तुर्कमेनिस्तान : कोरोनाया संक्रमित मदुगु छगू देय्

बीबीसी – कोरोना भाइरस (कोभिड-१९)या संक्रमण विश्वन्यंक थ्यना विश्वया नक्सा छगूलिं ह्याउँगु घेरा दुने लानाच्वंगु इलय् छगू देय् निर्धक्करुपं न्हियां न्हिथंया ज्या यानाच्वंगु दु । मध्ये एसियाया छगू देय् गनं कोरोना भाइरसया संक्रमितय् ल्या शुन्य दु । तुर्कमेनिस्तान अज्याःगु देय् खः गन आधिकारिक तथ्यांक कथं छम्ह नं मनू कोरोनापाखें संक्रमित जूगु मदुनी ।

मेमेगू देय् स्वयां तुर्कमेनिस्तानया न्हियांन्हिथं तसकं पा । क्याफे व रेष्टुराँत फुक्कं चालाच्वंगु दु । ग्वाःग्वाः मनूत इहिपाय भ्वजय् ब्वति कयाच्वंगु दु । अले सुनां नं मास्क तयाच्वंगु मदु । मंगलवाः जक विश्व स्वास्थ्य दिवसया लसताय् अन छगू तःजिगु साइकल र्‍याली यात । राष्ट्रपति बेरमुखामेडोभं तकं ब्वति कयाः छगू सेन्दश बीत स्वःगु खनेदु । सन्देश खः, ‘देय् स्वस्थ्य दु ।’

तर सरकारी तथ्यांक गुलि विश्वास यायेबहःजू ? तुर्कमेनिस्तानया स्वास्थ्य क्षेत्रया अध्ययन यानादीम्ह प्रोफेसर मार्टिन म्याकीं तुर्कमेनिस्तानया आधिकारीक तथ्यांक विश्वास यायेत थाकूगु धयादी ।

‘छगू दशक न्ह्यःनिसें थनं छगू नं एचआईचीया केस मदुगु तथ्यांक दु । गु विश्वास यायेत तसकं थाकु । थ्व इलय् नं अथेहे विश्वास यायेबहः मजू ।’, प्रोफेसर मार्टिनं तर्क तयादी ।

संयुत्त राष्ट्र संघया तुर्कमेन्सितानया प्रतिनिधि इलिना पानोभां मेमेगू देशय् थें थन नं सरकारं बिउगु तथ्यांकयात हे आधिकारिक तथ्यांक माने यायेमाःगु बिचाः तयादी ।

अथेखःसां तुर्कमेनिस्तानं कोरोनाया संक्रमण वयेमबीगु निंतिं थीथी ज्याझ्वः यानाच्वंगु दु । संयुत्त राष्ट्र संघनाप मंकाः कथं जनचेतना थनेगु नापं मेमेगू ज्या यानाच्वंगु दु ।

तुर्कमेनिस्तानं लच्छि न्ह्यः हे थःगु देय् नाप स्वानाच्वंगु फुक्कं नाका बन्द याःगु खः । फेब्रुअरी हे चीनं वइगु दक्वं फ्लाइट बन्द याःगु खःसा फुक्कं अन्तर्राष्ट्रिय विमानयात तुर्कमेनाबाटय् यंकाः अन क्वारेन्टिनय् च्वनेमाःगु व्यवस्था याःगु खः ।

प्रोफेसर मार्टिनं विश्वया गुलिखे देय् काेराेना नियन्त्रण यायेत सफल जूसां पिनें वइपिनिपाखें संक्रमण जुइफुगुलिं थुकेपाखे सजग जुइमाःगु बिचाः प्वंकादी ।