ने. सं. ११४६ दिल्लाथ्व दशमी -

साउदी अरेबिया व अमेरिकाया दथुइ परमाणु सम्झौता

बीबीसी – साउदी अरेबिया व अमेरिका दथुइ महत्वपूर्ण परमाणु सम्झौता जूगु दु । थ्व सम्झौतां खाडी राष्ट्रया निंतिं गैरसैनिक परमाणु ज्याझ्वः विकास यायेत ग्वाहालि याइ धाःगु दु ।

अमेरिकी ऊर्जा मन्त्रालयं थ्व ‘शान्तिपूर्ण परमाणु ग्वाहालि सम्झौता’ जूगु व थ्व सम्झौतां साउदी अरेबियाया परमाणु ऊर्जा ज्याझ्वलय् अमेरिकी कम्पनीतय्त तःधंगु भूमिका म्हितेगु ह्वःताः दइ धाःगु दु ।

अमेरिकी उर्जा मन्त्री क्रिस राइट व साउदी उर्जालिसें खनिज स्रोत व उद्योग मन्त्री अब्दुल अजिज बिन सलमानं शान्तिपूर्ण व महत्वपूर्ण परमाणु सम्झौता पती ल्हाःचिं तःगु दु । सम्झौताया पूवंक विवरण धाःसा पित बिउगु मदुनि । अमेरिकी संचारमाध्यमतय् कथं थ्व सम्झौतां भविष्यय् साउदी अरेबियाया युरेनियम प्रशोधन यायेत अनुमति बी फइगु सम्भावना दु ।

विश्लेषकतय्सं अमेरिका व साउदी अरेबिया दथुइ जूगु थ्व सम्झौतां मध्यपूर्वय् जुयाच्वंगु अस्थिरता अप्वयेकीगुलिसें वइगु दिनय परमाणु प्रसारया खतरा अप्वयेकी धाःगु दु । अमेरिकी ऊर्जा मन्त्रालयं धाःसा थ्व सम्झौता द्विपक्षीय सुरक्षा सहमति धाःगु दु ।

अमेरिकां पित बिउगु विज्ञप्तिइ धयातःगु दु, ‘थ्व सम्झौता दशकौंतक न्ह्याइगु व थुकिं अर्बौं डलरया साझेदारीया निंतिं कानुनी आधार तयार याइगु व आणविक अप्रसारसहित यक्व हे प्राथमिकता दुगु आर्थिक व रणनीतिक आज्जुइ थ्यंकेफइ ।’

साउदी सरकार नं न्हूगु सम्झौतां निगू देय् दथुइ ऊर्जा ख्यलय् विद्यमान ग्वाहालियात विस्तार याइ धाःगु दु । अमेरिका व इरान दथुइ हाकनं द्वन्द्व तच्वया वनाच्वंगु इलय् जूगु थ्व सम्झौतां न्हूगु अनिश्चितता ब्वलंगु व इरानलिसेया जारी युद्ध नियन्त्रणं पिहां वनेफुगु संकेत खने दयाच्वंगु इलय् ट्रम्पं मेगु छगू तःधंगु भूराजनीतिक जोखिम ल्ह्वंगु चर्चा अन्तर्राष्ट्रिय ख्यलय् शुरु जूगु दु ।