बैंकया सहायक कम्पनीयात ब्रोकर लाइसेन्स बीगु तयारी

येँ – प्रदेशय् शेयर ब्रोकर कम्पनी चायेकेगु निंतिं बैंकतय्त लाइसेन्स बीगु तयारी जूगु दु । नेपाल स्टक एक्सचेञ्जं बैंकतय्सं सहायक कम्पनी चायेकल धाःसा ब्रोकर लाइसेन्स बीफइगु प्रतिवेदन तयार यानाः नेपाल धितोपत्र बोर्डय् छ्वःगु दु । नेप्सें बोर्डया हे निर्देशन कथं प्रतिवेदन तयार याःगु खः ।

नेप्सेया प्रमुख कार्यकारी अधिकृत चन्द्रसिंह साउदं बैंकतय्सं सहायक कम्पनी चायेकल धाःसा लाइसेन्स बीफइगु मोडालिटी दयेकाः प्रतिवेदन छ्वयागु खँ धयादीगु दु । थ्व मोडालिटी कथं बैंकतय्सं शाखा कार्यालयं धाःसा ब्रोकरया ज्या याये दइमखु, ब्रोकरया ज्या यायेगु खःसा अलग हे सहायक कम्पनी चायेकेमाः ।

अथेहे थौंकन्हय् ज्या यानाच्वंपिं ब्रोकर कम्पनीतय्सं शाखा चायेकातःगु जिल्लाय् बैंकय् कारोवार याये दइमखु ।नेप्सें बोर्डय् प्रतिवेदन छ्वयेगु लिसें लाइसेन्स बीगु प्रक्रिया सुरु यायेगु निंतिं बोर्डया निर्देशन नं माग यानागु खँ प्रमुख कार्यकारी साउदं धयादीगु दु ।नेप्सें थ्व प्रतिवेदन दयेकेगु निंतिं छगू अध्ययन समिति हे दयेकूगु खः ।

समितिं प्रादेशीक स्तर व बैंकया सहायक कम्पनीयात लाइसेन्स बीबलय् जुइफुगु समस्या व प्रक्रिया बारे प्रतिवेदन दयेकूगु खः । थ्व प्रतिवेदन कथं बैंकया सहायक कम्पनीं थःगु हे शाखा चायेकाः जक शेयर कारोवार यायेदइ । उमिसं शाखा चायेकेबलय् नं स्वनिगलं पिने शेयर ब्राकर कार्यालयया शाखा मदुगु थासय् जक चायेकेदइगु बाध्यात्मक व्यवस्था प्रतिवेदनय् न्ह्यथनातःगु दु ।

बैंकतय्सं सहायक कम्पनी चायेकल धाःसा लाइसेन्स बीफइगु मोडालिटी दयेकाः सहितया नेपाल स्टकया प्रतिवेदन

प्रतिवेदनय् बैंकतय् सहायक कम्पनीयात ब्रोकरया लाइन्सेन्स बिल धाःसा ७७ गुलिं जिल्ला पाखें निगूगु बजारय् शेयर कारोवार यायेफइगु खँ न्ह्यथनातःगु दु । मेखे बैंकया सहायक कम्पनीतय्त ब्रोकरया ज्या याकल धाःसा इन्साइडर ट्रेडिङ जुइफुगु आशंका नं जुयाच्वंगु दु ।

प्रतिवेदनय् थज्याःगु इन्साइडर ट्रेडिङ पनेगु निंतिं भित्री कारोवारयात बन्देज तये कथंया नियमत दयेकाः कडापूर्वक लागू यायेमाःगु खँ न्ह्यथनातःगु दु । अथेहे प्रतिवेदनय् न्हूगु ब्रोकर कम्पनी आर्थिक रुपं बल्लायेमाः धासें बैंकया सहायक कम्पनीया न्यूनतम चुक्ता पुँजी म्होतिं नं २० करोड जुइमाःगु प्रस्ताव नं न्ह्यथनातःगु दु ।

बोर्डं वंगु पुस १८ गते वाणिज्य बैंकया सहायक कम्पनीतय्त ब्रोकर लाइन्सर बीगु प्रक्रिया न्ह्याकेत नेप्सेयात निर्देशन बिउगु खः । अथेहे स्वनिगलं पिने कार्यक्षेत्र दइकथं ब्रोकर लाइसेन्स बीगु प्रक्रिया नं न्ह्याकेत निर्देशन बिउगु खः ।

मेखे झिंप्यंगू वाणिज्य बैंकतसं नेपाल राष्ट्र बैंकया स्वीकृति कयाः शेयर कारोवारया निंतिं सहायक कम्पनी चायेकेगु तयारी सुरु याःगु दु । थुपिं मध्ये प्यंगू कम्पनीं सहायक कम्पनी चायेकाः लाइन्सेन्सया निंतिं निवेदन नं बीधुंकूगु दु ।