ने. सं. ११४४ ञलाथ्व नवमी -

मस्जिदया गुम्बज हिन्दूतय्त बीगु फैसला

भारतया सर्वोच्च अदालतं बाबरी मस्जिदया गुम्बज दुगु थाय् हिन्दू पक्षयात बीगु फैसला न्यंकूगु दु । अदालतं सुन्नी मुस्मां वक्फ बोर्डयात मस्जिद दयेकेगु निंतिं न्यागू एकड जग्गा उपलब्ध याकेत नं धाःगु दु । न्याम्ह न्यायाधीशतय् इजलासं सर्वसम्मतं फैसला यासें स्वला दुने छगू ट्रस्ट दयेकेत धाःगु दु ।

सन् १९९२ य् मस्जिद थुनेधुंकाः छगू दशक न्ह्यः सन् २००२ पाखे थ्व विवाद इलाहाबादया उच्च न्यायालय् दर्ता जूगु दु । सेप्टेम्बरय् २०१० वःगु फैसला कथं धाःसा विवादति २.७७ एकड जमिन बराबर स्वंगू ब्वय् ब्वथलेमाःगु खः । उबलय् अदालतं उगु जग्गा स्वंगू ब्वय् ब्वथलाः मुस्मांतय्त छगू, हिन्दूतय्त छगू व मेगु छगू हिन्दू सन्यासीतय् सम्प्रदाय निर्मोही अखडायात बीमाःगु आदेश याःगु खः ।

तर हिन्दू व मुस्मां निगुलिं पक्षं निगुलिं थुकिया विरुद्ध सर्वोच्चय् पुनरावेदन तःगु खः ।सर्वोच्चया शनिवाःया फैसलाय् भारतीय पुरातत्व सर्वेक्षणया छगू प्रतिवेदनय् राम मन्दिरया अवशेष थुनातःगु बाबरी मस्जिद क्वय् लूगु खँ धाःगु दु । ताःई न्ह्यव निसें प्रतिक्षा यानाच्वंगु थ्व तसकं विवादास्पद धार्मिक स्थल अयोध्या बारे शनिवाः सुथय् सर्वोच्च फैसला याःगु खः ।

राममन्दिर–बारी मस्जिद विवाद बारे पीन्हु तक जूगु सुनवाई वंगु १६ अक्टोवरय् क्वचाःगु खः ।फैसला जुइगु क्वःछिइवं अधिकारीतय्सं शान्तिया निंतिं इनाप याना वयाच्वंगु खः । उत्तर प्रदेशय् हजारौं प्रहरी व अर्धसैनिक दस्ता तैनाथ यानातःगु दु । हिंसा जुइफुगु आशंका फैसला जुइ न्ह्यव हे शुक्रवाः सयौं मनूतय्त ज्वंगु खः । सन् १९९२ य् जूगु थ्व थाय्या विवादय् हिन्दू मुस्मांतय् दथुइ जूगु दंगाय् निद्वलं मल्याक मनूतय् ज्यान वंगु खः ।