उद्योग वाणिज्यया विशेष साधारण सभा मजुइगु पक्का

येँ –  नेपाल उद्योग वाणिज्य महासंघया कात्तिक २९ गते जुइगुधयातःगु विशेष साधारण सभा थ्यंमथ्यं मजुइगु हे जूगु दु । वरिष्ठ उपाध्यक्ष शेयर गोल्छायात अध्यक्ष जुइगु पाखें पनेगु निंतिं विधान संशोधन यायेत विशेष साधारण सभा सःतातःगु खः । आः महासंघ दुने तःधंगु ‘डिल’ लिपा विशेष साधारण सभा दिकेगु ज्या जुइत्यंगु खँ पिहां वयाच्वंगु दु ।

महासंघया पुलांम्ह अध्यक्ष चण्डीराज ढकाल वरिष्ठ उपाध्यक्ष गोल्छायात तप्यंक अध्यक्ष जुइगुपाखें पनेगु निंतिं लगे जुयाच्वंगु खः । महासंघया विधान कथं वरिष्ठ अध्यक्ष मेगु पालय् निर्विरोध अध्यक्ष जुइ । अध्यक्ष भवानी राणायात ल्हातय् कयाः विशेष साधारण सभा यायेगु पाखे लगे जुयाच्वंम्ह ढकाल हे विधान संशोधन समितिया संयोजक नं जुयाच्वंगु खः ।

तर आः वय्कलं हे विशेष साधारण सभा मजुइगु खँ धाःगु दु । तर थुकिया औपचारिक निर्णय धाःसा याये ल्यं दनि ।वय्कलं धयादीकथं विशेष साधारण मयायेगु निंतिं सहलह जुयाच्वंगु दु । शुक्रवाः विधान संशोधन समितिया बैठकं संशोधन प्रक्रिया दिकेगु निर्णय याइ, थ्व लिपा महासंघ स्थायी समितिया बैठकं संशोधन समितिया निर्णयया आधारय् विशेष साधारण सभा मयायेगु िनिर्णय याइगु खँ धाःगु दु । स्थायी समितिया बैठक आइतवाः व सोमवाः च्वनेत्यंगु दु ।

विशेष साधारण सभा दिकेगु निंतिं महासंघ दुने तःधंगु ‘विजनेश डिल’ जूगु चर्चा महासंघ दुने हे जुयाच्वंगु दु । महासंघया दुजःतय्सं हे
थुकिया फोहरी कासा कथं व्याख्या यानाच्वंगु दु । महासंघया हे छम्ह पदाधिकारीं थःगु नां मकनेगु सर्तय् महासंघय् जूगु फोहरी खेलया लिच्वः कथं हे विशेष साधारण मजुइत्यंगु खँ धाःगु विकास न्युज अनलाइनं च्वःगु दु ।

 

सम्बन्धित बुखँ

LEAVE YOUR COMMENTS