
येँ – सरकारं थ्व दँया अन्तिम लाय् थ्यंकाः नं मुक्कं बजेटया बछि नं खर्च यायेमफुगु खँ महालेखा नियन्त्रकया कार्यालयं तयातःगु तथ्यांकं क्यंगु दु । थ्व दँय् विकास खर्चया निंतिं जक सरकारं ३ खर्ब ३५ अर्ब तका छुटे याःगु खःसा आःतक मुक्कं १ खर्ब ६२ अर्ब तका जक खर्च यायेधुंकूगु दु ।
विकास बजेटया तःधंगु ब्व आर्थिक दँया अन्त्यय् वया जक खर्च यायेगु ज्या विकास निर्माणया ज्या प्रभावकारीम जुइगु व गुणस्तरहीन ज्या जुइगु जुयाच्वंगु दु । ताःई न्ह्यव निसें थ्व हे खँ वयाच्वंगु थुगुसी नं असार महिनाय् हे जक वयाः विकास बजेटया तःधंगु रकम खर्च जुइगु अनुमान जुयाच्वंगु दु ।
न्हापा न्हापा साउनं जक बजेट हइगुलिं विकासया ज्या सुरु यायेत ई काइगु धयागु खँ पिहां वःगुलिं निदँ न्ह्यवनिसें जक जेठ १५ गते हे वइगु आर्थिक दँया निंतिं बजेट न्ह्यब्वयेगु सुरु जूगु खः । अथे खःसां विकास बजेटया तःधंगु ब्व आर्थिक दँया अन्त्य वा वयां निला स्वला न्ह्यव जक खर्च जुइगु प्रवृत्ति धाःसा सुधार मवःनिगु खँ विज्ञतय्सं धाःगु दु ।
चालु आर्थिक दँय् विकास बजेट ३ खर्ब ३५ अर्ब तका छुटे याःगु खःसा आःतक मुक्कं १ खर्ब ६२ अर्ब तका जक खर्च
महालेखा नियन्त्रकया कार्यालया उपमहालेखा नियन्त्रक दिनेश रेग्मीं बिबिसीलिसे खँ ल्हासें असार ३ गते तक मुक्कं ४१ प्रतिशत पूँजीगत खर्च जूगु खँ धयादीगु दु । वंगु दँय् मुक्कं ६७ प्रतिशत विकास बजेट खर्च जूगुलिइ असार महिनाय् जक ४१ प्रतिशत पूँजीगत खर्च जूगु खः । चालु दँय् नं न्हापांगु खुला दुने मुक्कं १३ प्रतिशत जक विकास बजेट खर्च जूगु खँ उपमहालेखा नियन्त्रक रेग्मीं धयादीगु दु ।
अप्वः धयाथें वैशाख, जेठ व अन्तिम महिना असारय् जक विकास बजेटया तःधंगु ब्व खर्च जुइगु जुयाच्वंगु दु । थुकिया कारण बारे महालेखा परीक्षकया कार्यालयया प्रवक्ता उद्धवचन्द्र श्रेष्ठं धयादिल, ‘फागुन चैतय् जक ज्या सुरु याइगु, अले जेठ असारय् अर्थमन्त्रालयं निकास बीगु, न्हूगु थप अख्तियारी बीगु कारणं यानाः असार महिनाय् विकास खर्च जुइगु अप्वःगु खः ।’
विकास बजेट खर्च मजुइगु समस्याया दथुइ सरकारं थ्व दँय् फागुनतक नं सुरु जुइमफुगु योजनाया ध्यबा पनेगु, विकास आयोजनाया ठेक्का कयाः इलय् ज्या सिमधयेकूपिं ठेकेदारतय्के स्पष्टीकरण कायेगु ज्या न्ह्याकेधुंकूगु दु ।
LEAVE YOUR COMMENTS