ने. सं. ११४३ तछलाथ्व त्रयोदशी -

बुढीगण्डकी जलविद्युत आयोजना मेगु अपारदर्शी निर्णय

येँ – पटक पटक थीथी कथंया निर्णय जूगु राष्ट्रिय गौरवया आयोजनाया रुपय् दुगु बुढीगण्डकी जलविद्युत आयोजना हाकनं मेगु अपारदर्शी निर्णय जुइत्यंगु खँ सूत्रं धाःगु दु । सूत्रंया कथं फ्रान्सेली परामर्शदात कम्पनी ट्याक्टबेलं उगु आयोजनाया क्षमता १ हजार २०० मेगावाट तक दयेके फइगु कथंया विस्तृत अध्ययन प्रतिवेदन (डीपीआर) सरकारयात लःल्हाःगु दु ।

तर सुत्रया कथं ९०० मेगावाट दयेकेगु व १२०० मेगावाटया दयेकेगुली खास हे फरक मदु । तर गुगु विधि व प्रक्रियाया आधारय् आयोजना दयेकेगु ज्या जुयाच्वंगु दु थुकिं धाःसा थीथी कथंया शंका ब्वलंकूगु दु । अझ विशेष यानाः गबलें सरकार थम्हं हे गबलें चिनियाँ कम्पनी गेजुवायात बीगु धकाः जुइगु निर्णयं झन जक अन्यौल ब्वलंकूगु दु ।

आयोजना दयेकेगु बारे सरकार दुने नीतिगत अस्थिरता ब्वलनेगु यानाच्वंगु दु । सरकारं जलस्रोत ऐनया दफा ३५ कथं करार सम्झौता यानाः बुढीगण्डकी चिनियाँ कम्पनीयात बीगु निर्णय यात । तर विज्ञपिंसं धाःसा उगु आयोजना नेपाः सरकारं थम्हं दयेकेमाःगु खँय् बः बियाच्वंगु दु ।

उगु आयोजना दयेकेगु निंतिं धकाः सरकारं तत्कालिन राष्ट्रिय योजना आयोगया उपाध्यक्ष डा. स्वर्णिम वाग्लेया संयोजकत्वय् कार्यदल दयेकूगु खःसा कार्यदलं २६३ अर्ब तका तुइगु उगु आयोजना नेपालं हे दयेकेमाःगु प्रतिवेदन बिउगु खः ।

आयोजना दयेकेगु निंतिं कर्मचारी सञ्चय कोष, नागरिक लगानी कोष, नेपाली सेनाया सैनिक कल्याणकारी कोष, माथिल्लो तामाकोशी, चिलिमे जलविद्युत कम्पनीया नं शेयर दइगु कथं कम्पनी स्थापना यानाः नेपालं दयेकेगु प्रस्ताव याःगु खः । आयोजनायात कयाः थुलिमछि चलखेल जुयाच्वंगु मू कारण धइगु कमिसनया खँयात कयाः खः धायेगु यानाच्वंगु दु । चिनियाँ कम्पनीयात दयेके बिल धाःसा उकिया लागत ३०० अर्ब थ्यनिगु खँ धाःगु दु ।