बागमतिइ सुनां सरकार दयेकी ?
नेकपा-एमाले गठबन्धनया निंतिं राप्रपाया साथ आवश्यक
येँ (नेपालभाषा टाइम्स) – बागमति प्रदेसय् एमालेया खुम्ह मन्त्रीतय्सं राजीनामा बिइवं मुख्यमन्त्री इन्द्र बानियाया सरकार अल्पमतय् लाःगु दु । थुकिया लिसें आः सुनां सरकार दयेकी धयागु चर्चा सुरु जूगु दु ।
कांग्रेस व एमालेया गठबन्धन त्वाःदलेवं बागमति सरकार दयेकेगु ज्याय् मू भूमिका राष्ट्रिय प्रजातन्त्र पार्टीया जुइगु खनेदुगु दु । एमालें कांग्रेसयात साथ त्वःतेवं सरकार गठन यायेगु निंतिं नेपाली कम्युनिष्ट पार्टी (नेकपा)लिसे खँल्हाबल्हा न्ह्याकेधुंकूगु दु । तर थन सरकार दयेकेगु निंतिं एमाले व नेकपाया सांसदतय्सं जक मगाःगुलिं न्हूगु सरकार दयेकेगु ज्याय् मू भूमिका राप्रपाया खनेदयावःगु खः । संसदय् बहुमतया निंतिं हाम्रो नेपाल पार्टीया निम्ह सांसद दःसा गाः, तर एमालेया छम्ह सांसद प्रदेश सभाया उपसभामुख जुयाच्वंगुलिं सरकार दयेकेत मतदान यायेबलय् कानुनी जटिलता वइगुलिं नं आः राप्रपा प्रमुख खेलाडी कथं न्ह्यःने वःगु खः ।
एमाले मन्त्रीतय्सं राजीनामा बीधुंकाः नेकपाया संयोजक पुष्पकमल दाहालं एमाले व कांग्रेस लिसें हाम्रो नेपाल पार्टी व राप्रपालिसे सरकार गठनया निंतिं खँल्हाबल्हा न्ह्याके धुंकूगु दु । दाहालं एमाले, कांग्रेस व नेकपा जानाः सरकार दयेकेगु कुतः यानाच्वंगु खःसां कांग्रेस प्रतिपक्षविहिन यानाः सरकार दयेकेत तयार जुयाच्वंगु मदु ।
बागमति सरकार दयेकेगु निंतिं ५३ म्हेसिया बहुमत माः । वंगु प्रतिनिधिसभाया निर्वाचनया निंतिं खुम्ह सांसदतय्सं राजीनामा बधिुंकूगुलिं थौंकन्हय् बागमतिइ १०४ म्ह जक सांसद कायम दु । थ्व ल्याखं ५३ म्ह सांसद दत धाःसा सरकार दयेकेफइ । तर एमाले व नेकपाया सांसदत यानाः मुक्कं ५१ म्ह जक दु । हानेपाया निम्ह सांसद दुथ्याकल धाःसा ५३ म्ह ला थ्यनी, तर एमालेपाखें उपसभामुख जुयाच्वंम्ह अप्सरा चापागाईनं मत बिया सरकार दयेकेल धाःसा कानुनी समस्या वयेफु ।
संविधानया धारा १८६ कथं सभाअध्यक्ष यानाच्वंम्हेसिनं मत बीमदु । थौंकन्हय् बागमति प्रदेश सभाय् सभामुख मदुगुलिं उपसभामुख चापागाइनं हे सभाया अध्यक्षता याकाच्वंगु दु । कोशी प्रदेशय् न्हापा उद्धव थापां सभामुखया मत कयाः बहुमत खाकाः सरकार दयेकूबलय् सर्वोच्च अदालतं उकियात बदर यानाबिउगु खः । सर्वोच्चं मत बराबर जूगु अवस्थाय् जक सभाध्यक्षय् मत बीदइ, सरकार गठन यायेमाल धायेवं तुं मत बीदइमखु धासें मुख्यमन्त्रिया नियुक्ती हे बदर यानाबिउगु खः । थुकिं यानाः नं बागमतिया उपसभामुख चापागाईंया मत मान्य जुइमखु । अथे जूबलय् राप्रपाया बागमतिइ सरकार दयेकेगुली प्रमुख भूमिका खनेदःवःगु खः ।
राप्रपाया संसदीय दलया नेता उद्धव थापां सरकारय् थःपिं वंसां मवंसां प्रदेशयात अनिर्णयया बन्दी मदयेकेगु धाःगु दु । यदि नेकपा व एमाले गठबन्धनं सरकार दयेकल धाःसा राप्रपां समर्थन याःगु संकेत वय्कलं बियादीगु दु ।
स्वम्ह मन्त्रीयात जिम्मेवारी क्वःछित
थ्वहे झ्वलय् प्रदेशया विना विभागीय मन्त्रीतय्त जिम्मेवारी बिउगु दु । सत्ता गठबन्धनं एमालें पिहां वनेवं मुख्यमन्त्री इन्द्रबहादुर बानियाँ स्वम्ह विना विभागीय मन्त्रीया जिम्मेवारी क्वःछिउगु खः । कांग्रेसया विना विभागीय मन्त्री विनु रायमाझीयात भौतिक पूर्वाधार विकास मन्त्रालय, सुरेश श्रेष्ठयात उद्योग, पर्यटन, श्रम तथा यातायात मन्त्रालय व उर्मिला नेपालयात कृषि पशुपन्छी वन तथा वातावरण मन्त्रालयया जिम्मेवारी क्वःछिउगु खः ।
LEAVE YOUR COMMENTS