अमेरिकाय् विदेशी विद्यार्थीया निंतिं कडा नियम

वाशिंगटन – अमेरिकाय् ट्रम्प प्रशासनं विदेशी विद्यार्थीतय् निंतिं नियमय् अझ कडा याःगु दु । ट्रम्प प्रशासनं छगू सार्वजनिक सुचं जारी यासें विदेशी विद्यार्थीतय् निंति थप कडिकडाउ यायेगु थःपिनिगु ग्वसाः दुगु जानकारी बिउगु खः ।

ट्रम्प प्रशासनया थुगु लिपांगु ग्वसाःकथं आवंलि विदेशी विद्यार्थीत संघीय सरकारया अनुमति मकासे प्यदँ स्वयां अप्वः अमेरिकाय् च्वनेदइमखु । अथे हे पाठ्यक्रम हिलेगु वा छगू विश्वविद्यालयं मेगुलिइ वनेगु ज्यायात नं पंगु दु । आतक अमेरिकाय् उच्च अध्ययनया संस्थातय्सं हे विद्यार्थी भिसा अवधि थप यानाबीगु अधिकार दयाच्वंगु खः ।

विदेशी विद्यार्थीया निंतिं लागू याःगु न्हूगु नियम सेप्टेम्बरनिसें लागु जुइ । डिपार्टमेन्ट अफ होमल्याण्ड सेक्युरिटीया कथं थुकिं भिसाया लाक्वपाक्व दुरुपयोग जुइगु पनेगु व नियमित निगरानीपाखें राष्ट्रिय सुरक्षा अझ सुदृढ जुइ । तर एशोसिएसन अफ इन्टरनेशनल एजुकेटर्सं न्हूगु नियमयात ‘अनावश्यक व गलत रुपं निर्देशित’ धाःगु दु ।

थ्व स्वयां न्ह्यः ‘एफ वान’ वर्गया विदेशी विद्यार्थी भिसा व ‘जे वान’ एक्सचेन्ज भिसा दुपिंत इमिगु उगु ‘हैसियत ज्वःछि’या निंतिं भिसा जारी यायेगु याना वयाच्वंगु खः । उकिया अर्थ इमिसं डिग्री हासिल मयाःतले च्वने दइगु खः । न्हूगु नियमं उकिया नं ई क्वःछिना बिउगु दु ।