सोमालियाय् आत्मघाती आक्रमण

सोमालियाया छगू होटलय् जूगु आत्मघाती आक्रमणय् लानाः २६ म्हेसिया ज्यान वंगु दु । सीपिं मध्ये अप्वः विदेशी नागरिकत लाःगु खँ धाःगु दु । थ्व विस्फोटय् लानाः मेपिं ५६ म्ह नं घाःपाः जूगु दु । प्रत्यक्षदर्शीतय्सं धाःकथं छम्ह आक्रमणकारीं विस्फोटक पदार्थं जाःगु कार असासे होटलय् हयाः विस्फोट याःगु खः ।

कारयात होटलय् न्याकेधुंकाः मेपिं बन्दूकधारीतय्सं होटलय् आक्रमण सुरु याःगु खँ धाःगु दु ।अधिकारीतय्सं धाःकथं थ्व आक्रमण लिपा प्यम्ह आक्रमणकारी नं सीगु दु । सोमालियाया दक्षिणी क्षेत्रय् लाःगु नांजाःगु होटलय् जूगु थ्व आक्रमणया जिम्मेवारी आतंककारी पुचः अल सबाबं काःगु दु ।

घटनाय् लानाः सीपिं मध्ये स्वम्ह केन्याली, छम्ह क्यानाडाली, छम्ह बेलायती, निम्ह अमेरिकी व स्वम्ह तान्जानियाली लाःगु दु । अथेहे घटनाय् निम्ह पत्रकारतय् नं ज्यान वंगु खँ धाःगु दु । घाःपाः जूपिं मध्ये निम्ह चिनिया नागरिक नं लाःगु दु ।

छम्ह सुरक्षाकर्मीं एएफपी समाचार संस्थायात धाःकथं सीपिं मध्ये छम्ह पुलांम्ह स्थानीय प्रशासन मन्त्री व छम्ह सांसद नं लाःगु दु ।
आक्रमण जूगु इलय् होटलय् सोमालियाया क्षेत्रीय नेता व जातीय समुदायया न्ह्यलुवात च्वनाच्वंगु खः । अन उपिं वइगु चुनावयात कयाः सहलह यानाच्वंगु दु ।

सम्बन्धित बुखँ

LEAVE YOUR COMMENTS