तरकारीइ न्हूगु विषादी प्रयोग

येँ – येँया तरकारी बजारय् मी हइगु तरकारीइ ल्वाकछ्याइगु विषादीया परीक्षण शुरु जुइवं सम्बद्ध किसानतय्सं आः परीक्षणपाखें खने मदइगु मेगु हे विषादी प्रयोग याना हःगु खँ सीदुगु दु । थौंकन्हय् थीथी नाकाय् तरकारीया विषादी परीक्षण याइबलय् उकी कार्बोनेट व अर्गानो फोस्फेट धइगु विषादी दु लाकि मदु धकाः जक स्वयेगु याइ । छुं ई न्ह्यः तरकारीइ थ्व निता विषादीया प्रयोग यक्व हे जूगु खने दत धकाः सरकारं थुकिया परीक्षण याःगु खः । तर आः वयाः तरकारी उत्पादकतय्सं थुकिया पलेसा मेगु हे विषादी प्रयोग यानाच्वंगु खँ धाःगु दु । थ्व मेगु विषादी धाःसा थौंकन्हय् सरकारं यानाच्वंगु परीक्षणं पत्ता लगे याये फइ मखु ।

नेपाःया गुणस्तर विभागं तरकारीइ आः मेगु हे विषादीया प्रयोग शुरु जूगु दु धकाः बांलाक हे सिउ । तर सिउसां उकिया परीक्षण यायेगु धाःसा सम्भव मदुगु कारणं छुं याये फयाच्वंगु मदुनि । अज्याःगु विषादी परीक्षण यायेगु प्रविधि व जनशक्ति थःपिंके मदुगु कारणं उकिया परीक्षण याये मफयाच्वंगु खँ धाःगु दु ।

थनिं खुला न्ह्यः भारतपाखें नेपालय् दुहां वइगु तरकारीइ थीथी कथंया विषादी ल्वाकछ्यानातःगु लुल धकाः तसकं बबाल जूगु खः । तरकारी परीक्षण मयायेकं दुकाये मखु धकाः हप्तौं तक नाकाय् तुं तरकारीया ट्रकत पनातःगु नं खः । वयां लिपा छुं छुं थासय् परीक्षणया ज्या नं जुल । तर आः वयाः धाःसा थ्व परीक्षण हानं फासांफुसुं जुया वंगु खँ धाःगु दु । न्हापा परीक्षण यानाच्वंगु थासय् नं आः झारा टारे याये थें जक जुयाच्वंगु सीदुगु दु ।

सम्बन्धित बुखँ

LEAVE YOUR COMMENTS