कोथुननी बचे यायेत असनय् सभा

येँ – असंया कोथुननी बचे यायेगु निंतिं थौं असं लागाय् हे छगू तःजिक विरोध प्रदर्शन याइगु जूगु दु । कोथुननी बचाउ अभियानया संयोजक नमस्ते साय्मिं सार्वजनिक सञ्जाल मार्फत थौ न्हिनय् ३ बजे असनय् विरोध सभा जुइगु जानकारी बिसें उगु ज्याझ्वलय् ब्वति कायेत इनाप यानादीगु खः ।

परापूर्वकालंनिसें सन्तान दरसन्तानं बाः पुलाः भोग चलन याये दइगु सम्झौताया अःखः गुथि संस्थानं मेगु हे व्यावसायिक पुचःलिसे अनधिकृत ढंगं सम्झौता यानाः बिजनेस कम्प्लेक्स दयेकेत्यंगु धासें उकिया विरोध याःगु खः ।

असनय् अज्याःगु बिजनेस कम्प्लेक्स दयेकेगु धइगु कानुनी रुपं अःखः जूगु जक मखुसें असं लागाय् पुर्खौंनिसें च्वनाच्वंपिं स्थानीय नेवाःतय्त विस्थापित यानाः ऐतिहासिक थाय्यात समाप्त याना छ्वयेगु कुतः समेत खः धकाः द्वपं बियातःगु दु । गुथि संस्थानया थ्व जालझेलपूर्ण ज्याझ्वःया विरोध यायेत नं सकले नेवाः खलः पुचःतय्त इनाप याःगु दु ।