
येँ(नेपालभाषा टाइम्स)अतिरिक्त ईया ११२ औं मिनेटय् लाउटारो मार्टिनेजं याःगु छगू जक निर्णायक गोलया ग्वाहालिं अर्जेन्टिनां कीर्तिमानी कोपा अमेरिकाया उपाधी त्याकेत ताःलाःगु दु । थौं सुथय् जूगु कासाय् साविकया विश्व विजेता अर्जेन्टिनां कोलम्बियायात १–० गोलं बुकाः दक्षिण अमेरिकाया हे दकलय् तःधंगु कोपा अमेरिका फुटबलया कीर्तिमानी झिंखुक्वःखुसी उपाधी त्याकूगु खः ।
अमेरिकाया फ्लोरिडा राज्यया मियामिस्थित हार्ड रक रंगशालाय् जूगु निर्धारित ९० मिनेटया कासाय् निगुलिं टिमं गोल याये मफयेवं कासा अतिरिक्त ईपाखे वंगु खः । निर्धारित ईया निगूगु हाफय् अर्जेन्टिनाया छगू गोल याःगु खः । तर उगु गोल अफसाइड जूगु धासें रेफ्रीं मान्यता मबिल ।
निगूगु हाफया ६८ औं मिनेटय् नियमित कप्तान लियोनल मेसी चोटया कारणं मैदानं पिहां वनेमाःगु खः । ६८ औं मिनेटय् आकाझाकां तुतिइ समस्या वयेवं मेसी मैदानं पिहां वंगु खः । उगु इलय् मेसी तसकं भावुक जुयाः मिखां ख्वबि हायेकाः मैदानं पिहां वंगु खःसा प्लेयर बक्सय् नं ताः ई तक ख्वया हे च्वंगु खः ।
निर्धारित ईया न्हापांगु हाफया कासा नं गोलरहित बराबरीइ क्वचायेवं निगूगु हाफया ११२ औं मिनेटय् लाउटारों जियोभानी लो सोल्सोया पासय् डी बक्स पिनें याकःचां यंकाः आकर्षक ढंगं बलयात पोष्ट दिशा बिउगु खः । लाउटारोया थुगु हे गोलया ग्वाहालिं अर्जेन्टिनां ४८ क्वःगु संस्करणया कोपा अमेरिकाया उपाधी त्याकेत ताःलाःगु खः ।
अर्जेन्टिनायात उपाधी त्याकेया निंतिं निर्णायक भूमिका म्हितूम्ह लाउटारो जारी कोपा अमेरिकाया हे दकलय् अप्वः गोल याःम्ह कासामि नं खः । लाउटारों जारी कासाय् न्यागू गोल याःगु दु ।
कोपा अमेरिकाया सर्वाधिक सफल अर्जेन्टिनां फाइनलय् जक स्वम्ह कासामिं कप्तानीया भूमिका म्हितूगु खः । निर्धारित ईया ६८ औं मिनेटय् मेसी मैदानं पिहां वनेवं एन्जल डि मारियां कप्तानीया भूमिकाय वःगु खःसा वयां लिपा अतिरिक्त ईया ११६ औं मिनेटय् डी मारिया नं मैदानं पिहां वनेवं ओटामेण्डींयात कप्तानीया जिम्मेवारी बिउगु खः ।
वंगु स्वदँया दुने अर्जेन्टिनां त्याकूगु थ्व स्वंगूगु तःधंगु व मुख्य उपाधी खः । सन् २०२१ य् कोपा अमेरिकाया उपाधी त्याकूगु अर्जेन्टिनां वयां दछि लिपा फिफा विश्वकप उपाधी त्याकूगु खः ।
अर्जेन्टिनां लगातार निक्वः कोपा अमेरिकाया उपाधी त्याकूगु थ्व प्यक्वःखुसी खः । सन् १९२७ व १९२९, सन् १९५७ व १०५९ व सन् १०९१ व १९९३ लगातार निक्वः उपाधी त्याकूगु अर्जेन्टिनां सन् १९४५, १९४६ व १९४७ य् लगातार स्वक्वःतक उपाधी त्याकूगु खः ।
LEAVE YOUR COMMENTS