तातोपानी नाका संचालन व्यापारय् सकारात्मक लिच्वः लाइगु आशा

येँ (बिबिसी) – प्यदँ न्ह्यः नेपालय् वःगु तःभुखाय् लिपा बन्द जूगु नेपाल–चीन सीमाय् लाःगु तातोपानी नाका संचालनय् वयेवं निगू देय् दथुया व्यापारय् सकारात्मक लिच्वः लाइगु आशा व्यवसायीतय्सं याःगु दु । तातोपानी नाका चालेवं नेपाःपाखेया व्यावसायिक गतिविधि बांलाक ब्वलनीगु जक मखु सर्वसाधारणया न्हियान्हिथंया जीवनय् नं प्रत्यक्ष लिच्वः लाकी ।

चीनलिसेया आयात निर्यात यायेगु तातोपानी नाका बन्द जुइवं रसुवाया नाका छ्यला वयाच्वंगु खः । तर वैकल्पिक मार्ग थप जुइवं सामान हयेगु–यंकेगु यायेत अझ अःपुइगु व उकिया प्रभाव बजार भावय् नं लाइगु खँय् सरकारी अधिकार व व्यवसायीत एकमत दु ।

छु चिनिया सामान दनी ला ?
भुखाय् ब्वयेधुकाः तातोपानी नाका बन्द जुइवं चिनिया सामान ढुवानी भारतया कोलकता जुयाः हयेमाःगु बाध्यता वःगु खः । थुकी नेपाःया बजारय् भावय् लिच्वः लाःगु व्यवसायीतय् अनुभव दु । कापःया ज्वलं निसें न्हियान्हिथंया उपभोग्य सामानया बजाः भाः ह्वात्त हे थहां वंगुलिं थःपिनिगु लबलय् नं लिच्वः लाःगु व्यवसायीतय् धापू दु ।

‘तातोपानी नाका संचालनय् वयेवं बजाःभाः नं छुं भचा म्हो जुइफु’ चीनं सिसाबुसा आयात याना वयाच्वंम्ह व्यवसायी उत्तम थापां धयादिल ।
‘रसुवाया नाका संचालनय् वयाच्वंगुलिं तःधंगु हिउपाः खनेमदुसां समुद्री मार्गया तुलना यायेगु खःसा तःधंगु अन्तर दु । रसुवा व तातोपानी निगुलिं संचालनय् वयेवं समुद्री मार्गया छ्यलाबुला म्हो जुइ ।’

थापाया कथं चीनया सामान समुद्री मार्ग जुयाः हयेबलय् कोलकत्ता तक थ्यंकेत हे थ्यंमथ्यं पीन्हु लगे जुइ । ई अप्वया वनकि भाः थनं थहां वनी । उद्योग, वाणिज्य तथा आपूर्ति मन्त्रालयया प्रवक्ता नवराज ढकालं धाःसा बजाः भावय् गज्याःगु लिच्वः लाइ धयागु खँ आः हे धायेमफइगु खँ धयादिल । सामान ढुवानीया ई म्हो जुइगु धयागु अथें हे आर्थिक लाभ खः धासें थुकिं बजाः भावय् गज्याःगु लिच्वः लाकी धयागु खँ स्वयेत छुं ई काइगु खँ धयादिल ।

बहुआयामिक फाइदा
नेपाल–चीन उद्योग वाणिज्य संघया अध्यक्ष राजेशकाजी श्रेष्ठं नाका संचालनं बजाः भावय् छुं हद तक सकारात्मक लिच्वः लाकीगु खँ धयादिल । तर भावय् हे थुलि प्रतिशत कुहां वनी धयागु खँ आः हे धायेमफइगु खँ वय्कलं कनादिल ।

नेपाल चेम्बर अफ कमर्सया अध्यक्ष नं जुयाच्वनादीम्ह श्रेष्ठं धयादिल, ‘सामान ढुवानी यायेगु सवारी साधनया संचालनय् दयाच्वंगु सिन्डिकेट अन्त्य यायेफत धाःसा बजाः भावय् अझ अप्वः सकारात्मक लिच्वः लाइ ।’

तातोपानी नाका संचालनय् वःगुलिं बजाः भावय् जक मखु मेमेगु यक्व ख्यलय् सकारात्मक लिच्वः लाइगु वय्कलं कनादिल । मानसरोवर वनीपिं पर्यटकतय्त तातोपानी जुयाः यात्रा यायेबलय् अःपुइ । तर चिनियाँ पक्षं धाःसा तत्कालया निंतिं उगु नाका सामान ढुवानीया निंतिं जक छ्यलेगु खँ धाःगु दु ।

अपेक्षा
येँया भृकुटी मण्डपय् वंगु नीन्यादँ न्ह्यवनिसें चिनिया सामान बिया वयाच्वंम्ह खुद्रा व्यापारी तुलसा उप्रेतीया कथं भुखाचं तातोपानी नाका बन्द जुइवं सामानया भाः थ्यंमथ्यं १० प्रतिशतं थहां वन । नाका चालेवं भाः भचा कुहां वइला धयागु आशा वय्कःया दु ।