ने. सं. ११४६ दिल्लाथ्व त्रयोदशी - माेतीलक्ष्मीया ११७ क्वःगु बुदिं

राष्ट्रिय राजमार्ग विरुद्ध तोखा नगरपालिका घेराउ

येँ (नेपालभाषा टाइम्स) – सामाखुसि निसें झोर महांकाल तक राष्ट्रिय राजमार्ग घोषणा यानाः ५० मिटरया सतक विस्तार यायेत्यंगु विरुद्ध तोखा नगरपालिका घेराउ याइगु जूगु दु ।

तोखा बचाउ एकता अभियानया ग्वसालय् थौं नगरपालिका घेराउ यायेगु ज्याझ्वः दुगु खँ समितिया दुजः समिर शाही ‘नेपालभाषा टाइम्स’ यात कनादीगु दु ।

न्हापा राष्ट्रिय राजमार्ग घोषणा मयाःगु सामाखुसि तोखा क्षेत्रय् थीथी राजनीतिक पार्टीया नेता कार्यकर्तातय्सं जग्गा प्लटिङ यायेधुंकाः राष्ट्रिय राजमार्ग घोषणा यायेगु ज्या याःगु द्वपं अभियानं बिउगु दु ।

आधिकारिक रुपय् राष्ट्रिय राजमार्ग घोषणा मजूनिगु उगु क्षेत्रय् उपत्यका विकास प्राधिकरणय् भाइकाजी तिवारी वयेवं राष्ट्रिय राजमार्ग घोषणा याकेगु कुतः जूगु खँ स्थानीय बासिन्दां धाःगु दु । उगु इलय् न्हय्गू दलया प्रस्तावय् तिवारीं राष्ट्रिय राजमार्ग घोषणा यायेगु तयारी याःगु खः ।
अभियानं सामाखुसि तोखा लागाय् ५० मिटर सतक मापदण्ड कायम जुइगु अवस्थाय् तोखाया बस्ती हे ध्वस्त जुइगुया लिसें तोखाया नेवाःतय् संस्कृति सम्पदा हे मदइगु धासें आन्दोलनया ज्याझ्वः न्ह्याकूगु खः ।

सतक विस्तार विरुद्ध स्थानीय जनतां २०७६ साल कार्तिक ६ गते सर्वोच्च अदालतय् मुद्दा तःगु खःसा उगु मुद्दाय् गुगुं नं मापदण्ड मदयेक, स्थानीय जनताया सम्पत्तिया हक अक्षुग्ण जुइगु जुयाः उपयुक्त नियम कानुन मदयेक मापदण्ड क्वःमछित आदेश बिउगु खः ।

सामाखुसि निसें तोखा झोर महांकाल तक गुगुं कथंया मापदण्ड मदु धकाः लछि न्ह्यः हे तोखा नगरपालिकां सार्वजनिक विज्ञप्ति पिथंगु खःसा आः हाकनं मापदण्ड धकाः सतकय् चिं तयेगु ज्या याःगु खँ स्थानीय जनतां धाःगु दु ।

चिं तयेगु ज्या सरकारी मखसें नगरपालिकां थः यथे चिं तयेगु ज्या याःगु धासें थौं विरोध ज्याझ्वःया लिसे नगरपालिकायात ज्ञापन पौ बीत्यंगु खः ।
नगरपालिकां राष्ट्रिय राजमार्ग अन्तर्गत लाः धकाः तोखाया आपालं जग्गाया नक्सा पास यायेगु ज्या दिकातःगु दु ।

तर स्थानीय जनतां धाःसा आः तक सरकारयापाखे स्पष्ट मापदण्ड तकं मदुगुलिं नगरपालिकां थः यथे ज्या यानाच्वंगु द्वपं बिउगु दु ।