सुखी जुइगु लँपु

सुखं जीवन हनेगु व सुखी जुइगु इच्छा सकसियां दइ । थः जक मखु, थः सन्तानया नं सुखया आशा याइ । सुख प्राप्तिया लागिं कर्म याइ । थः थःगु संस्कार कथं धर्म याइ । तर सुख प्राप्त गनं जुइ ? गुकथंया कर्मं हित जुइ ? थ्व खँ थुइमखु । सुखया कामनां याःगु लिच्वलं दुःख जुइ । सुखी जुयेत सुख प्राप्त यायेत गुकथंया लँपु छ्यलेमाः धइगु खँ तथागत बुद्धं कनाबिज्याःगु दु ।

थुगु खँ तथागतं उज्ज्वय ब्राम्हणयात धयाबिज्याःगु खः । थुगु जीवन सुखी यायेत याउँक जीवन हनेत प्यंगू कथंया ज्याय् सचेत जुइमाः । जीवन हनेत शिल्प सयेके माल । शिल्पय् दक्ष जुल । बांलाक लजगाः यातकि जीवन सुखी जुइ । उकिं तथागतं धयाबिज्याःगु दु । कुलपुत्रं कृषि कर्म यायेमाः । ब्यापार यायेमाः ।

थःगु हे ज्याखँ यायेमाः । जुजुया नोकरी यायेमाः । मेगु छुं कथंया शिल्पकार जुयेमाः । उगु ज्याय् कुलपुत्र सक्षम जुइ । क्रियाशील जुइ । थःम्हं न्हूगु उपाय छ्यली । निरीक्षण परीक्षण याइ । ज्याखँ यायेत सक्षम जुइ । उम्ह कुलपुत्रं सुख प्राप्त याइ ।सम्पत्ति कमे यानां जक मगाः । धाये लजगाः जक बांलाक यानां मजिउ । उकिं वःगु लबः सुरक्षित नं यायेमाः ।

उकिं तथागतं धयाबिज्याःगु दु, धन मुनेत कुलपुत्रं थःगु हिचःति हायेकी । सक्षम जुइ । उगु सम्पत्तिया रक्षा नं याइ । उगु सम्पत्ति जुजुं हरण मयायेमाः । खुं खुया मयंकेमाः । लः व मि पाखें बिनाश मजुइमाः धकाः सचेत जुइमाः । सुखी जुइत, सुखं म्वायेत सदां कल्याण मित्रया संगत यायेमाः । कल्याण मित्रया बारे तथागतं थथे धयाबिज्यात ।

गुगु गामय् वा निगमय् कुलपुत्र च्वनी । उगु गांया गृहपति पुत्र जुयेमाः । ल्यासे ल्याय्म्ह जुयेमाः । बुराबुरी जुइमाः । उपिं प्रज्ञा, श्रद्धा, शील व त्यागं सम्पन्न जुइ । सुनां इपिं नापं खँल्हाबल्हा याइ । नापं च्वनी । सत्संगत याइ । इपिं नं श्रद्धा, प्रज्ञा व शील सम्पन्न जुइ । त्याग भावना ब्वलनी । थुकथं कल्याण मित्रया संगतं सदां सुख पप्त जुइ ।

थन आय ब्ययया ल्याचाः नं यायेमाः । छतका ममे याइ । वं सछि खर्च याये मजिउ । थथे यातकि छन्हु न्ह्यइपुसे च्वनी । सुखी जूथें ताइ । तर लिपा थुकिं दुःख ब्वलनी । आयब्यय थुइका समजीविका यायेमाःगु खँय् तथागतं थथे कनाबिज्याःगु दु । कुलपुत्रं सदां अपब्ययया ल्याःचाः तयेमाः । थःगु ब्यय स्वयां आय अप्वयेकेमाः ।

गथे तराजुइ सामान लनी । अबलय् गुगुपाखे आपा दत । गुगुपाखे म्हो जुल धइगु खँ सी दइ । अथे कुलपुत्रं थःगु भोगया आय ब्यय थुइकेमाः । आय ब्यय मिले यानाः जीविका यायेमाः । आपा नं खर्च मखु । आपा आम्दानी नं मखु । थःम्हं थःगु आय ब्यय कथं ब्यवहार मयातकि लोकजनं निन्दा याइ ।

भोग सम्पत्ति ल्यंकाः तये अःपू मजू । गन माःगु स्वयाः आपा सम्पत्ति दइ, अन चित्त अस्थिर जुइ । म्वाःमदुगु ज्याखं याइ । थुकिं हिचःतिं मुनातःगु सम्पत्ति नाश जुइ । तथागतं भोग सम्पत्तिं पिहां वनेगु प्यंगू लँपु धयाबिज्याःगु दु । वसपोलं धयाबिज्याःगु दु, छगू पुखू । उकि प्यंगू प्वाः (मुहान) दु । यदि सुनानं उकिया लः दुहां वइगु प्वाः तिनाः बी । थुगु ई वा वइगु ई नं मखु । थुकिं यानाः पुखूया लः सुना वनी ।

कुल जनं थःगु हि चःति हायेकाः सम्पत्ति मुनी । उकियात भय मवयेक तइ । कल्याणमित्रया संगत नं याइ । आय ब्ययया बांलाक ल्याःचाः तइ । थुकथं व्यवहार याःम्ह कुलपुत्र सुखी जुइ । वया जीवन आनन्दित जुइ । भोग सम्पत्ति ल्यंकाः तये अःपू मजू । गन माःगु स्वयाः आपा सम्पत्ति दइ, अन चित्त अस्थिर जुइ । म्वाःमदुगु ज्याखं याइ ।

थुकिं हिचःतिं मुनातःगु सम्पत्ति नाश जुइ । तथागतं भोग सम्पत्तिं पिहां वनेगु प्यंगू लँपु धयाबिज्याःगु दु । वसपोलं धयाबिज्याःगु दु, छगू पुखू । उकि प्यंगू प्वाः (मुहान) दु । यदि सुनानं उकिया लः दुहाँ वइगु प्वाः तिनाः बी । थुगु ई वा वइगु ई नं मखु । थुकिं यानाः पुखूया लः सुना वनी । अथेहे वा मवइगु ई । उगु पुखूया लः पिहां वनीगु प्वाः तिना वइ ।

उबलें पुखूया लः सुना वनीमखु । मनुखं प्यंगू कथं थःगु भोग सम्पत्ति फुकी । स्त्री (मिसा) पाखें, सुरापान यानाः, तास म्हिताः व पापी पासाया संगत याना । थौंया इलय् जक मखु । सम्पत्ति विनाश यायेगु ज्या कालान्तरय् न्ह्यःनिसें जू । थन राजगृह नगरया घटना न्ह्यब्वये ।
राजगृह नगरय् महाधन श्रेष्ठी सेठ दु । व महाधनी महाभोगी ।

वया काय् छम्ह दु । वयात अतिकं माया याः । थःयाके आपालं सम्पत्ति दु । उकिं काय्यातम्हेसित बियां मस्यं । छुं कथंया शिल्प नं मस्यं । वं विचाः यात । जिमि काय्या लागिं न्हिं द्वःछि दां खर्च याःसां गाः । वयात शारीरिक व मानसिक कष्ट बीमखु । याउँक हे तये । छुं कथंया शिल्प स्यनेमखु । काय् ल्याय्म्ह जुल । वयात ब्याहा याना बिल ।

अतिकं बांलाःम्ह मिसा । मिसाया रूप बांलाः । तर धर्म चेतना मदु । कामबिलासी । काय्म्ह कलाःया भोगबिलासय् तःक्यन । भ्याः मचा हे धर्म कर्म मयाः । श्रवण ब्राम्हणीपिनि आदर सत्कार नं मयाः । धुर्ततय् संगत याःजुल । इपिं पञ्चकाम विषयसं आसक्त जुल । मोहित जुल ।
छुं ई लिपा मांबौपिं मन्त । इमित झन् याउँसे च्वन ।

इमिसं प्याखंम्वःत सःतल । प्याखं हुइकल । द्वलंद्वः दां इना बिल । दुगु सम्पत्ति फुकल । थुकि यानाः इपिं दरिद्र जुल । नये त्वने तकं मखन । जीवन हने तसकं थाकुल । नयेत (ऋण) त्यासा कायेमाल । छन्हु निन्हु यायां त्यासा अप्वया वल । साहुं ज्वँ वल । त्यासा पुलेत छुं बुँ तकं मिये माल । थःगु सम्पत्ति दक्वं फुत । इपिं फल्चाबास जुल ।

छन्हु काय्म्हं खुँ नाप लात । खुं वयात धाल, छं छाये थथे दुःख सिया च्वनागु ? छ ल्याय्म्ह तिनि । बल शक्ति नं दु । ल्हाः तुति मदुम्ह थें छाय् च्वना च्वनेगु ? वा जिपिं थें थन खू वने । खुया याउँक जीवन हने ।खुया कायेगु गथे याना ? वं छुं सिउगु मखु । खुं वयात थःम्हेसियां धाधाथें याः धकाः ब्वना यंकल । खुँतय् नापं व नं खुँ जुल ।

छन्हु वयात पाः तल । खुँत अंग तछ्याना छेँय् दुहां वन । न्ह्यःने व पाः च्वनाच्वन । वया ज्या सुं वःसा सः बिइगु । खुँतय्सं दुने खुया काल । थ्व खँ छेँ थुवालं सिल । छेँय् च्वंपिं सकलें दना वल । खुँत उग्रिंमय् अनं बिस्यु वन । तर मूर्खम्ह व अन सुम्क दनाच्वन । छेँ च्वंपिसं वयात खन । खुँ खुँ धाधां वयात ज्वन । वयात जुजुथाय् यंकल ।

जुजुं वया छ्यँ ध्यनेगु उजं बिल । जुजुया उजं कथं वयागु छ्यँ चदंक ध्यना बिल । सुनां इलय् सम्पत्ति मुनी । सम्पत्तिया रक्षा याइ । आय ब्यय कथं ब्यवहार याइ । सम्पत्ति विनाश जुइगु लँपु म्हसीकी । वं हे सुखं जीवन हनी । सुखी जुइ ।

सम्बन्धित बुखँ

LEAVE YOUR COMMENTS