रोहिंग्या शरणार्थीं फेसबुक विरुद्ध मुद्दा तल, १५० अर्ब डलरया क्षतिपूर्ति माग

एजेन्सी- अमेरिका व बेलायतय् च्वनाच्वंपिं रोहिंग्या शरणार्थीतय्सं फेसबुक विरुद्ध मुद्दा तःगु दु । बिबिसीं बिउगु जानकारीकथं फेसबुकं अल्पसंख्यक रोहिंग्या शरणार्थीविरुद्ध घृणात्मक अभिव्यक्ति बिउगु द्वपं बिसें १५० अर्ब डलरया क्षतिपूर्ति माग याःगु दु ।

रोहिंग्या शरणार्र्थीया प्रतिनिधित्व यासें बेलायतया ल फर्मं फेसबुकयात रोहिंग्या शरणार्थीविरुद्ध घृणात्मक अभिव्यक्ति बिउगु व हिंसा अप्वयेकीगु समाग्री फेसबुक एकाउन्टं मलिकाःगु द्वपं बिउगु दु । अमेरिकाया सानफ्रान्सिकोय् नं फेसबुक विरुद्ध मुद्दा दायर जूगु दु । फेसबुकं (मेटा) थुकियात कयाः प्रतिक्रिया बिउगु मदुनि ।

म्यानमारय् सन् २०१७ य् सेनां याःगु कारवाहीलय् लानाः झिद्वलं मल्याक रोहिंग्या शरणार्थी सीगु खःसा लखंलख शरणार्थी बंगलादेशय् बिसिउँवंगु खः । म्यानमार सेनां हत्या, बलात्कार व मानव अधिकार हनन यानाः रोहिंग्यातय्त लिनाछ्वःगु द्वपं बियातःगु दु । सेनां धाःसा थ्व खँ अस्वीकार यानावयाच्वंगु दु ।

म्यानमारय् सुचं व समाचारया निंतिं दकलय् अप्वः फेसबुक छ््यलेगु याः । म्यानमारय् निगू करोडसिबें अप्वः फेसबुक प्रयोगकर्ता दु ।