बैंकर्स संघ मछिंगु अवस्थाय्
भारतीय नागरिक अध्यक्ष जुलकि सरकारी निकायपाखें बाइकट जुइगु
येँ – नेपाल बैंकर्स संघयात थौंकन्हय् छगू तसकं मछिंगु परिस्थिति वयाच्वंगु दु । थ्व मछिंगु स्थिति बैंकया न्हूम्ह अध्यक्ष ल्ययेगु खँय् खः । संघय् छुं ई न्ह्यव निसें न्ह्याना वयाच्वंगु चलन कथं संघया उपाध्यक्ष हे मेगु पालय् अध्यक्ष जुइगु खः । तर थौंकन्हय् उपाध्यक्ष जुयाच्वंम्ह धाःसा भारतीय नागरिक लानाच्वंगु दु ।
राष्ट्र बैंक निसें सरकारी पक्ष भारतीय नागरिकयात संघया अध्यक्ष दयेके मजिउगु पक्षय् दु । अथे जूबलय् संघयात तसकं मछिंगु अवस्था वयाच्वंगु दु । संघय् न्हापां सर्वसम्मतिं हे अध्यक्ष ल्ययेगु जुया वयाच्वंगु खः । तर छुं ई न्ह्यव शशिन जोशी व अशोक राणा दथुइ चुनाव हे जुयाः राणा अध्यक्ष जुल ।
चुनाव जूबलय् संघया दुजःत नं निगू धु्रवय् लात । मुक्कं २८ म्ह दुजः दइगु चिधंगु संघ नं थथे धु्रविकृत जुइबलय् बांलाइमखुगुलिं लिपा उपाध्यक्षयात हे मेगु पालय् अध्यक्ष दयेकेगु यानाहल । थ्व हे चलन कथं आः अध्यक्ष जुइगु पाः धाःसा एसबीआई बैंकया सिइओ अनुकुल भटनागर जुयाच्वंगु दु ।
तर भटनागर धाःसा भारतीय नागरिक लानाच्वंगु दु । राष्ट्र बंैक लिसें सरकारी निकायतय्सं भारतीय नागरिकयात अध्यक्ष दयेकल धाःसा संघयात हे बाइकट यानाः वनेमालेफु धयागु सन्देश बियाच्वंगु खँ संघया हे छम्ह पदाधिकारी धाःगु दु । थुकीया मू कारण छु धाःसा देय्या आर्थिक नीतिइ सहलह ब्याकेबलय् बैंकर्स संघया प्रतिनिधि नं सःते माली ।
थथे सःतीबलय् वइम्ह अध्यक्ष भटनागर हे जुइ । भारतीय नागरिक भटनागरयात नेपाःया नीतिइ सहलह यायेत सःतेगु पक्षय् राष्ट्र बैंक मदु । अथे जूगुलिं राष्ट्र बैंकं भटनागरयात संघया अध्यक्ष दयेकल धाःसा संघयात हे बाइकट याना वनेमालीगु थेंज्याःगु ख्याच्वः सहित सन्देश बियाच्वंगु दु ।
नेपाःया आर्थिक मुद्दा सम्बन्धी सरकारं छुं समिति दयेकेगु यात धाःसा उकी अप्वः धयाथें बैंकर्स संघया प्रतिनिधि नं दुथ्याकेगु याना वयाच्वंगु दु । अर्थमन्त्रीया हे संयोजकत्वय् दइगु उच्चस्तरीय वित्तीय समितिइ ला संघ पदेन सदस्य हे खः । मेखे सरकारं याइगु थीथी कथंया आन्तरिक सहलहय् संघपाखें अध्यक्ष हे वनेगु यानाच्वंगु दु ।
थज्याःगु अवस्थाय् भारतीय नागरिकयात नेपाःया आन्तरिक सहलहय् दुथ्याकेगु ला सम्भावना हे जुइमखु खँ राष्ट्र बैंकया पदाधिकारीतय्सं संघया मेपिं पदाधिकारीतय्त अनौपचारिक सहलहया झ्वलय् धायेगु यानाच्वंगु दु ।राष्ट्र बैंकया छम्ह उच्चअधिकारीं धाःगु दु, ‘गुलिखे गोप्य विषयय् सहलह यायेमालेफु ।
यदि संघय् भारतीय नागरिक अध्यक्ष जुल धाःसा अज्याःगु सहलहय् संघयात दुथ्याके फइमखु । थथे दुथ्याकेमफुत धाःसा मू सरोकारवाला निकाय हे महत्वपूर्ण खँ पाखें बञ्चित जूवनेफु ।’अर्थ मन्त्रालयं नं भारतीय नागरिकयात संघया अध्यक्ष दयेकल धाःसा मछिनीगु अवस्था वयेफुगु सन्देश बिया च्वंगु खँ संघया पदाधिकारीतय्सं धयाच्वंगु दु ।
थौंकन्हय् बैंकया संचालक समितिया अध्यक्षत जक दुथ्याःगु सगठन नं चालेधुंकूगु दु । यदि संघय् भारतीय नागरिक अध्यक्ष जुयाः वल धाःसा राष्ट्र बैंक लगायत सरकारी निकायं महत्वपूर्ण सहलहय् संघया पलेसा अध्यक्षतय् संगठनयात सःतीगु सम्भावना अप्वइ ।
थथे जुल धाःसा बैंकर्स संघ हे सरकारी निकायपाखें बाइकट जूवनेफु ।बैंकर्स संघया अधिवेशन मंसिरया स्वंगूगु वाः पाखे जुइत्यंगु दु । थ्व अधिवेशनं निम्ह दुजःपिं बाहेक अध्यक्ष लिसें मेमेपिं पदाधिकारीया
ल्ययेत्यंगु दु ।
LEAVE YOUR COMMENTS