विश्वास याये ……. !

थौंकन्हय् । सामाजिक संजाल तसकं हे सक्रिय । अधिकांश मनूतय् ल्हाती मोबाइल दइ । मोबाइलमार्फत सामाजिक संजालय् दुहां वनी । अनेक खँत खनी, ब्वनी । खःगु ला, मखुगु ला । अनेक तनेक खं सामाजिक संजाल जायाच्वनी । छु पत्याः यायेगु । छु पत्याः मयायेगु । सामाजिक संजालं थौं मनूतय्त अन्योलय् लाकी । गुलिसिनं खःगु खँ नं पत्याः मयानाच्वनी । गुलिं मखुगु खँया लिउलिउ ब्वाँय् वनाच्वनी । दिग्भ्रमित याइपिनिगु निंतिं सामाजिक संजाल तसकं प्रभावकारी मञ्च जुयाबी ।

मनूतय् निर्णयात्मक पक्षयात सामाजिक संजालं थःगु बसय् कयाः प्याखं हुइका च्वनी । अथे धकाः सामाजिक संजालय् सकलें मखुगु खँ जक वइ । दइ । धयागु खँ मखु । खःगु मखुगु खँत ल्वाकःबुकः जुयाः वये फइगु सम्भावना दुगुलिं सामाजिक संजालया खँ ग्रहण याये न्ह्यः बिचाः यायेमाः । होस यायेमाः ।

हालय् । मन्त्रीमण्डलय् दुम्ह छम्ह जक नेवाः राज्यमन्त्रीया धापू सामाजिक संजालय् खना । ब्वना । ‘नेवाःत राजनीतिइ वये माल ।’ ब्वनागु धापू सुनानं वय्कःया नामय् सामाजिक संजालय् तया बिउगु मखु । वय्कःया हे खुलासा खः धइगु विश्वासं थःगु मनय् लूगु खँत न्ह्यथनेगु स्वये ।

उम्ह नेवाः राज्यमन्त्रीजुं ‘नेवाःतय्सं राजनीति यायेमाल’ धाःगु धापू तसकं हे सत्य व मार्मिक खः । तर नेपाःया राजनीतिक ख्यलय् थौं नेवाः राजनीतिज्ञत नेवाःतय् प्रतिनिधि पात्रकथं दयाः नं उकिं देय्या राष्ट्रिय राजनीतिकस्तरय् छुं आभास मदुगु स्थिति दु । बल बलं छम्ह नेवाः मन्त्री खनेदइ । व नं मन्त्रीस्तरय् मखु । थौंया राष्ट्रिय राजनीतिइ सरकार दुने नश्लवादया हावी जुयाः समावेशी मजूगु पीडाबोधं यानाः हे शायद नेवाःत राजनीतिइ वयेमाल धकाः मन्त्रीजुं नेवाःतय्त जागृत यायेत स्वःगु खः ला ? तर । वास्तविकता । राजनीतिइ वये माल धइगु जक मखु ।

राजनीतिइ वयाः प्यादा जक जुयाः भूमिका निर्वाह यायेगु खःसा उकिया छुंमू दइमखु । राजनीतिइ छम्ह शक्ति जुयाः नं लुइ फुसा जक प्रतिनिधित्वया सार्थकता दइ । अन्यथा दलीय ह्वीपया फसं पुइका यंकीगु लप्ते थें जक जुइ । दु ला दु धकाः मन तयेत जक नेवाः राजनीति दयां छु याये ? ल्हाः–तुति चिनातःगु । नेवाः मन्त्रीजुं नेवाःत राजनीतिइ वयेमाल धइगुया अर्थ वय्कलं गज्याःगु राजनीति तागत ज्वनाः वयेमाःगु खः ? उकिया नं व्याख्या यायेमाः ।

नेवाः मन्त्रीजुं छक्वःला थःगु थासं राजीनामा बियाः थः नेता वामदेवयात चुनावय् ल्वाकेगु निर्णय यायेधुंकूगु खः । खैर अबलय् थःगु थाय् खाली याये म्वाःला वन । नत्रसा वय्क थौं गथे यानाः मन्त्री जुइगु जुइ ! नेवाःतय्सं थौं छम्ह मन्त्री नं काये मखनीगु जुइ । विडम्बना । खतुं नेवाःत थौं नं राजनीतिइ मदुगु मखु । तन मन बियाः जीवन अर्पण यानाच्वंपिं त्यागी नेतात दु । समस्या त्यागी नेवाः नेतातय् अभाव मखु । दुर्दसा खः वर्तमान राजनीतिक शक्ति केन्द्रया अनुदार नश्लवादी प्रवृत्ति । नेता अष्टलक्ष्मीया राजनीतिक त्याग चानचुन मखु । प्रदेशया नां ‘बागमति’ तये मजिउ धयाच्वंपिं नेवाः नेतात शासक दलय् मदुगु मखु । तर वय्कःपिं दक्व फुक्कं झूल पिनेया पत्तित थें जक । थज्याःगु राजनीतिक दशा फयेत जक नेवाःत राजनीतिइ कुहां वयेगु खःसा ‘नेवाःत राजनीतिइ कुहां वये माल’ धइगु नेवाः मन्त्रीजुया आह्वानया छु अर्थ दइ ? विचारणीय खँ जुइ ।

थौं स्वनिगःया अप्वःथें स्थानीय तहया नगर प्रमुख नेवाःत खः । नगर प्रमुख धायेबलय् स्थानीय शासनया प्रमुख । तर स्वनिगःवासीत थौं थःगु भाषा, कला, संस्कृतिया अस्तित्व, पहिचानया निंतिं भयभीत, त्रसित जुयाच्वंगु दु । स्वनिगःयात थःथःगु स्वार्थया निंतिं छ्यलाः स्वनिगःया अस्तित्वयात हे तोडमोड यायेत स्वइपिं थौं सक्रिय । स्वनिगःया नेवाः मेयरतसें थौं स्वनिगःयात थःगु पहिचानयात जीवन्त यायेगु खँय् तुति खाकूगु खण्डय् स्वनिगलय् नेवाः राजनीतिया छुं अर्थ दइमखु । सपेराया धुनय् प्याखं हुलीपिं सर्पत थें जक जुइ । राजनीतिइ दुहां वनेगु औपचारिकता, ब्वसा जक जुयां छु याये ! निर्णायक भूमिका नं राजनीति दुने म्हिते दयेमाः । फयेमाः ।

थौं नेवाः राज्यमन्त्री शहरी विकास मन्त्री नं खः । वय्कःया ब्वहलय् नं देय्या कला, संस्कृति, सम्पदा, परम्परा ल्यंकेगु जिम्मेवारी दु । नेवाः संस्कृति, कला, सम्पदाया खँ ल्हायेबलय् साम्प्रदायिक धाइ, जुइ धइगु त्रासं लिचिले मजिउ । देय्या विविध जातजातिया कला, संस्कृति, सम्पदाया संरक्षण यायेगु राष्ट्रिय, मानवीय दृष्टिकोणं नं न्यायोचित जुइ । कर्तव्य खः । नेवाःत राजनीतिइ वयेमाल । नेवाः राज्यमन्त्रीया थ्व इनाप नेवाःतय् हुल खाकेगु दृष्टिं जक जुइ मजिउ । समानता, न्यायया निंतिं प्रभावित याये मफुगु हुलया निर्णायक भूमिका छुं दइमखु । चेसया सिपाइँ थें जक जुइ । नेवाः मन्त्रीजुया आह्वानया आशय जरुर नं चेसया सिपाइँजुइत मखु जुइ । विश्वास याये ।

सम्बन्धित बुखँ

LEAVE YOUR COMMENTS