फ्रास्ट-ट्रयाक अदालत स्थापना यायेगु मोदीया घोषणा

दिल्ली – भारतया प्रधानमन्त्री नरेन्द्र मोदीं न्ह्यसःपौ पिहां वंगु घटनायात कयाः थुकी संलग्न जूपिंत याकनं व कडा सजाय बीगु घोषणा याःगु दु । प्रधानमन्त्री मोदीं एनइइटीया न्ह्यसः पौ पिहां वःगु घटनाय् देय्न्यंकं तच्वकं विरोध प्रदर्शन जुयाच्वंगु इलय् थुगु ज्याय् संलग्न जूपिं याकनं व कडा सजाय बीत फास्ट-ट्रायक अदालत स्थापना घोषणा याःगु खः ।

प्रधानमन्त्री मोदीं देय्या ल्याय्म्हतय्गु कल्याण व भविष्य थःपिनिगु प्राथमिता जूगु धासें ल्याय्म्हतय् भविष्यनाप म्हितीपिं न्ह्याम्ह हे जूसां सुयातं मत्वःतेगु स्पष्ट यासें सम्बन्धित निकाययात आश्वयक सकतां प्रक्रिया तत्काल न्ह्याकेत नं निर्देशन बिउगु दु ।

सामाजिक सञ्जाल एकसपाखें मोदीं ल्याय्म्हतय् भविष्य सरकारया सर्वोच्च प्राथमिकताय् लाःगु न्ह्यथँसें न्ह्यसःपौ सार्वजनिक यायेगु ज्याय् संलग्नयात कानुनी दायराय् हयाः फक्व याकनं सजाय सुनिश्चित यायेत विशेष अदालत गठन यायेगु निर्णय जूगु धाःगु दु ।

मोदीया थुगु घोषणा लिपा कांग्रेस नेता राहुल गान्धीं ल्याय्म्हतय् भविष्ययात कयाः दकलय् अप्वः क्षति मोदीं हे याःगु द्वपं बिउगु दु । लिसें शिक्षामन्त्री धर्मेन्द्र गान्धीया राजीनामा मागया विरोध प्रदर्शनय् कुहां वःपिं विद्यार्थीतय्त दमन याःपिंत कारवाही यायेत नं माग याःगु दु ।