु । उगु लागाय् पर्यटकीय बस, कार नापं मोटरसाइकल पार्किङ यायेगु योजना कथं न्हूगु संरचना दयेकेगु खँ यल मनपां धाःगु दु ।

सम्बन्धित बुखँ

LEAVE YOUR COMMENTS