ने. सं. ११४३ चौलाथ्व पारू -

रुसी विपक्षी नेता नल्भानीयात ज्वन

एजेन्सी – रुसया विपक्षी नेता एलेक्सी नभाल्नीयात रुसी प्रहरीं ज्वंगु दु। न्याला न्ह्यव वंगु अगस्तय् तिनि स्नायुसम्बन्धी विष बियाः स्यायेत स्वःम्ह नभाल्नी जर्मनीइ उपचार यानाः मस्को लिहां वःगु छुं ई लिपा हे ज्वंगु खः । नभाल्नीयात ज्वनेवं अमेरिका व युरापेली संघं तुरुन्त त्वःतेत माग याःगु दु ।

नभाल्नीयात ज्वंगु ज्याया कुंखिउँसां उमिसं रुसविरुद्ध छुं कारवाही यायेगु धाःसा धाःगु मदुनि । रुसी राष्ट्रपति भ्लादिमिर पुटिनया कट्टर आलोचक ४४ दँया नभाल्नीयात विमानस्थलया पासपोर्ट नियन्त्रण कक्षं हे प्रहरीं ज्वनाः हिरासतय् काःगु खः । जर्मनीं उपचार यानाः लिहां वःम्ह नभाल्नीयात लसकुस यायेत मस्कोया नुकोभो विमानस्थलय् तच्वंगु भीड मुनेवं वय्कः च्वनावःगु विमानयात मेगु हे विमानस्थलय् दिकेयंकूगु खः । नभाल्नीयात विष बिउगु ज्याय् नं राष्ट्रपति पुटिनया इशाराय् रुसी अधिकारीतय् हे ल्हाः दुगु द्वपं लानाच्वंगु दु। खोजपत्रकारतय्सं थ्व द्वपं सही खः धयाच्वंगु दुसा क्रेम्लिनं धाःसा थुकियात अस्वीकार यानाच्वंगु दु ।

नभाल्नीयात ज्वनेवं अमेरिकाय् राष्ट्रपतिइ निर्वाचित जो बाइडेनया पुचलं तुरुन्त त्वःतेत माग याःगु दु। बाइडेनं राष्ट्रिय सुरक्षा सल्लाकारय्म नोनित याःम्ह जेक सुलिभानं नभाल्नीयात स्यायेगु कुतः याःपिंत कारवाही यायेत नं माग याःगु दु। युरोपेली परिषद्या अध्यक्ष चाल्र्स मिशेलं नभाल्नीयात ज्वंगु अस्वीकार्य धासें वय्कःयात तुरुन्त त्वःतेत आह्वान यानादीगु दु ।

मेखे प्रहरीं हिरासतय् काःम्ह नभाल्नीं धाःसा थः ग्याःगु मदु धयादीगु दु। मस्कोया शेरेमेत्येभो विमानस्थलय् वय्कःयात ज्वने न्ह्यः थः समर्थकतय्त सम्बोधन यानादिसें वय्कलं जितः छुं ग्याःचिकु मदु धयादीगु खः । वय्कःयात ज्वंबलय् वय्कःया वकिलतय्त नापं वनेत नं पंगु दु। नाल्भानीयात वंगु अगस्तय् साइबेरियाया आन्तरिक उडानं मस्को वयाच्वंगु इलय् विमान दुने हे नोभिचोक नांया स्नायुलय् लिच्वः लाकीगु विष बिउगु खः । विमानय्हे बेहोश जूगु खःसा लिपा वय्कःयात उपचारया निंतिं जर्मनीइ यंकूगु खः ।