होस यायेमाः !

‘छिगु कार्यकालय् देशं गुलि विकास यात ?’ पत्रकारतय्सं प्रधानमन्त्रीयात न्ह्यसः तइ । प्रधानमन्त्रीया नं शानदार लिसः जुइ । ‘प्रशस्त विकास जूगु दु। छिकपिंसं लँय् फ्वनाः नइपिं सुं खं ला? खनी मखु। थुकिं प्रमाणित जुइ देशय् गरिबी निर्मूल जूगु दु। जनस्तरय् आर्थिक विकास च्वन्ह्याःगु दु।’ लँय् फ्वनाः नइपिं मदु धइगु दृष्टान्त बियाः प्रधानमन्त्रीं देशय् सन्तोषप्रद आर्थिक उन्नति जूगु दावा याइ । न्ह्यसः दनी । प्रधानमन्त्रीया थ्व दावा सत्य खः ला ? देशय् धाथें गरिबी अन्त्य जुल ला ? सुथय् बहनी नयेगु समस्यां सुं हे उत्पीडनय् लाःगु मदुला ? लिसलय् धायेफु। प्रधानमन्त्रीया दावा सरासर झूठ खः । थौं सहरी क्षेत्रय् फ्वगिंत खने मदुगु स्वयां देशय् नये मखंपिं मदयाः मखु। सरकारं फ्वनीपिंत जबर्जस्ती सहरय् तये मबिउगुलिं जक खः । विदेशी पर्यटकतय् न्ह्यःने देय्या दयनीय आर्थिक अवस्था खने दइ धकाः फ्वगिंतय्त सहरं ख्याना छ्वःगु खः । थ्व आर्थिक सुधारया सूचक मखु ।

पिने फ्वनाः नइपिं सहरय् मदयेवं हे देय् आर्थिक दृष्टिं विकासया चरमचुलीइ थ्यन धकाः गर्व यायेगु फजुल खः । फुस्लुगु धाक जक जुइ । लँय् लँय् फ्वनाः नइपिं मनूतय् आर्थिक अवस्था अथें हे बांलाइ, च्वन्ह्याइ । धाये फइमखु। समाजय् यक्व आर्थिक जरजरावस्थां ग्रस्तपिं दुःखी जनता दु। गुम्हेसियां थःगु श्रम यानाः नं छछाः नयेत मुस्किल । पिने बजारय् फ्वगिंत मदुगुलिं थःगु शासनकालया तःधंगु सफलता खंकीम्ह प्रधानमन्त्रीं थःगु हिचःति हायेकाः नं छप्ये नयेत कठिन जीवन भोगे याये बाध्य जूपिं फ्वगिंत मदु धइगु तर्क बियां जक देशय् आर्थिक उन्नति धुमधाम जुल धकाः गर्जन याना जुइगु उचित जुइमखु ।

ततःधंपिं धनधनाढ्य, व्यापारी, अकुत सम्पत्तिया मालिक, नेतातय् उच्च जीवनशैलीं देय्या सही आर्थिक स्थितियात छर्ल· याइमखु। थौं देशय् निम्न आय दुपिंत जक मखु साधारण मध्यमवर्गयात नं साधारण जीवन हनेत थाकुया वयाच्वंगु दु। थःगु न्यूनतम आय आर्जनं साधारण जीवन हनेत गाःसा कमसेकम सन्तोष जुइपिंत मन तये थाय् दइ । तर कमजोर आय आर्जनं जक मखु, अनियन्त्रित बजारं यानाः नं सर्वसाधारणया जीवन झन मुस्किल जुया वयाच्वंगु दु। सम्पूर्ण बजाः विचौलियातय् ल्हाती । थौं आर्थिक अवस्था कठिन जूगु आय आर्जनया कमिं जक मखु, उपभोक्तातय्त प्यखेरं लूट यायेगु गुगु माफियातन्त्र बजारय् ब्वलना वयाच्वंगु दु। उकिं सर्वसाधारणया आर्थिक अवस्थाय् झन थाकुका बिउगु दु ।

पिने फ्वनाः नइपिं सहरय् मदयेवं हे देय् आर्थिक दृष्टिं विकासया चरमचुलीइ थ्यन धकाः गर्व यायेगु फजुल खः । फुस्लुगु धाक जक जुइ । लँय् लँय्फ्व नाः नइपिं मनूतय् आर्थिक अवस्था अथें हे बांलाइ, च्वन्ह्याइ । धाये फइमखु ।

थौं कोरोनाया संक्रमणया कारणं देशय् भयावह स्थिति सृजना जुयाच्वंगु दु। थथे हे अनियन्त्रित धंगं कोरोना न्यना वन धाःसा थ्व खतरा गन वनाः दी ? सुनां धाये फुगु स्थिति मदु। देय् कोरोनाया प्रकोपं गबलय् मुक्त जुइ । अनिश्चित ! कोरोना मूलत खतरनाक ल्वय् खः । ल्वय्कथं थ्वलिसे ल्वायेगु चुनौति तःधंगु जुयाबी । तर कोरोनां हइगु आर्थिक, सामाजिक, सांस्कृतिक खतरा, दुरावस्थाया विचाः यायेबलय्, देय् ग्यानापुगु भविष्यय् वनी ला धइगु आशंका, त्रास लुया वइ । कोरोनाया संक्रमण वःगु खुलां मयायेधुंकल । देशय् सरकारी, निजीस्तरया आर्थिक गतिविधि फुक्कं ठप्प । देय्या आर्थिक आर्जनया मेरुदण्ड जुयाच्वंगु पर्यटन ख्यः नं उजाड जुइ । मनूतय्के दुगु, फुगुलिं थौंतक ला धाने यानाच्वन । तर थथे हे जूसा साधारण मनूतय्सं कन्हय् म्वायेगु लागिं लूट यायेमाःगु न्हि नं वयेफु। शंका याना हइ ।

प्रमया शायद राजनीतिक तन्ता अप्वः दुगुलिं ला, कोरोनाया कारणं देश व जनतां न्हियान्हिथं फया च्वनेमाःगु कठिनाइप्रति चिउताः तःगु खनेमदु। बजारय् दैनिक उपभोगया वस्तुतय् भाः लाक्वपाक्व जुयाच्वंगु दु। मिखां न्ह्याये मदयेक हे थहां वनाच्वंगु दु। थथे हे बजाः भाःप्रति नियन्त्रण मतःगु खण्डय् सामान्य मनूतय् छछाः जा नयेत नं धौधौ जुइफु। लँय् लँय् फ्वगिंत मदुसां, छेँय् छेँय् फ्वगिंतसें जाइ । प्रधानमन्त्रीं अले थःगु कार्यकालया विकासया वर्णन गुकथं याइगु जुइ ?

थौंया भयावह स्थितियात यथोचित कःघाये माःगु जिम्मेवारी जक मखु, कोरोनाया संक्रमणं निकट भविष्यय् हइगु संकटया विषयय् नं सरकारं इलय् हे अध्ययन विश्लेषण याकेमाः । वइगु विघ्न बाधातय् गुकथं व्यवस्थापन यायेगु? उकिया नं आः हे तर्जुमा यायेमाः ।

विपद व्यवस्थापनया विचाः यायेमाः । कोरोनाया लिच्वः वर्तमानय् जक सीमित जुइमखु। थ्वया खतरां भविष्यय् सम्पूर्ण ख्यःयात शिथिल याना बीगु सम्भावना दु। उकिं सरकारं सम्भावित दुर्दिनप्रति आः हे विवेकशील जुइमाः । मखुसा प्रधानमन्त्रीं फ्वनाः नइपिं फ्वगिंत गनं मदु। देशं आर्थिक उन्नति यायेधुंकल धयां जक छुं अर्थ दइमखु। स्वयं दे हे कंगाल स्थितिइ लायेफु। होस यायेमाः ।