ने. सं. ११४४ कौलाथ्व षष्ठी -

शिकागोय् नेपाः खंकाबिज्याःम्ह डा. अनोजा गुरुमां

केशरमान ताम्राकार

नेवाः अमेरिकन दबूपाखें शिकागोय् नेपाल संवत् ११३१ निसें दँय्दसं न्हूदँ हनेगु ज्या याना वयाच्वंगु खः । न्हूदँ समारोहया लिसेलिसें म्हपुजा नं गबलें गबलें न्ह्याका यंकाच्वंगु दु । थ्व हे झ्वलय् नेपाल संवत् ११३५ य् नं ज्याझ्वःया ग्वसाः ग्वयागु जुल, म्हपुजा व न्हूदँ समारोह यायेत ।

न्ह्याबलें थें समारोहस छम्ह विशिष्ट नेवाः व्यक्तिपाखें त्वाःदेवाय् मत च्याकाः उलेज्याझ्वः याकेगु व मेम्ह विशिष्ट पाहांपाखें नेवाः अमेरिकन दबूया ख्वाःपौ ‘शिकागो नेवाः’या चिखि फ्यनेज्या (विमोचन) यानादी । उगु इलय् समारोहया उलेज्या याकेत विशिष्ट व्यक्ति माला च्वनागु इलय् लाक्क डा. अनोजा गुरुमां शिकागोय् च्वनाच्वंम्ह कमला कुँवरयाथाय् बिज्यानाच्वंगु खँ सिल । जिमित ला अगःचा मालां देगःचा लू थें जुल ।

खय्तला अनोजा गुरुमांया नां न्हापांनिसें न्यनातयागु खः । वय्कःया च्वसुत नं ब्वनागु खः । थिथि ख्वाः धाःसा गबलें नं चूमलाःनि । अथे खःसां छक्वःलं हे वसपोलायत मूपाहां दयेकेगु खँ क्वःजित । वसपोलयात जिमिगु ज्याझ्वलय् मूपाहां जुयाः ज्याझ्वःया उलेज्या यानाबिज्यायेत निमन्त्रण छ्वया । वसपोल तसकं लय्तायाः ज्याझ्वलय् बिज्यायेगु खँ कनाबिज्यात । जिपिं नं सकलें लय्ताया ।

नेपाल संवत् ११३५ म्हपुजाया दिंकुन्हु सनिलय् पाय्छि ई स्वयां न्ह्यः हे वसपोल चीवर वस्त्रय् जिमिगु समारोह स्थलस बिज्यात । वसपोल बिज्यायेवं हल छगुलिं जाज्वल्यमान जुल । सकसिगुं मिखा वसपोलपाखे हे केन्द्रीत जू वन । यक्वसिनं मखंनिम्ह छम्ह तेजं जाःम्ह वसपोल गुरुमांयात खं बलय् मती नं तल जुइ, वसपोल हे थौंया मू व्यक्तित्व, मू पाहां, हनेबहम्ह जुइ । मूपाहां जुयाः बिज्याःसां वसपोलया पह, व्यवहार मूपाहांयाके खने दइगु थेंज्याःगु पोज खनेमदु । ज्याझ्वलय् ब्वति कायेत वःम्ह छम्ह साधारण व्यक्ति थें खनेदु ।

वसपोल बिज्यायेवं मेचय् फ्यतुना बिमज्याः । अन ब्वति कायेत वयाच्वंपिं सकललिसे भ्यलय् पुना बिज्यात । सकललिसे नतुसुतु ब्याकाबिज्यात । वसपोलया थुकथंया व्यवहार, पह खनाः ज्याझ्वलय् ब्वति कायेत वयाच्वंपिं सकलें प्रभावित जुल, सकलें उतिकं लय्ताल । वसपोललिसे थित्तुंथीक वनाः खँ ल्हायेत न्ह्यचिल । खँल्हाबल्हाया लिसेलसें ज्याझ्वः मन्ह्याःतले वसपोल सकलनाप खँल्हाबल्हा यायेगुलिइ हे व्यस्त जुयाबिज्यात । किपा काये न्ह्याःपिंलिसे किपा नं कयाबिज्यात । न्ह्याबलें न्हिला ख्वालं भय्बिका च्वनाबिज्याइम्ह वसपोल सकसियां यःम्ह पात्र जुयाबिज्यात ।

सभा हल छगुलिं जाये धुंकल । ज्याझ्वः न्ह्यायेत्यंगु सुचं माइकलं थ्वल । नेवाः अमेरिकन दबूया नायःकथं जिं वसपोलयात स्वांमाः लःल्हानाः वसपोलयात दबुलिइ लसकुस याना । अथे हे लिउ नायः श्रवणकुमार श्रेष्ठं खादा क्वखायेकादिल । वसपोलया ल्हातं च्यानाच्वंगु सुकुन्दां दबूया जवंखवं तयातइगु त्वाःदेवाय् मत च्याकाः नेपाल संवत् ११३५ न्हूदँ समारोहया उलेज्या यानाबिज्यात । जिमिगु इनापकथं वसपोलं छत्वाःचा नुगःखँ नं तयाबिज्यात । दकलय् न्हापां बौद्ध स्त्रोत (श्लोक), अनंलि न्हापां वसपोल तथागत भगवान बुद्धयात वन्दना । अले आयोजकलिसें शिकागोय् च्वनाच्वंपिं झी सकल नेवाः दाजुकिजा तताःकेहेंपिं सकसिगुं मंगल कामना, ताःआयुया कामनालिसें निरोगीया कामना यानाबिज्यात ।

वसपोलं थः सभाहल दुने दुहां वयाखतं अमेरिका धकाः छफुति हे अनुभव मजूगु व झीगु देय् नेपाः थें ताःगु खँ कनाबिज्यासे थःत तसकं न्ह्यइपुसे च्वंगु खँ कनाबिज्यात । वसपोलं उलेज्या यानाबिज्याःगु न्हूदँया ज्याझ्वः म्हपुजालिसें तःजिगु सांस्कृतिक ज्याझ्वः यासें क्वचाल । ज्याझ्वः लिपा नं अन वयाच्वंपिं यक्वसिनं वसपोललिसे किपा कायेगु ह्वःताः चूलाकल । सकलें वसपोललिसे लिक्क च्वनाः किपा काये खंगुलिं तसकं लय्ताया च्वन । थ्व छगू अविष्मरणीय क्षण जुल शिकागोय् च्वंपिंत ।
वसपोल डा. अनोजा गुरुमांलिसे जिगु दकलय् न्हापां म्हसीका कालबिल नं अबलय् हे जूगु खः । तर खँ थुली हे सीमित मजू । छवाः लिपा छगू ज्याझ्वः परित्राण पाठ व भोजनय् नाप लात । थुगु ज्याझ्वः जिगु छेँ जःखः जिमि ससःकेहें जुनुकमल तुलाधर व जिलाजं सर्वज्ञधर तुलाधरया छेँय् जूगु खः । थन नं वसपोलपाखें बुद्धया थीथी सन्देश व बांबांलाःगु खँ न्यने खन ।
छुं ई लिपा वसपोल नेपाः लिहां बिज्यात । नेपाः लिहां बिज्याःसां वसपोलं जिमित, जितः ल्वंममंका बिज्याःगु जुयाच्वन । वसपोलं हे फोन यानाबिज्याइ । दकलय् न्हापां सुस्वास्थ्य, निरोगीया कामना यानाः सुवाः बियाबिज्याइ । छझाः न्ह्यइपुक खँल्हाबल्हा जुइ । वसपोलया सः न्यनेगु हे जिगु लागि छगू न्ह्यइपुगु क्षण जुयाबी । वसपोलं अथे फोन याना बिज्याइबलय् न्ह्याबलें जितः दाइ धकाः संबोधन यानाबिज्याइ । वसपोलया थीथी ज्याझ्वःया बारे कनाबिज्याइ । अमेरिका वयेगु छुं न्हूगु ज्याझ्वः दुसा व नं कनाबिज्याइ ।
अथे हे जिगु निंतिं मेगु छगू लसताया व वसपोलयात च्वछायेबहगु खँ खः जिगु हे सम्पादनय् पिदनाच्वंगु नेवाः अमेरिकन दबूया ख्वाःपौ ‘शिकागो नेवाः’ नेपाल संवत् ११३७ य् पिदंगु स्वंगूगु ल्याखय् वसपोलया तसकं लोकंह्वाःगु च्वसु ‘मनू व पशुतय् दथुइ फरक’

थुकथं तसकं हनेबहम्ह डा. अनोजा गुरुमां मत्यवं मदुगु बुखँ न्यनाः जिलिसें शिकागोया सकल नेवाः व नेवाः अमेरिकन दबूया नुगः थुं दिउ । मिखां ख्वबि हाः । श्रद्धेय अनागारिका डा. अनोजा गुरुमां नं मत्यवं झीत त्वःताः बिज्यात । वसपोलया नुगलय् दनीगु पूमवंनिगु ज्यायात झी सकसिनं तिबः बियाः पूवंकेगु हे वसपोलप्रति धाथेंया श्रद्धाञ्जली देछायेगु ज्या जुइ । वसपोल सुखावति भुवनय् बास लानाः निर्वाणया लँपु लायेमा धकाः आशिका याना ।

(च्वमि अमेरिकाया शिकागोय् च्वनादी ।)