येँ मनपाय् २५ अर्बया बजेट
येँ (नेपालभाषा टाइम्स)÷येँ महानगरपालिकां वइगु आर्थिक दँ २०७९÷८० या नितिं २५ अर्ब ४१ करोड ९६ लाख ९६ हजार तकाया बजेट न्ह्यब्वःगु दु । म्हिगः च्वंगु झिंछक्वःगु नगरसभाय् उपमेयर सुनिता डंगोलं उगु बजेट पेश यानादीगु खः ।
बजेटय् सामाजिक सुरक्षा भत्ता लिसें नेपाल सरकार, प्रदेश सरकार व जग्गा एकीकरण आयोजनापाखें जुइगु आम्दानी सहित स्थानीय सञ्चित कोष बाहेकया बजेट दुथ्याइगु ध्यबा मुक्कं ३ अर्ब ५ करोड १ लाख ४७ हजार दु ।
स्थानीय सञ्चित कोषपाखें खर्च जुइगु ध्यबा मध्ये आर्थिक विकास क्षेत्र अन्तर्गतया ज्याझ्वःया नितिं ५० करोड २१ लाख २४ हजार तका विनियोजन याःगु दु । उकथं हे ज्याकू सञ्चालन व प्रशासनिक क्षेत्रया नितिं ४ अर्ब ६८ करोड ९८ लाख ६० हजार तका विनियोजन याःगु दु ।
पूर्वाधार विकास क्षेत्रया निंतिं ११ अर्ब ८ करोड ८९ लाख बजेट विनियोजन याःगु दु । थ्व मुक्कं बजेटया ४९.५७ प्रतिशत खः । सामाजिक विकास क्षेत्रया नितिं १ अर्ब ६२ करोड २८ लाख २२ हजार बजेट विनियोजना याःगु दु ।
अथे हे बजेटय् सुशासन व अन्तर सम्बन्धित क्षेत्रया नितिं ४ अर्ब ४६ करोड ५८ लाख ४० हजार तका बजेट विनियोजना याःगु दु, गुगु मुक्कं बजेटया १९.९६ प्रतिशत जूगु खँ उपप्रमुख डंगोलं कनादिल ।
नेपाल सरकार व प्रदेश सरकारपाखें वइगु सशर्त अनुदानपाखें १ अर्ब ३१ करोड ३७ लाख ६ हजार स्रोत सुनिश्चित जूगु खँ नं बजेटय् न्ह्यथानतःगु दु ।
येँ मनपाया आर्थिक दँ २०७९÷८० या नितिं २२ अर्ब ३६ करोड ९५ लाख ४९ हजार आम्दानी जुइगु प्रक्षेपण याःगु दु । नेपाल सरकार व प्रदेश सरकारपाखें वइगु सशर्त अनुदानपाखें १ अर्ब ३१ करोड ३७ लाख ६ हजार, आन्तरिक आयपाखे ११ अर्ब ९५ करोड बैंक मोज्दात नापं यानाः १६ अर्ब ८० करोड १ लाख स्रोत क्वःछिनातःगु दु ।
राजश्व बाँडफाँडपाखे ३ अर्ब ४१ करोड ३७ लाख ७३ हजार समानीकरण अनुदानपाखे ८४ करोड १९ लाख ७० हजार आम्दानी जुइगु प्रक्षेपण यानातःगु दु । उकथं हे सामाजिक सुरक्षा भत्ता बापत संघीय सरकारपाखें १ अर्ब ६५ करोड व प्रदेश सरकारपाखें वइगु ज्याझ्वःया नितिं ५२ करोडलिसे जग्गा एकीकरण आयोजनाया नितिं ८८ करोड १ लाख ४७ हजार आय प्रक्षेपण यानातःगु दु ।
आर्थिक दँ २०७९÷८० या नितिं म्हिगः न्ह्यब्वःगु बजेटयात कयाः सहलह लिपा पारित यायेगु तयारी जुयाच्वंगु दु ।
LEAVE YOUR COMMENTS