कार खेती जुइगु जमिन

स्वनिगलय् खेती योग्य जमिन धमाधम म्हो जुजुं वनाच्वन धइगु व्यापक जनगुनासो न्यने दयाच्वंगु दु । खेती योग्य जमिनय् मूलतः खेती हे जक यायेगु खः । थन थीथीकथंया अन्नबालीया खेती याइ । गुगु जीवनोपयोगी जुइ । तर अमेरिकाया नेवादा धइगु थासय् अज्याःगु जमिन दु । गन खेती ला जुइ तर बालीनालीया धाःसा मखु, थन खेती जुइगु धइगु कार खः ।

छिं गबलें न्यनादीगु वा खनादीगु दु ला अज्याःगु बुँ गन अन्नबाली मखु, कार खेती जुइ ।अमेरिकाया नेवादाया गोल्डफिल्ड नांया पहाडय् च्वंगु खेती योग्य जमिनय् माइकल मार्क रिप्पी नांया छम्ह मनुखं कारया कार जक खेती यानाः छगू न्हूगु कीर्तिमान कायम यायेत सफल जूगु दु । सन् २०११ निसें माइकलं उगु थासय् च्वंगु जमिन म्हुयाः अन कार धंकेगु ज्या शुरु याःगु खः ।

गोल्डफिल्ड नांया पहाडया खालिगु उगु थासय् प्यखेरं थाय्थासय् स्वःस्वःथाय् सिमा थें धस्वानाच्वंगु कारत जक खंके फइ । माइकलं उकथं कार खेती यानातःगु थासय् नां खः द इन्टरनेशनल कार फरेस्ट अफद लास्त चर्च । माइकलं कार खेती याःगु धाःगु उगु थासय् ४० गः स्वयां अप्वः न्हूगु व पुलांगु कार, ट्रक, भ्यान, जीप थेंज्याःगु सवारी साधन तयातःगु दु ।

जमिनय् तयातःगु अज्याःगु गाडीया छुं भाग जक क्वय् ल्हाका तःगु दुसा अप्वःथें भाग च्वय् खने दयेक धस्वाकातःगु दु । थ्व थाय्यात तापाकं स्वयेगु खःसा अन धाथें हे जमिनय् गाडी हे सयाच्वंगु थें च्वंक खने दइ । थीथी रंग, साइज, डिजाइनया सवारी साधनया कारणं उगु थाय् गुलि न्ह्यइपुसे च्वं, उलि हे बहनि गाडीइ खने दइगु रंगविरंगीया मत व चमकदार जलं यानाः उतिकं न्ह्यइपुसे नं च्वं !