ने. सं. ११४६ दिल्लाथ्व दशमी -

लियोनल मेस्सी विश्वकपया उत्कृष्ट कासामि

एजेन्सी – अर्जेन्टिनाया कप्तान लियोनल मेस्सी नकतिनि जक क्वचाःगु फिफा मिजं विश्वकप फुटबलया ‘सर्वोत्कृष्ट कासामि’ घोषित जूगु दु ।

इन्टरनेसनल फेडरेसन अफ फुटबल हिस्ट्री एन्ड स्ट्याटिस्टिक्स (आईएफएफएचएसं) अर्जेन्टिनाया राष्ट्रिय फुटबल टिमया कप्तान मेस्सीयात सन् २०२६ या सर्वोत्कृष्ट कासामि घोषित याःगु खः । मेस्सीयात विश्वकपया सर्वोत्कृष्ट कासामि घोषणा यासें प्रतिष्ठित व्यक्तिगत सम्मान ‘आईएफएफएचएस बेस्ट प्लेयर २०२६’ लःल्हाःगु खः ।

संस्थायाकथं थ्व उपाधि उत्कृष्ट कासामि छनोटया निंतिं उम्ह कासामिं याःगु प्रदर्शन, मूल्यांकन, गोल, एसिस्ट व विशेष यानाः नकआउट चरणय् याःगु प्रदर्शनया सूचकया लिधंसाय् क्वःछीगु खः । थुकी कासा म्हितूगु ई, गोल, एसिस्ट, नकआउट चरणय् लाकूगु प्रभावया डेटाय् आधारित कडा मापदण्डपाखें विश्लेषण यानागु संस्थां न्ह्यथंगु दु ।

फिफा विश्वकप २०२६ य् दक्वं कासामिया प्रदर्शनया विस्तृत अध्ययन लिपा मेस्सीयात सर्वोत्कृष्ट कासामिया रुपय् छनोटयानागु आईएफएफएचएसं न्ह्यथंगु दु ।

मेस्सीं क्वचाःगु विश्वकप फुटबलय् समूह व नकआउटया कासा नापं यानाः मुक्कं ८ गू कासा म्हितेगु झ्वलय् ८५३ मिनेट ई म्हितूगु खःसां आईएफएफएचएसं क्वःछिउगु ‘प्लेयर पर्फमेन्स इन्डेक्स’ मूल्यांकन व मापदण्डकथं मेस्सीं ७ गू कासा म्हिताः ६२६ मिनेट मैदानय् ई छ्याःगु खः ।

थ्व अवधिइ मेस्सीं च्यागू गोल यायेगु व प्यंगू गोलया निंतिं अवसर सिर्जना (एसिस्ट)याःगु खः । गुकिं अर्जेन्टिनाया यात्राया निर्णायक भूमिका नं म्हितूगु खः ।

मुक्कं १२ गू गोलया निंतिं प्रत्यक्ष योगदान बिउम्ह मेस्सीया औसत कासाय रेटिङ ८.३३ अंक दु । गुगु कासाज्वःछि हे दकलय् अप्वः उत्कृष्ट प्रदर्शनमध्ये छगू खः । संस्थां समूह चरणनिसें नकआउट व फाइनल तक मदिक्क उच्चस्तरय् प्रदर्शन याःगु व मेपिं कासामि स्वयां गाक्कं न्ह्यःने लाःगु खँ न्ह्यथंगु दु । समूह चरण निसें फाइनल तक मदिक्क याःगु उच्च प्रदर्शनया कारणं हे मेस्सी मेपिं कासामि स्वयां न्ह्यःने लाःगु व वयागु थ्व हे प्रदर्शनया कारणं थ्व उपाधिया निंतिं हकदार तकं जूगु उगु संस्थां न्ह्यथंगु दु ।

दबावपूर्ण अवस्थाय् तकं हारे मचासेमदिक्क उत्कृष्ट प्रदर्शन यायेगु मेस्सीया क्षमतां मेपिं कासामि स्वयां बिस्कं जूगु संस्थाया धापू दु । विशेष यानाः नकआउट चरणय् क्यंगु निर्णायक कासायात अप्वः भार बियाः मूल्यांकन यानागु न्ह्यथंसें तथ्यांककीय प्रमाण व प्रदर्शनया निष्पक्ष रेकर्डया लिधंसाय् मेस्सी मेपिं दक्वं कासामि स्वयां उत्कृष्ट सावित जूगु संस्थां स्पष्ट याःगु दु ।

सन् १९९१ निसें फुटबलया तथ्यांक व उत्कृष्टतायात सम्मान यासें संस्थां मेस्सीयात गुगुं भावना वा वयागु नांया लिधंसाय् मखसे शुद्ध तथ्यांक व प्रमाणया लिधंसाय् विश्वकपया हे सर्वोत्कृष्ट कासामि घोषणा यानागु संस्थां धाःगु दु । संस्थां सन् १९९१ निसें हे विश्व फुटबल कासाय् उत्कृष्ट प्रदर्शन याःम्ह कासामि, प्रशिक्षक व मेमेगु विधाया प्रतिभायात नं थुकथं सम्मान याना वयाच्वंगु दु ।

विश्व फुटबलय् याःगु उत्कृष्ट प्रदर्शनया तथ्यांक संकलन, विश्लेषण व सम्मान याना वयाच्वंगु संस्थां मेस्सीयात लःल्हाःगु थ्व सम्मान विश्व फुटबलय् वयागु उत्कृष्ट योगदानया मेगु छगू तःधंगु व महत्वपूर्ण उपलब्धिया रुपय् काःगु दु ।

विश्वकपया निंतिं मेस्सीयात लःल्हाःगु ‘आईएफएफएचएस बेस्ट प्लेयर’या थ्व सम्मान न्हापांखुसी २०२६ संस्करणय् सार्वजनिक रुपं लःल्हाःगु न्हूगु सम्मान नं खः ।