‘न्हूगु भेरियन्ट लुइकागुलिं दण्ड बिल’

एजेन्सी- थःपिंसं कोरोनाया न्हूगु भेरियन्ट ओमिक्रोन लुइकागु खँय् प्रशंसा यायेमाःथाय् अःखःबतं दण्ड बीगु ज्या जूगु खँ दक्षिण अफ्रिकां धाःगु दु । विश्वन्यंकंया देय्तसें ओमिक्रोन भेरियन्टया जानकारी वयेधुंकाः दक्षिण अफ्रिकां जुइगु यात्रायात प्रतिबन्ध तःगुलिं दक्षिण अफ्रिकां थज्याःगु प्रतिक्रया बिउगु खः । दक्षिण अफ्रिकाया विदेश मन्त्रालयं थीथी देशं तःगु प्रतिबन्धयात कयाः कडा अलोचना नं याःगु दु ।

मन्त्रालयं उत्कृष्ट विज्ञानयात प्रशंसा यायेमाः, दण्डित मखु धासें विश्वया मेमेगु देशय् न्हूगु भेरियन्ट खनेदुबलय् क्यँगु प्रतिक्रिया स्वयां आः क्यंगु प्रतिक्रिया पूर्ण रुपं फरक जूगु नं धाःगु दु ।
अफ्रिकन युनियनया छम्ह अधिकारीं न्हूगु भेरियन्टया विकास विकसित देय्तय्सं यानाः जूगु दावी नं याःगु दु । बिबिसीलिसे खँल्हाबल्हा यासें युनियनया खोप डेलिभरीया सहअध्यक्ष आयोआडी आलाकिजां धाःगु दु, ‘आः छुं जुयाच्वंगु दु व अपिहार्य खः । थ्व विश्वं समतामुलक, अत्यावश्यक व याकनं खोप बी मफुगुया परिणाम खँ । विश्वया तःमि देय्तय्सं खोप मुनातःगुया लिच्वः खः । स्पष्ट भासं धायेगु खःसा थ्व अस्वीकार्य खँ खः ।’

दक्षिण अप्रिकालिसें थीथी अफ्रिकन देय्यात न्हूगु भेरियन्टया कोरोना खनेदुगुलिं युरोपेली संघ, अमेरिका, अस्ट्रेलिया, जापान, भारतं थीथी प्रतिबन्धया घोषणा यायेधुंकूगु दु ।

विश्व स्वास्थ संगठनं कोरोनाया थ्व न्हूगु भेरियन्टयात भेरियन्ट अफ कन्र्सन धासें ओमिक्रोन नां बिउगु खः । विश्व स्वास्थ संगठनं थ्व भेरियन्ट तीब्र गतियागु जूगु व थुकी यक्व म्यटेन्ट दुगु धाःगु दु । थ्व भेरियन्ट दकलय् न्हापां नोभेम्बर २४ तारिखय् दक्षिण अफ्रिकाय् खनेदुगु खःसा आःतकया दुने हंगकंग, बेल्जियम, बोल्स्वाना, बेलायत, जर्मनी, अस्टे«लिया व इटालीइ खनेदयेधुंकूगु दु ।

न्हूगु संक्रमण खनेदयेवं युरोपेली संघ अन्तर्गतयागु देशं सोमवाःनिसें दक्षिण अफ्रिका, जिम्बावे, बोस्वाना आदि देशं वइपिं यात्रुतय्त प्रतिबन्धया घोषणा यायेधुंकूगु दु । अमेरिकां नं सोमवाः निसें च्यागू अफ्रिकी देशयात यात्रा प्रतिबन्ध तःगु दुसा अस्टे«लियां १४ न्हुया निंतिं अफ्रिकी देय्लिसेया उडान बन्द याःगु दु । भारतं नं अफ्रिकी देसं वइपिनिगु निगरानी तयेत व परीक्षण यायेत निर्देशन बिउगु दु । नेपालं नं दक्षिण अफ्रिकां वइपिंत अनिवार्य क्वारन्टिन च्वनेमाःगु निर्देशन बिइधुंकूगु दु ।