‘थ्व शहरया नां काठमाडौं खः, बालेन सिटी मखु’

येँ(नेपाल भाषा टाइम्स)÷ येँ मनपा वडा २२ या वडाध्यक्ष चिनीकाजी महर्जनं थ्व शहरया नां ‘काठमाडौं’ खः, बालेन सिटी मखु धासें मेयर बालेन साहं नगरया नां तकं हिलेगु कुतः यानाच्वंगु द्वपं बियादीगु दु ।

थःगु हे न्ह्यःने वयाः मनूतय्सं ‘बालेन सिटी’ धाइबलय् अथे धाये मजिउ धायेमाःम्ह मेयर साहं अःखतं मुसुमुसु न्हिलाच्वनीगु खँ नं वडाध्यक्ष महर्जनं कनादिल ।
न्हूसतकया पार्किङ चीकूगु विरुद्ध वडा ज्याकुथिइ म्हीग हानं यानादीगु पत्रकार सम्मेलनय् न्ववासें वय्कलं उगु खँ धयादीगु खः ।

न्हूसतकय् ठेक्कां पार्किङ याकेगु ज्यायात थम्हं न्हापांनिसें हे विरोध यानाच्वनागु खँ कँसें वय्कलं धयादिल, ‘थन सशुल्क मखु निःशुल्क व व्यवस्थित पार्किङ यायेमाः धइगु पक्षयाम्ह खः जि ।’

पार्किङ विरुद्ध संघर्ष समितिया नायः अमृत मानन्धरं यदि मनपां थःपिनि खँ मन्यन धाःसा न्हू सतकय् पसः तिनाः टायर च्याकेगु ख्याच्वः बियादीगु दु ।