दीर्घकालिन ग्वाहालि यायेगु प्रस्ताव

ऊर्जाय् नेपाः–बंगलादेश

यँे – नेपाः व बंगलादेशं दीर्घकालिन लक्ष्यसहित ऊर्जा व जलविद्युत क्षेत्रय् सहकार्य याइग जूगु दु । बंगलादेशं सन् २०४० तक नेपाःपाखें ९ हजार मेगावाट मत न्यायेगु लक्ष्य तयाः सरकारी व निजी स्तरय् नं मंकाः लगानीया प्रस्ताव याःगु दु । ऊर्जाया थीथी स्रोत मालेगु झ्वलय् बंगलादेशं नेपाःलिसे सहकार्यया ल्हाः न्ह्यःने हःगु खः ।

भारतलिसे त्रिपक्षीय सहमति यानाः हे जूसां नेपालं विद्युत बंगलादेशतक थ्यंकेगु बंगलादेशया बिचाः दु ।लिपांगु इलय् गार्मेन्ट उद्योगपाखें विश्व समुदाययात थःगु म्हसीका बीत सफल बंगलादेशं नेपाःया विद्युतपाखें थप आर्थिक उपार्जन यायेगु लक्ष्य तयातःगु दु । निगू देय् दथुइ ऊर्जा क्षेत्रय् मंकाःज्या यायेगु द्विपक्षीय संयन्त्र क्रियाशील दु ।

ऊर्जा, जलस्रोत तथा सिँचाइ मन्त्रालयं ऊर्जा क्षेत्रया लगानीया निंतिं द्विपक्षीय संयन्त्रपाखें थःगु गतिविधि न्ह्याकाच्वंगु दु । मन्त्री वर्षमान पुनं २०७५ भदौय् बंगलादेशया भ्रमण यायेधुंकाः निगू देय् दथुइ ऊर्जाय् सहकार्य यायेगु लँपु तब्या याःगु खः ।

वंगु असोज २६ व २७ गते भारतया बैंग्लोर जूगु नेपाः–भारत ऊर्जा सचिवस्तरीय बैठकं नेपाः, बंगलादेश व भारत दथुइ ऊर्जा आदानप्रदानया निंतिं त्रिदेशीय संयुक्त बैठक ग्वसाः ग्वयेगु सहमति याःगु खः । थ्व सहमतिं नेपाःया मत भारतया भूमि वा संयन्त्र छ्यलाः बंगलादेश यंकेगु लँपु चायेकी ।

त्रिपक्षीय बैठक स्वला दुने ग्वसाः ग्वयेगु सहमति जूगुलिं बैठक लिपा थप आधारहरू तयार जुइ । निगू देय् दथुइ ऊर्जा संयन्त्रया बैठक नियमित जुयाच्वंगु व ऊर्जा सहकार्यया क्षेत्रय् बंगलादेशया अनुभव नेपालं अनुसरण यायेपाखे ज्या जुयाच्वंगु मन्त्रालयया धापू दु । भारतं मत यंकाच्वंगु बंगलादेशं उगु हे प्रसारण प्रणाली छ्यलाः वा मेगु छुं संरचना दयेकेगु धयागु बारे थःथवय् समझदारीया आधार दयेकीगु खँ धाःगु दु ।

नेपाः व बंगलादेश दथुइ २०७५ साउन २५ य् ऊर्जा सहयोग कालबिल सम्बन्धी द्विपक्षीय समझदारीपत्रय् हस्ताक्षर जूगु खः । उगु हस्ताक्षरय् मन्त्री पुन व बंगलादेशया विद्युत, ऊर्जा तथा खनिज राज्यमन्त्री नसरुल हमिदं हस्ताक्षर यानादीगु खः । मन्त्री पुनया कथं सरकारं झिदँया दुने १५ हजार मेगावाट मत उत्पादन यायेगु लक्ष्य तयातःगु सन्दर्भय् बंगलादेशलिसे ऊर्जा सहकार्य नं छगू महत्वपूर्ण पलाः खः ।

निगू देय् दथुइ जूगु समझदारी कथं बंगलादेशं तत्काल हे नेपाःपाखें ५०० मेगावाट मत न्यायेत नं तयार दु । भारतीय लगानीकर्ता कम्पनी ग्रान्धी माल्लिकार्जुन राव (जिएमआरं) दयेकेत्यंगु माथिल्लो कर्णाली जलविद्युत आयोजनापाखें मत न्यायेत बंगलादेश न्हापा हे तयार जुइधुंकूगु दु । भारतीय कम्पनी जिएमआरं याकनं हे बंगलादेश लिसे मत मीगु सम्झौता जुइगु खँ धाःगु दु ।

नेपाःया विद्युत क्षेत्रीय बजारय् यंकेगु व मीगु लक्ष्य तयाः सरकारं बंगलादेशलिसे द्विपक्षीय समझदारीपत्रय् हस्ताक्षर याःगु ऊर्जा, जलस्रोत तथा सिँचाइ मन्त्रालयया धापु दु । बंगलादेश सरकारं थःगु जनताया म्हगस पूवंकेगु व ऊर्जाया माग सम्बोधन यायेगु लक्ष्य तयाः ऊर्जा क्षेत्रय् सहकार्यया निंतिं नेपाःलिसे ल्हाः मिले याःगु खः ।

ऊर्जा क्षेत्रय् सहकार्य यायेगु समझदारी पत्रय् हस्ताक्षर लिपा तत्कालिन बंगलादेशी राज्यमन्त्री हमिदं नेपालय् जलस्रोतया यक्व सम्भावना दुगुलिं निगू देय्या सरकारी व निजी क्षेत्र जानाः ज्या यायेगु खँ धयादीगु खः । बंगलादेशं सन् २०४१ तक विकसित राष्ट्रय स्तरोन्नति यायेगु लक्ष्य तयातःगु दु । उबलय् बंगलादेशयात थ्यंमथ्यं ६० हजार मेगावाट मतया आवश्यक जुइ ।

उकिया निंतिं बांलाःगु विकलप नेपाः खः धयागु खँय् बंगलादेश स्पष्ट दु । सन् २०२१ तक बंगलादेशयात २४ हजार मेगावाट मतया आवश्यक जुइगु खँ धाःगु दु ।बंगलादेशया आर्थिक वृद्धिदर १० प्रतिशत थ्यंकेगु लक्ष्य तयाः ज्या जुयाच्वंगुलिं नं थप ऊर्जाया आवश्यक दुगु खः । नेपाःया निजी क्षेत्र विशेष यानाः स्वतन्त्र ऊर्जा उत्पादकतय् संस्था नेपाल (इपान)लिसे जानाः बंगलादेशया निजी क्षेत्रं मंकाः रुपं लगानी यायेगु प्रस्ताव हःगु खः ।

इपानया अध्यक्ष शैलेन्द्र गुरागाइँं नं ऊर्जाया अत्यधिक माग दुगुलिं बंगलादेशय् अनया निजी क्षेत्र तत्काल हे थ्यंमथ्यं ६ हजार मेगावाट क्षमताया आयोजना दयेकेत इच्छुक दु । उकिया निंतिं नेपाल सरकारं विद्युत निर्यातया लँ चायेकेगु वातावरण दयेका बीमाःगु खँ अध्यक्ष गुरागाँईया धापु दु ।

सरकारी व निजी क्षेत्रं गुगुं नं कथं लगानी यायेत तयार दुगु बंगलादेशी लगानीकर्तायात नेपाः दुते हयेत सरकारं विशेष पहल यायेमाःगु इपानया धापू दु । बंगलादेशी लगानीकर्तातय्सं प्रदेश नं. १ या छुं आकर्षक आयोजनाय् लगानी यायेत इच्छा प्वंकूगु खँ इपानया अध्यक्ष गुरागाइँ नं धाःगु दु ।

सम्बन्धित बुखँ

LEAVE YOUR COMMENTS