राजनीतिइ याकनं हिउपाःया संकेत

संघीय संसदय् स्वब्वय् निब्व बहुमत दुगु केपी शर्मा ओलीया नेतृत्वया वर्तमान सरकारं न्हय्गू हे प्रदेशया प्रमुखतय्त चीकेगु नापनापं त्रिभुवन विश्वविद्यालया उपकुलपति व नेपाल मेडिकल काउन्सिलया अध्यक्ष नियुक्ति यायेगु ज्या याःगुयात संवैधानिक ज्या जूसां नं हथासं याःगु अले तसकं अर्थपूर्ण ज्या खः धकाः धाये फइगु अवस्था दु ।

थुगु कथं प्रदेश प्रमुखयात लिकायेगु व थीथी थासय् राजनीतिक नियुक्ति यायेगु ज्या हथासं जूगुयात प्रधानमन्त्री केपी शर्मा ओलीया स्वास्थ्य अवस्था नाप नं स्वानाच्वंगु विषय खः धकाः तकं धायेगु यानाहःगु दु ।

२०७४ सालया माघ ३ गते कामचलाउ हैसियतया जूगु शेरबहादुर देउवाया नेतृत्वया सरकारं वाम गठबन्धनपाखें तसकं विरोध जुइक जुइकं मन्त्रिपरिषद्पाखें न्हय्गू हे प्रदेशया प्रदेश प्रमुख नियुक्ति याःगु खःसा अबलय् सत्ता साझेदारी दल फोरम व राजपायात नं छगू छगू प्रदेशया प्रमुख बियाः मेगु न्यागू प्रदेशय् कांग्रेसं काःगु खः ।

आः ओली सरकारं दक्व हे प्रदेश प्रमुखयात लिकायेवं स्वयं आःया सत्ता साझेदारी दल समाजवादी पार्टी नेपालया भागय् लाःगु नं लाःगु दु । अबलय् देउवा नेतृत्वया सरकारं प्रदेश प्रमुखया रुपय् थःगु पार्टी कांग्रेसया भागय् लाःगु प्रदेश नम्बर १ य् गोविन्द सुब्बा, तत्कालिन फोरमया भागय् लाःगु प्रदेश नम्बर २ लय् रत्नेश्वरलाल कायस्थ, अथे हे कांग्रेसया हे भागय् लाःगु प्रदेश नम्बर ३ य् अनुराधा कोइराला, गण्डकी प्रदेशय् बाबुराम कुँवर, तत्कालिन सत्ता साझेदारी कथं राष्ट्रिय जनता पार्टी (राजपा) या भागय् लाःगु प्रदेश नम्बर ५ य् उमाकान्त झा, कांग्रेसया हे भागय् लाःगु कर्णाली प्रदेशय् दुर्गाकेशर खनाल व सुदूरपश्चिम प्रदेशय् मोहनराज मल्लयात नियुक्त याःगु खः ।

छन्हुं हे न्हापां पार्टीया सचिवालयया मुँज्या च्वनेगु अले हाकनं निक्वः तक मन्त्रिपरिषद्या बैठक च्वनाः छगू बैठकं प्रदेश प्रमुखतय्त लित कायेगु निर्णय यायेगु अले मेगु बैठकं नियुक्तिया कुतः यायेगु ज्या गुगु कथं जुल थ्व तसकं बिचाः याये बहःगु विषय जुयाबिउगु दु ।

तत्कालीन नेकपा (एमाले) व नेकपा (माओवादी) जानाः केपी शर्मा ओलीयात प्रधानमन्त्री दयेकेगु ज्या जुइवं अबलय् हे देउवा सरकारं याःगु दक्वं राजनीतिक निर्णय फातापुइकेगु धकाः निर्णय याःगु खः ।

०७५ साल असारय् च्वंगु मन्त्रिपरिषद्या बैठकं ला औपचारिक रुपं हे देउवा सरकारपाखें २०७४ भदौ १४ गतेनिसें फागुन २ गते तक याःगु सकतांकथंया राजनीतिक नियुक्ति बदर यायेगु निर्णय याःगु खःसा छुं नं कथंया विवाद मदुगु अवस्था अले सरकारयात ज्या मछिंकेगु ज्या यात धइगु खँ मदुनिगु हे इलय् २१ ला लिपा प्रदेश प्रमुखतय्त चीकेगु गुगु कथं निर्णय यात थ्व धइगु सामान्य खँ अवश्य नं मखु ।

छखे प्रधानमन्त्रीया स्वास्थ्य अवस्था झन्झन् स्यना वनाच्वन धकाः समाचार वयाच्वंगु, उकिसनं वालय् हे निक्वः स्वक्वः डाइलेसिस यायेमाःगु अवस्था वल धयाच्वंगु इलय् हे लाकाः छन्हुं हे न्हापां पार्टीया सचिवालयया मुँज्या च्वनेगु अले हाकनं निक्वः तक मन्त्रिपरिषद्या बैठक च्वनाः छगू बैठकं प्रदेश प्रमुखतय्त लित कायेगु निर्णय यायेगु अले मेगु बैठकं नियुक्तिया कुतः यायेगु ज्या गुगु कथं जुल थ्व तसकं बिचाः याये बहःगु विषय जुयाबिउगु दु ।

प्रदेश प्रमुखत चीकेगु सवालय् गुकथं सरकारं निर्णय यात, थ्व सवालय् सरकारया नेतृत्व यानाच्वंगु नेपाल कम्युनिष्ट पार्टी (नेकपा) दुने छगू मत दु तर नियुक्ति यायेगु सवालय् धाःसा फरक मत दु अर्थात भागबन्डा जुइगु संकेत दु धकाः छन्हुं हे निक्वः तक बैठक च्वनाः याःगु निर्णय व कुतलं स्पष्ट याना बिउगु दु ।

प्रदेश प्रमुखत मदयाः संवैधानिक रुपं ज्या याना वनेगु सवालय् समस्या मजुइमा धकाः याकनं हे नियुक्ति याइगु नं स्वाभाविक हे खः, तर सत्ता साझेदारी दल समाजवादी पार्टीया छम्ह प्रदेश प्रमुख दुगु अवस्थाय् आः हाकनं उगु पार्टीयात भाग थ्याइ कि मथ्याइ धइगु खँ नं थ्व इलय् चर्चाया विषय जुयाच्वंगु दु ।

प्रदेश प्रमुखतय्त लित कायेगु नापं नियुक्ति यायेगु सवालया नापनापं त्रिभुवन विश्वविद्यालयया उपकुलपतिइ प्रा. डा. धर्मकान्त बाँस्कोटा अले नेपाल मेडिकल काउन्सिलया अध्यक्षय् प्रा. डा. भगवान कोइरालायात नियुक्ति यायेगु ज्या नं गुगु कथं ओली सरकारं यात थुकिं याना आः राजनीतिक नियुक्ति यायेगु ल्यं दनिगु दक्वं थासय् नं हथाय् पथासं हे निर्णय याना वनीगु संकेत क्यंगु दु ।

ओली सरकारं अथे हथासं निर्णय यायेगु ज्या गुगु कथं जुल उकिया अर्थ सरकारया नेतृत्व यानाच्वंगु दल नेपाल कम्युनिष्ट पार्टी (नेकपा) दुने नं ब्यापक रुपं हे तरंगित जुयाच्वंगु दु अले पार्टी दुने च्वंनिसें क्वथ्यंकं छगू कथं आः पार्टीं छुं यायेत्यंगु दु धकाः सहलह जुइगु अले कार्यकर्तानिसें शुभचिन्तकतय्सं तकं चिउताः तया हयाच्वंगु स्वाभाविक हे खः ।

विना कारण, विना प्रसंग हथासं सरकारं याःगु थुकथंया निर्णय अले विगतया ज्यायात स्वयाः केपी शर्मा ओली धाइम्ह थःगु पार्टीया नेता कार्यकर्तातय्गु नितिं स्वइम्ह, छम्ह कठोर निर्णय यानादीम्ह नापं अडानय् च्वनादीम्ह खः धइगु प्रमाणित याःगु टिप्पणी यानाहःगु दु ।

छुं जुयाः नेपाल कम्युनिष्ट पार्टी (नेकपा)या हे मेम्ह अध्यक्ष पुष्पकमल दाहाल प्रचण्ड प्रधानन्त्री जुयादीगु अवस्थाय् थुकथं निर्णय याइमखु धकाः स्वयं प्रमुख प्रतिपक्ष दल नेपाली कांग्रेसया नेता कार्यकर्तातय्सं तकं धायेगु यानाहःगु दु । ओली सरकारं लिपांगु इलय् याःगु निर्णयया तसकं तःधंगु अर्थ दु । थुकिं अवश्य नं छुं वाःया दुने हे सरकारय् नं हिउपाः वयेफुगु संकेत बियाच्वंगु दु ।

छखे प्रधानमन्त्री ओलीया स्वास्थ्यया खँ मेखे ओली व प्रचण्डया दथुइ पालंपाः प्रधानमन्त्री जुइगु धकाः यानातःगु भद्र सहमतिया खँ अले मेखे उप निर्वाचनयात ध्यानय् तयाः थुकथं हथासं प्रदेश प्रमुखतय्त लिकायेगु ज्याः याःगु खयेमाः धकाः धायेफइगु अवस्था दु । उकिं नं धायेफु कि प्रदेश प्रमुखत चीकेगु ज्यां अवश्य नं नेपाःया राजनीतिइ याकनं हे हिउपाः वइगु संकेत बियाच्वंगु दु धकाः धायेफइ ।

सम्बन्धित बुखँ

LEAVE YOUR COMMENTS