
येँ- सरकारं नेपाल भ्रमण दँ २०२० यात लक्षित यानाः विदेशय् याइगु प्रचार प्रसार ज्याझ्वः तत्कालया निंतिं स्थगित याःगु दु । संस्कृति, पर्यटन तथा नागरिक उड्डयन मन्त्री योगेश भट्टराईं विदेशय् यायेगु प्रचार प्रसार ज्याझ्वः स्थगित यानाः आन्तरिक पर्यटन प्रवद्र्धन ज्या न्ह्याकेगुलिइ सरकार केन्द्रीत जूगु खँ धयादीगु दु ।
कोराना भाइरस ‘कोभिड–१९’ विश्वया आपालं देशय् प्रभाव न्यंकाच्वंगुलिं विदेशय् पर्यटन प्रवद्र्धनया निंतिं प्रचार प्रसार ज्याझ्वः तत्काल स्थगित यायेगु निर्णय जूगु खँ धाःगु दु । परिस्थित अनुकूल मजूतले आन्तरिक पर्यटनयात बः बीगु नीति नालागु खँ मन्त्री भट्टराईं धयादीगु दु ।
कोरोना भाइरसया कारणं विश्वया आपालं देय् प्रभावित जुइवं थज्याःगु निर्णय यायेमाःगु खँ वय्कलं धयादीगु खः । २०२० दँ शुरु जुइवं चीनया वुहानय् खनेदुगु भाइरस विश्वया ३८ गू स्वयां मल्याक देशय् न्यना वनेधुंकूगु दु । कोरोना भाइरस चीनं शुरु जुयाः एसिया, युरोप व अमेरिकी देशय् तकं प्रभाव लानाच्वंगु दु । भाइरसया प्रकोप शुरु जुइवं चीनं नेपाः भ्रमण याइपिं शून्य धयाथें जुइधुंकूगु दुसा युरोपेली देशं वइपिं पर्यटकत नं म्हो जूगु दु ।
कोरोना भाइरस प्रभावित जूगु देशय् पर्यटक वये–वनेगु बन्द जूगु मखुसें व्यापार व्यवसाय, वासः उत्पादन व आयात निर्याततय् तकं लिच्वः लानाच्वंगु दु । वासः दयेकेगु निंतिं माःगु कच्चा पदार्थ नेपालय् चीनं आयात यायेगु यानाच्वंगु खःसा आः वासः आयात यायेत माःगु कच्चा पदार्थ नं आयात मजूया समस्या जुयाच्वंगु दु ।
थ्वहे झ्वलय् अन्तर्राष्ट्रिय आर्थिक सम्मेलनय् झिंनिगू देशं ब्वति कायेगु धकाः धाःगु खःसां नं उगु सम्मेलन नं कारोना भाइरसया कारणं प्रभावित जूगु दु । उकथं हे याकनं हे जुइधाःगु सगरमाथा संवाद ज्याझ्वः नं स्थगित यायेगु मनस्थिति सरकारं दयेकाच्वंगु खँ धाःगु दु । कोरोना भाइरसया कारणं शनिवाः तक विश्वन्यकं २८३३ म्ह सीधुंकूगु दुसा ८५६८६ म्ह संक्रमण जूगु लूगु दु । उकि मध्ये ३९६८० म्ह कोरोना भाइरस मुक्त जुइधुंकूगु खँ धाःगु दु ।
LEAVE YOUR COMMENTS