कोरोना व स्वनिगःया जनसंख्या
विश्वन्यंकं कोरोना भाइरसया प्रकोप न्यनावनाच्वंगु दु । कोरोना भाइरसया कारणं स्वद्वलं मल्याक मनू सीधुंकूगु दु । थ्वहे झ्वलय् नेपालय् नं कोरोना भाइरसयात कयाः चिन्ता प्वंकेगु जक मखसे मनूतय् दथुइ छगू कथंया सन्त्रास हे ब्वलनाच्वंगु दु । मनूत सामान्य सेखंज्वर जक वःसां नं थःत नं कोरोना भाइरस संक्रमण जूगु जकं खःला धइगु आशंका यानाः अस्पतालय् क्यं वनेगु जुयाच्वंगु दु ।
थ्व धइगु आम जनमानसया दथुइ ब्वलंगु त्रास खः । गुकियात म्हो यायेत छुं कथंया पहल धाःसा जुयाच्वंगु मदु । कोरियां लिहां वःम्ह छम्ह मनू कोरोना भाइरस मुक्त जुयाः थःगु छेँय् लिहां वनेधुंकूगु दु । उम्ह मनू आः स्वस्थ जुयाच्वंगु खँ नं वयाच्वंगु दु । तर नं त्रास धाःसा भचा म्हो जूगु मदुनि ।
थनिं छुं न्हिं न्ह्यः जक प्यम्ह मनू सामान्य ज्वर वयेवं अस्पतालय् भर्ना जुल । उपिं नं कोरोना संक्रमित मखु धइगु पुष्टि जुइधुंकूगु दु । अझ चीनं उद्धार यानाः नेपाः हःपिं नेपाःमितय्त नं कोरोना भाइरस संक्रमण मजूगु पुष्टि जुइधुंकाः सकलें थःथःगु छेँय् लिहां वनेधुंकूगु दु ।
थुकिं छु खँ स्पष्ट जुइधुंकूगु दु धाःसा नेपालय् आतक कोरोना भाइरसया संक्रमण जूगु मदुनि ।
तर कोरोना भाइरसया संक्रमण मजूसां नं उकियात कयाः नालेमाःगु सतर्कता धाःसा आपालं दु । विशेष यानाः स्वनिगः आपालं जनसंख्या दुगु थाय् खः । चीधंगु थासय् न्यय्गू लाख स्वयां अप्वः जनसंख्या दुगु स्वनिगलय् यदि कोरोना संक्रमण जुल धाःसा उकियात गुकथं नियन्त्रण यायेगु धइगु तःधंगु हाथ्या दु ।
छगू ला स्वनिगलय् माक्व स्वयां अप्वः जनसंख्या दु । गुकिया लिच्वः छुं नं कथंया संक्रमण जुल धाःसा आपालं मनूत प्रभावित जुइफइगु सम्भावना स्वनिगलय् यक्वः दु । मेखे सरकारं कोरोना भाइरसया सम्भावित संक्रमण पनेत आतक माक्वः कुतः छुं नं मयाः धकाः सम्बन्धित विज्ञपिंसं धायेगु यानाच्वंगु जक मखसे नेपालय् संक्रमण न्यना वन धाःसा उकियात पनेत माक्व जनशक्ति नं मदु ।
थ्वकथं स्वयेबलय् स्वनिगलय् गुगुं नं इलय् थुगु संक्रमणया कारणं तःधंगु विध्वंस न्यनेफइगु सम्भावना मदु धकाः धाये फइगु स्थिति मदु ।
विश्वया थीथी देशय् कोरोना भाइरस न्यना वनेवं आपालं देशं विदेशं थःगु देशय् दुहां वइपिं विदेशी वा स्वदेशीयात भाइरसया संक्रमण दु मदु स्वयेगु निंतिं थःपिनिगु सक्रियता अप्वयेका यंकाच्वंगु दु ।
तर नेपालय् धाःसा उलि ज्या यायेगु निंतिं नं माक्व जनशक्ति जक मखु आवश्यक साधन तकं मदुगु बुखँ वयाच्वंगु दु । थुकिं छु क्यं धाःसा सरकार आतक नं कोरोना भाइरसयात कयाः उलि गम्भीर खनेमदु । नेपाःया छगू जक अन्तर्राष्ट्रिय विमानस्थलय् तकं माक्व जनशक्ति व माःगु साधन मदु धइगु विडम्बनाया खँ खः ।
स्वनिगःया स्वंगू जिल्लाय् दयेकेगु धाःगु स्मार्ट सिटी दयेकेगु ज्या जुल धाःसा थुकिं स्वनिगलय् थप ४० लाख जनसंख्या अप्वइगु खँ वयाच्वंगु दु । थपीचाकूगु थासय् थुकथं जनसंख्या अप्वइगु योजना छुं नंकथं उचित मजू धकाः धायेगु यानाच्वंगु दु ।
अन्तर्राष्ट्रिय विमानस्थलया अवस्था हे अज्याःगु दुसा मेखे नेपाः दुहां वयेगु आपालं नाकाय् सामान्य रुपं चेकजाँच यायेत दक्ष जनशक्ति तकं मदुगुलिं नं नेपालय् कोरोना भाइरसया संक्रमणया सम्भावना अप्वया वनाच्वंगु दु । मेगु खँ स्वनिगलय् छुं जुयाः कोरोना भाइरस संक्रमण जुल धाःसा स्वास्थ्य संस्थातय्सं भूमिका म्हिते फइ कि फइमखु धइगु अनुमान तकं याये फयाच्वंगु मदु ।
सरकारं थःके दुपिं चिकित्सकतय्त आतक नं माःकथं छ्यले फयाच्वंगु मदु । गुलिखे दुर्गम थासय् वनेमाःपिं चिकित्सकत खटे यायेगु ज्याय् तकं सफल मजुयाच्वंगु सरकारं छुं गथे जुयाः संक्रमण न्यना वन धाःसा उकियात पनेत गज्याःगु भूमिका म्हिती धइगु आशंका जनताया दथुइ ब्वलनाच्वंगु दु ।
हाकनं नेपाल सरकार चिनिया सरकार थें माःगु इलय् माःगु निर्णय याये फुगु अवस्थाय् नं मदु । चीनं थःगु देशय् संक्रमण न्यनेधुंकाः छवाःया दुने द्वःछि श्ययाया अस्पताल हे तयार यात तर, नेपाल सरकारं चीनय् ब्वनाच्वंपिं नेपाःमियात उद्धार यानाः नेपालय् आइसोलेसनय् तयेत नं ताः ई काल ।
थुकिं हे क्यं कि छुं गथे जुयाः नेपालय् संक्रमण न्यनावन धाःसा उकियात समाधान यायेत नेपाःयात तसकं समस्या जुइफु । मेगु खँ स्वनिगलय् गुलि जनता च्वनेत उचित धकाः आः वयाः बिचाः यायेमाःगु खनेदु । चिकीचाकूगु थासय् गुलि मनूत च्वनेत लायक जू धकाः आः वयाः अध्ययन यायेमाःगु आवश्यकता नं थन जुयाच्वंगु दु ।
गुगुं नं कथंया भाइरस संक्रमण जुल धाःसा उकिं लाकीगु लिच्वः व उकियात पनेत माःगु आवश्यक जनशक्ति व्यवस्थापन यायेफइगु अवस्था मदु । अथे जुयाः आः स्वनिगःया प्यंगू थासय् दयेकेगु धयाच्वंगु स्मार्ट सिटी दयेके न्ह्यः थ्व खँयात कयाः नं विचाः यायेमाःगु अवस्था दु ।
स्वनिगःया स्वंगू जिल्लाय् दयेकेगु धाःगु स्मार्ट सिटी दयेकेगु ज्या जुल धाःसा थुकिं स्वनिगलय् थप ४० लाख जनसंख्या अप्वइगु खँ वयाच्वंगु दु । थपीचाकूगु थासय् थुकथं जनसंख्या अप्वइगु योजना छुं नंकथं उचित मजू धकाः धायेगु यानाच्वंगु दु । अथे जुयाः आः स्वनिगलय् अज्याःगु छुं नं योजना दयेके न्ह्यः आः वयाच्वंगु संक्रमण व भविष्यय् वयेफइगु थुकथंया हे संक्रमणयात व्यवस्थापन यायेफइकथं योजना दयेकेगु उचित जुइ ।
लखौं मनू च्वनाच्वंगु थासय् कोरोना भाइरस न्यनावन धाःसां उकिं बामलाःगु लिच्वः लाकीगु खँय् गम्भीर ध्यान बीमाःगु थौंया आवश्यकता खः । स्वनिगः अथें नं म्वःम्वः मनूत जुइगु शहर कथं विकास जुयाच्वंगु दु । अले गुलि नं सतकय् वयेवने याइगु खः । उकी सम्भावित संक्रमणया कारणं आपालं मनूया ज्यान वनेफु ।
थुखेपाखे गम्भीर जुयाः न्ह्याः वने माःगु आवश्यकता थौं जुयाच्वंगु दु । थौं कोरोना भाइरस संक्रमणया कारणं येँया वासः पसलय् मास्क तकं न्याये मदुगु अवस्था दु । चीनय् भाइरस संक्रमण जूगुलिं नेपालय् मास्क न्याये मदुगु धइगु कमजोरी सुयागु धइगु खँ उलाबिउ । मेखे कोरोना भाइरस गुलि ग्यानापु, व स्वयां नं उकियात कयाः जुयाच्वंगु प्रचार झन जक ग्यानापुक जुयाच्वंगु दु ।
विशेष यानाः सामाजिक संजालय् कोरोना सम्बन्धी नेपाःमि संक्रमण जुल धकाः गुलि बय्बय् जुयाच्वंगु दु । उकियात नं नियन्त्रण यायेमाःगु आवश्यकता थौं जुयाच्वंगु दु । कोरोना भाइरस ग्यानापु थुकी निगू मत मदु, तर कोराना भाइरसयात कयाः माक्वः स्वयां अप्वः जुयाच्वंगु प्रचारं जनतायात थप त्रसित याना बिउगु दु । थ्व दकलय् ग्यानापूगु खँ खः । उकिं थुकियात नं नियन्त्रण यायेमाःगु आवश्यकता थौं जुयाच्वंगु दु ।
LEAVE YOUR COMMENTS