ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

हिजाब विवाद ः– सर्वोच्च अदालतं तत्काल निर्णयया याचिका अस्वीकार

एजेन्सी- कर्नाटकय् जुयाच्वंगु हिजाब विवादया मुद्दा सर्वोच्च अदालतय् थ्यंगु दु । उच्च अदालतं बिहिवाः हिजाब विवादयात कयाः बिउगु अन्तरिम आदेशया विरुद्ध कर्नाटकया सर्वोच्च अदालतय् विवादयात कयाः तुरुन्त सुनुवाइ जुइमाःगु माग तयाः याचिका दायर जूगु खः, तर सर्वोच्च अदालत तत्काल निर्णय यायेत अस्वीकार याःगु दु । याचिकाय् अन्तरिम आदेशय् मुुस्मां मिस्तय्त भेदभाव जूगु धकाः धयातःगु दु ।

बिहिवाः उच्च अदालतया स्वम्ह न्यायाधीशया बेञ्चं थ्व मामिलाया सुनावाइ याःगु खः । अदालतं थ्व मुद्दायात कयाः सोमवाः छलफल जुइ धाःगु दु । अदालतं थ्व विवादयात कयाः मेगु आदेश मवःतले स्कुल व कलेजय् हिजाब वा छुं नं धार्मिक वसः पुनावये मदइगु निर्णय याःगु खः । विवादया कारणं बन्द जुयाच्वंगु स्कुल सोमवाः निसें चायेकत नं अदालतं आदेश बिउगु दु ।

कर्नाटकया उडुपीइ च्वंगु कलेजय् मुस्मां मिस्तय्त हिजाब पुनाः दुहां वयेत अनुमति मबिइवं शुरु जूगु थ्व विवादं धार्मिक तनाव ब्वलंकूगु दुसा मुस्मां व हिन्दु विद्यार्थीतय् दथुइ झडप नं जुइधुंकूगु दु ।