सन्दर्भ ब्याजदर लागु मयाःगु सहकारीयात कारवाही याइगु

येँ – बचत तथा ऋण सहकारी संस्थां त्यासाय् सन्दर्भ ब्याजदर (रेफरेन्स इन्ट्रेस्ट रेट) कार्यान्वयन मयाःगु धासें सरकार. सहकारीऐन २०७४ कथं कानुनी कारवाही न्ह्याकीगु जूगु दु । सरकारं साउन १९ गते निसें लागू जुइ कथं सन्दर्भ ब्याजदर निर्धारण याःगु खः । नेपालय् थ्यंमथ्यं ३५ हजार सहकारी संस्था दु ।

उकी मध्ये १३ हजार ९९७ सहकारी संस्थां बचत संकलन व कर्जा प्रवाह –बैंकिङ्ग कारोवार) याना वयाच्वंगु दु । आर्थिक कारोवार याइगु बचत तथा ऋण सहकारी संस्थां बचतकर्तातय्के तच्वयेक ब्याज असुली यानाच्वंगुलिं सरकारं सहकारी ऐन २०७४ या दफा ५१ कथं सन्दर्भ ब्याजदर निर्धारण याःगु खः ।

ऐनया दफा ४१ या उपदफा (४) कथं समितिया सिफारिसय् सहकारीया रजिस्ट्रारं सन्दर्भ ब्याजदर तोके यायेगु व्यवस्था दु । थ्व हे कथं साउन १९ गते समितिं अधिकतम १६ प्रतिशत स्वयां अप्वः ब्याज काये मदइगु कथं सन्दर्भ ब्याजदर तोके याःगु खः । ब्याज व त्यासाया अन्तर (स्प्रेड) दर धाःसा ५ प्रतिशत निधारण याःगु खः ।

नेपाल राष्ट्र बैंकं सार्वजनिक याःगु मौद्रिक नीतिइ वाणिज्य बैंकया लागि धाःसा ४.४ प्रतिशत स्प्रिडदर तोके यानातःगु दु । भूमि व्यवस्था, सहकारी तथा गरिब निवारण मन्त्रालयया सचिव सूर्यप्रसाद गौतमं बचतकर्ताया हित अःखः ज्या यात धाःसा, सन्दर्भ ब्याजदर कार्यान्वयन मयाःगु संस्था व तच्वयेक ब्याज काःगु, सेवा शुल्क काःगु सहकारी संस्थाया खारेजय् तकं यायेफुगु ऐन व्यवस्था दुगुलिं उगु हे कथं सहकारी विभागयात निर्देशन जूगु खँ धयादीगु दु ।

नेपाल बचत तथा ऋण सहकारी संघया अध्यक्ष डिबी बस्नेतं अनुगमन यायेबलय् मुक्कं ६०० संस्थां जक सन्दर्भ ब्याजदर लागू याःगु खनेदुगु खँ धयादिल । वय्कलं गुलिखे अनुगमन मजूगु संस्थां नं सन्दर्भ ब्याजदर लागू यानातःगु दुगु खँ नं धयादिल । नेपाल बचत तथा ऋण सहकारी संघं देय्न्यंकं बचत व ऋण सहकारी संस्थाया मंकाः संगठन खः ।

बस्नेतया धापुयात आधार यायेबलय् सरकारं सन्दर्भ ब्याज लागू यायेत तोके यानातःगु ईयात गणना यायेबलय् थ्यंमथ्यं सछिन्हु पूवनेधुंकाः मुक्कं ४.०२९ प्रतिशत सहकारी संस्थां जक सन्दर्भ ब्याजदर कार्यान्वयन याःगु खनेदुगु दु । संघया धापूयात आधार यायेगु खःसा ९५.०७ प्रतिशत बचत तथा ऋण सहकारी संस्थां १६ प्रतिशत स्वयां अप्वः ब्याज कयाः त्यासा काइपिं सदस्यतय्त शोषण यानाच्वंगु दु ।

सहकारी ऐन, २०७४ कथं बचतकर्तायात शोषण वा ठगी याइगु थज्याःगु प्रकृतिया संस्थायात कारवाही यायेत आलटाल जूगुलिं सहकारी संस्थाप्रति बुलुहुं विश्वास म्हो जुया वनाच्वंगु दु । लिपांगु तथ्यांक कथं नेपाःया सहकारी संस्थायाके जक न्हय्गू खर्बपुँजी बचत दुसा ६५ हजारं प्रत्यक्ष रोजगारी चूलाकाच्वंगु दु ।

सरकारीया थःगुहे ऐन दुगुलिं वित्तीय कारोवार सम्बन्धय् धाःसा नेपाल राष्ट्र बैंकं सहकारीया ब्याजदर तोके याइमखु । नेपाःया कुल गार्हस्थ उत्पादनय् सहकारी क्षेत्रया योगदान थ्यंमथ्यं ४ प्रतिशत दुगु अनुमान दु । अथेहे केन्याय् ४५, न्युजिल्यान्डय् २०, फ्रान्सया १८, भारतय् ४.०१ व श्रीलंकाय् ३.७ प्रतिशतया योगदान दु ।

सम्बन्धित बुखँ

LEAVE YOUR COMMENTS