
येँ – सामान्य प्रशासनमन्त्रीं खटे यानागु कार्यक्षेत्रय् मवंपिं कर्मचारीतय्त कारवाही प्रक्रिया न्ह्याके धुनागु धयाच्वंसां कर्मचारी सगठनतय्सं धाःसा मन्त्रीयाके अज्याःगु अधिकार हे मदु धकाः कार्यक्षेत्रय् मवंपिं कर्मचारीतय्त हे बचे यायेगु स्वयाच्वंगु दु ।
निजामति कर्मचारी युनियनया उपमहासचिव दुर्गा फुयालं बिबिसीलिसे खँ ल्हासें धयादीगु दु, ‘नेपाया निजामति सेवा ऐनं सुं नं मन्त्री, राज्यमन्त्रीं कर्मचारीयात कारवाही यायेगु नियम मदु । कर्मचारीतय् मवंखःसां जिमिसं बुझे याये ।’ वय्कलं कर्मचारीत खटे याःगु कार्यक्षेत्रय् वनाच्वंगु दावी नं यानादीगु दु ।सामान्य प्रशासन मन्त्रालयं धाःसा कार्यक्षेत्रय् मवंपिं कर्मचारीतय् चरणवद्ध रुपं कारवाही यायेगु धाःगु दु । खटे यानागु कार्यक्षेत्रय् वनेत अटेर याःपिं, काज कयाः राजधानीइ हे च्वनाच्वंपिं वा राजनीतिक पहुँचया आधारय् सरुवा पनेत स्वयाच्वंपिं निजामति कर्मचारीत विरुद्ध सोमवाःनिसें कारवाही प्रक्रिया न्ह्याकागु खँ मन्त्रालयं धाःगु दु ।
तर कर्मचारीतय्सं धाःसा आवश्यक विदाय् च्वनाच्वंपिं बाहेक मेपिं कर्मचारी सम्बन्धित थासय् वनेधुंकूगु दावी कर्मचारी संगठनतय्सं यानाच्वंगु दु ।संघीय मामिला तथा सामान्य प्रशासन मन्त्रालयं धाःसा अझं ३० प्रतिशत कर्मचारी खटे याःगु थासय् मथ्यंनिगु खँ धाःगु दु । कर्मचारीत कार्यक्षेत्रय् मथ्यंगु हे कारणं प्रदेश प्रदेशय् ज्या यायेत तकं समस्या जुयाच्वंगु दु । प्रदेश सरकारं कर्मचारीतय् अभावं यानाः आवश्यक कानुन व बजेट तकं दयेके मफयाच्वंगु खँ धयाच्वंगु दु ।सामान्य प्रशासनमन्त्री लालबाबु पण्डिं अनुपस्थित जूपिं कर्मचारीतय् विवरण तयेत प्रदेश व स्थानीय तहय् पां छ्वये धुनागु धासें आः नं ज्याय् मवन धाःसा कारवाही यायेगु खँ धयादीगु दु ।वय्कलं धयादीगु दु, ‘याकनं याकनं हे कारवाही यायेगु जुइ । वनीपिं कर्मचारीत कार्यक्षेत्रय् वनी, वने म्हाःपिंत कारवाही प्रक्रिया न्ह्याकेगु जुइ ।
लिबाकूपिंत नसिहत बीगु व पूवंक हे लापरवाही याःपिंत बर्खास्त यायेगु जुइ ।’ कर्मचारीतय् कार्यक्षेत्रय् वनेत आलताल याना च्वनेफुगु कारण धाःसा राजनीतिक दलतय्सं हे यानाः खः । दलतय् भ्रातृ संगठन जुयाच्वंगु थीथी कर्मचारी संगठन व नेतातय् बलय् हे कर्मचारीतय्सं अटेर यानाच्वंगु खँ धयाच्वंगु दु ।नेपालय् थौंकन्हय् ८२ हजार स्वयां अप्वः निजामति कर्मचारी दु । देय् संघीय संरचनाय् वनेधुंकाः केन्द्रय् ३० प्रतिशत जक कर्मचारी तयाः मेपिंत प्रदेश व स्थानीय तहय् खटे यानाछ्वइगु जुइ । थ्व हे दथुइ सरकारं केन्द्र, प्रदेश व स्थानीय तह यानाः कर्मचारीतय् कुल दरबन्दी १ लाख १० थ्यंकेगु तयारी नं यानाच्वंगु दु ।
LEAVE YOUR COMMENTS