इरानं परमाणु सम्बर्द्धनया ज्या सुरु यात

एजेन्सी – इरानं २० प्रतिशत युरेनियमया शुद्धीकरणसहित परमाणुतत्व सम्वर्द्धनया ज्या हाकनं सुरु याःगु दु । थुकियात सन् २०१५ य् विश्वशक्ति राष्ट्रतलिसे जूगु सम्झौताया दकलय् तःधंगु उल्लंघन धकाः धाःगु दु। इरानं सम्वर्द्धनन याःगु परमाणु बम दयेकेत नं छ्यलेफइगुखँ धाःगु दु । थज्याःगु अस्त्र दयेकेत छ्यलीगु परमाणु ९० प्रतिशत तक शुद्ध जुइमाः ।

अमेरिकी विदेश मन्त्रालयया प्रवक्तां इरानयात धम्कीपूर्ण परमाणु अभियान संचालन याःगु द्वपं बिउगु दु। इरानं धाःसा थःपिनिगु परमाणु कार्यक्रम शान्तिपूर्ण ज्याया निंतिं जक जूगु खँ धया वयाच्वंगु दु । सन् २०१५ या सम्झौता कथं इरान परमाणुसम्बन्धी यक्व ज्या दिकूगु खः । तर सन् २०१८ य् अमेरिकां उगु सम्झौतां पिहां वनागु घोषणा यासें इरानयात आर्थिक प्रतिबन्ध तयेगु सुरु यायेवं इरानं नं उकिया लिसलय् परमाणु सम्वर्द्धन सुरु याःगु खः ।

इरानया वरिष्ठ परमाणु वैज्ञानिक मोहसिन फख्रिजादेहया रहस्यमय हत्या लिपा इरानया संसदं न्हूगु कानुन पारित यानाः परमाणु सम्वर्द्धन सुरु याःगु खः । इरानी सरकारया प्रवक्ता अलि राबेइं संचारमाध्यमलिसे खँ ल्हासें युरेनियमयात २० प्रतिशत शुद्ध यायेगु ज्या फोर्दो केन्द्रं सुरु यानागु खँ धयादीगु दु । वय्कलं राष्ट्रपति हसन रुहानीया आदेश कथं ज्या सुरु जूगु खँ धयादीगु खः ।

सम्बन्धित बुखँ

LEAVE YOUR COMMENTS