‘लिंग व जातिया आधारय् नोबेल सिरपाः बीमखु’

एजेन्सी- रोयल स्वीडस एकाडेमि अफ साइन्सेजया प्रमुख योरान हानसनं छुं नं लिंग वा जातिया आधारय् नोबेल सिरपाः मबीगु खँ धयादीगु दु । थ्व संस्था विज्ञान पाखे नोबेल पुरस्कार बीगु प्रतिस्थान खः । वय्कलं छुं नं लिंग वा जातिया आधारय् मखसे महत्वपूर्ण खोज याःगु कारणं सिरपाः त्याकेमाः धयागु थःपिंसं तायेकागु खँ धयादीगु दु ।

सन् १९०१ निसें नोबेल सिरपाः बीगु याना वयाच्वंगु खःसा सछि व नीदँ थ्यनेधुंकाः आःतक मुक्कं ५९ म्हे मिस्तय्सं जक नोबेल सिरपाः त्याकेत ताःलाःगु दु । थ्व दँय् नं फिलिपिन्सया पत्रकार मारिया रेसा छम्ह हे जक नोबेल त्याकेत ताःलाःम्ह मिसा जूगु दु । रेसायात रुसी पत्रकार दिमित्री मुरातोभलिसें थुगुसीया नोबेल शान्ति पुरस्कार बीगु घोषणा याःगु खः । वय्कःपिंसं थःथःगु देसय् अभिव्यक्ति स्वतन्त्रताया रक्षाया निंतिं याःगु ज्याया निंतिं थ्व पुरस्कार बीगु क्वःछिउगु खः ।

‘नोबेल पुरस्कार त्याकूपिं मध्ये मिस्त तसकं म्हो जक दुगु तसकं दुःखद खः, थुकी समाजय् दुगु अनुचित अवस्था क्यनी । तर जिमिसं लिंग वा जातिया आधारय् कोटा मतयेगु निर्णय यानागु दु’ वय्कलं धयादीगु दु । थ्व निणर्य नोबेलया संस्थापक अल्फ्रेड नोबेलया अन्तिम इच्छाया मर्मय् आधारित जूगु खँ नं वय्कलं धयादीगु दु ।

स्वीडिस उद्योगपति व रसायनशास्त्री अल्फ्रेड नोबेलं थः सी दछि न्ह्यः सन् १८९५ य् थ्व सिरपाः नीस्वनेगु थःगु इच्छापत्रय् च्वयाथकूगु खः ।