ज्वंगु प्याज दंक मिल

येँ (नेपालभाषा टाइम्स) – खाद्य व्यवस्था तथा बजार कम्पनीं सहुलियत भावं मिउगु प्याज न्यायेत उपभोक्तातय् भीड जूगु दु । भारतं प्याज निर्यातय् प्रतिबन्ध तयेवं व्यापारीतय्सं आकाझाकां भाः थकाःगु खःसा सरकारं बजाः अनुगमन यायेगु झ्वलय् थीथी व्यापारीया गोदामं प्याज जफत याःगु खः ।

सरकारं जफत याःगु प्याज वंगु शुक्रवाःनिसें प्रतिकिलो ६० तकां मीवं थापाथलीइ प्याज न्याइपिनिगु ल्याः अप्वया वंगु खः । बजारय् थौंकन्हय् प्याज प्रतिकिलो १४० तका थ्यनाच्वंगु दुसा सरकारं जफत याःगु प्याज प्रतिकिलो ६० तकां मीवं आपालं मनूत दंगु प्याज न्यायेत लाइन च्वनेगु क्रम शुरु जूगु खः ।

कम्पनीया बागमति प्रदेश बिक्री प्रमुख रणबहादुर बुढाथोकीया कथं थौंकन्हय् छम्हेसित ३ केजी तक प्याज मीगु ज्या जुयाच्वंगु दु । वंगु वालय् बजाः अनुगमनया झ्वलय् बल्खु व कालिमाटी तरकारी बजारय् सुचुकातःगु १२ हजार किलो प्याज सरकारं जफत याःगु खःसा उगु हे प्याज सरकारं सहुलियत भावं मिउगु खः । लिसें थिकेगु भावं प्याज मिउपिं व्यापारीयात सरकारं बं नं पुइकूगु खः ।