सम्झौता लिपा नं मलेसिया वनेगु लँ मचाःनि

येँ – मलेसिया लिसे न्हूगु श्रम सम्झौता जूगु नीन्हु दयेधुंकाः नं न्हापा हे भिसा कयातयेधुंकूपिं ज्यामित तकं आःतक उखे वने मखंनिगु खँ वैदेशिक रोजगार व्यवसायीतय्सं धाःगु दु । सरकारं वंगु न्याला न्ह्यवनिसें मलेसियाय् ज्यामि छ्वयेगु प्रतिबन्ध तयातःगु खः ।

वैदेशिक रोजगार विभागया अधिकारीतय्सं सम्झौताया प्रक्रियागत कार्यान्वयन विधि तयार यायेत गठन यानातःगु पुचलं याकनं हे ज्या सिधयेकीगु व व लिपा मलेसिया वनेगु लँ चालीगु खँ बिबिसीयात धाःगु दु । वैदेशिक रोजगारया निंतिं मलेसिया वनीपिं ज्यामित ठगे जुइका च्वनेमाःगु व उचित सेवा सुविधा नं मदु धासें सरकारं मलेसियाय् ज्यामित छ्वयेगु वंगु जेठ निसें दिकातःगु खः ।

थ्व लिपा निगू देय्या सरकार दथुइ तःक्वः सहलह लिपा कात्तिक १२ गते न्हूगु श्रम सम्झौता जूगु खः । तर सम्झौता जूगु नीन्हु दयेधुंकाः नं ज्यामित छ्वयेगु लँ धाःसा चाःगु मदुनि । सम्झौता जुइ न्ह्यव हे भिसा कयाः मलेसिया वनेत पिया च्वंगुत उखे छ्वयेगु प्रक्रिया याकनं सुरु जुइगु खँ वैदेशिक रोजगार व्यवसायी महासंघया अध्यक्ष रोहन गुरुङ्गं धयादीगु दु ।

थथे भिसा कयाः नं वने मखनाच्वंपिं थ्यंमथ्यं झिंनिद्वः ज्यामित दुगु खँ धाःगु दु । आः सरकारं मलेसिया लिसे जूगु सम्झौता कार्यान्वयन विधि तयार यायेत पुचः गठन यानातःगु दु । थ्व पुचलं ज्या क्वचायेधुंकाः जक ज्यामित मलेसिया वनेगु लँ चालीगु खँ सरकारं धाःगु दु ।
श्रम रोजगार तथा सामाजिक सुरक्षा मन्त्रालयया प्रवक्ता नारायण रेग्मीं बिबिसीलिसे खँ ल्हासें धयादीगु दु, ‘वय्कःपिंसं सिफारिस याये धुंकाः मन्त्रालयं ज्यामितय्त उखे छ्वयेगु ल्या लिबाकी मखु ।

छुं प्राविधिक समस्या निगुलिं देय्या पुचःयाके दु जुइमाः । हथासं निर्णय यानाः कमजोरी क्यनेगु स्वयां गाक्क गृहकार्य यानाः न्ह्याः वंसा हे बांलाः जुइ ।’श्रम सम्झौता लिपा निगुलिं देय्या पुचः दथुइ सामान्य सहमति जुयाः कार्यान्वयन विधि नं तयारी जुइधुंकूगु खँ धाःगु दु । तर छुं छुं विषयत मलेसियाया संसद व मन्त्रिपरिषदपाखें पारित याये ल्यं दनिगुलिं सम्झौता कार्यान्वयन ज्या दिनाच्वंगु खँ नेपाःया सरकारी अधिकारीतय्सं धाःगु दु । सरकारी अधिकारीतय् कथं आः प्रक्रिया पूवंके छुं मखुसां नं थप लछि मालीफु ।