निजी ख्यःयात ‘रेड कार्पेट’ लानाः लसकुस यायेमाः

येँ – उद्योग वाणिज्य तथा आपूर्ति राज्यमन्त्री मोतिलाल दुगडं निजी ख्यःया उद्योगी व्यवसायीयात व्यवसाय् संचालनया निंतिं गुलि फु उलि अप्वः सेवा सुविधा बियाः प्रवद्र्धन यायेमाःगु खँ धयादीगु दु । राज्यमत्री दुगडं थःगु कार्यकक्षय् राससलिसे खँ ल्हासें राजनीतिक स्थायित्व पिा देय् समृद्धिया दिशाय् न्ह्याः वनाच्वंगु इलय् निजी ख्यःयात सरकारं ‘रेड कार्पेट’ लायाः लगानी यायेत लसकुस यायेमाःगु बिचाः तयादीगु खः ।

वय्कलं धयादीगु दु, ‘पुँजी लगानीया निंतिं बांलाःगु वातावरण तयार यायेमाः । उद्योग व्यवसाय च्वन्ह्यात धाःसा तःधंगु ल्याखय् रोजगारी सिर्जना जुइ व रोजगारी सिर्जना जुलकि गरिबी न्यूनिकरण यायेफइ । लिसें रेमिट्यान्सया भरय् चले जुयाच्वंगु अर्थतन्त्रयात नं आत्मनिर्भर यायेफइ ।’

राज्यमन्त्री दुगडं उद्योग मन्त्रालय निजी ख्यःया अभिभावक जूगु व थुकिं उद्योग व्यवसाय संचालनय् अनुमति बीगु, प्रवद्र्धन यायेगु, संरक्षण यायेगु, बजार नियमन व अनुगमन यायेगुलिसें शान्ति सुरक्षा यायेगु जिम्मेवारी दुगु खँ धयादिल । थुपिं ज्याया निंतिं सरकारं उद्योगमैत्री वातावरण दयेकेत आवश्यक सहजीकरण यायेगु व उद्योगी व्यवसायीया मेमेगु मन्त्रालय लिसे सम्बन्धित ज्याया निंतिं समन्वयकारी भूमिका म्हितेगु खँ धयादिल ।

जुडिबुटी, खानी व खनिज उत्खननय् बः बीगु लिसें गाक्क मत उत्पादन यानाः निर्यात यानाः व्यापार घाटा म्हो यायेगु कुतः यायेगु प्रतिवद्धता

अप्वया वनाच्वंगु वैदेशिक व्यापार घाटा म्हो यायेत स्वदेशी उत्पादन व उत्पादकत्व अप्वयेका निर्यातमूलक उत्पादनयात प्रवद्र्धन यायेगु खँ न्ह्यथँसें राज्यमन्त्री दुगडं न्हय्गुलिं प्रदेशय् विशेष आर्थिक क्षेत्र संचालन यायेगु अपरिहार्य दुगु खँय् बः बियादिल । जुडिबुटी, खानी व खनिज उत्खननय् बः बीगु लिसें गाक्क मत उत्पादन यानाः निर्यात यानाः व्यापार घाटा म्हो यायेगु कुतः यायेगु प्रतिवद्धता नं प्वंकादिल ।

देय्या व्यापार व्यवसाय क्षेत्रय् वैदेशिक लगानी अप्वयेकेत नीतिगत सुधार यायेगु, एकद्वार प्रणालीपाखें संचालन अनुमति लगायत उद्योग व्यवसायया आवश्यक फुक्कं ज्या यायेमाःगु व श्रमसमस्या समाधान यायेत सहजीकरण यायेमाःगु खँय् बः बियादिसें राज्यमन्त्री दुगडं बहुआयामिक प्रतिफल बीगु व अपार सम्भावना जूगु कृषि, पर्यटन, वन, खानी व जलविद्युत लगायत क्षेत्रय् लगानी अप्वयेकेमाःगु व व्यवसाय संचालनया निंतिं फक्व कुतः यायेगु खँ नं धयादिल ।

लिसें रुग्न सार्वजनिक उद्योग संचालन सम्बन्धय् वय्कलं आवश्यक अध्ययन यानाः न्ह्याः वनेगु व तत्काल बांलाःगु प्रतिफल बीगु व तःधंगु लगानी आवश्यक मजुइगु उद्योगयात सरकारं संचालन यायेगु व मेमेगु हकय् थप अध्ययन यानाः गुलिखे अज्याःगु उद्योग निजी क्षेत्रयात नं संचालनया निंतिं बीफइगु बिचाः नं तयादिल ।

सम्बन्धित बुखँ

LEAVE YOUR COMMENTS