युवा कोरियोग्राफर निशिला

हुलाप्याखं यानिकि डान्सया ख्यलय् थःगु प्रतिभा न्ह्यब्वया वयाच्वंम्ह छम्ह युवा कोरियोग्राफर खः– निशिला शाक्य । नीखुदँया वैंशय् क्यंम्ह निशिला थौंकन्हय् एपिवन टिभिइ वइगु “बुगीवुगी” नांया डान्स रियालिटि शोलिसे स्वापू दुम्ह मय्जु खः ।

थ्व “बुगीवुगी” ज्याझ्वलय् रोहिया महर्जन, प्रशान्त तामाङ व नरेशबीर सिंह नापं यानाः स्वम्ह कोरीयोग्राफरपिंसं मू भूमिका म्हिता वयाच्वंगु दुसा उकी मध्ये नरेशवीर सिंहया पुचलय् च्वनाः एसिस्टेन्ट कोरीयोग्राफर जुयाः ज्या याःम्ह निशिला झी संगीतकार नील शाक्यया म्ह्याय् खः । छम्ह संगीत सर्जकया म्ह्याय् जूगुलिं वयागु परिवार कलाकारिताय् नुगः क्वसाःपिं खः धइगु याउँक हे क्यं ।

मचांनिसें डान्स धालकि हुरुक्क हे जुइम्ह निशिलां टिभिइ वःगु डान्स स्वयाः स्वयाः हे डान्सया न्हापांगु ज्ञान हासिल याःगु खः । मचाबलय् प्याखं हुलेगु धालकि निपलाः न्ह्यचिलीम्ह जूगु व वंवंथाय् लकस हे संगीतमय जुइगु खः । विशेष यानाः पाजुपिंथाय् वनीबलय् थःथितिपिंसं वयात प्याखं हुइकीगु खःसा व नं छु कम धकाः, प्याखं हुलेदतकि घौबाघौतक याउँक हे प्याखं हुलाच्वनीगु जुयाच्वन ।

मचाबलय्या थ्वहे पहलं वयात थौं छम्ह प्रतिभाशाली कोरीयोग्राफरया रुपय् न्ह्यःने थने हःगु दु ।दच्छिति न्ह्यः जक निशिलां नेपाःया नांजाःम्ह म्येहालामि देविका बन्दनाया हिन्दी म्ये “अब दिल जरा जरा”या म्युजिक भिडियोय् नं कोरीयोग्राफि याःगु खः । थ्व म्ये भारतया नांजाःगु कम्पनी भिनसपाखें रिलिज याःगु खः ।

थुकथं नच्चागु वैंशय् छम्ह कोरीयोग्राफरया रुपय् थःगु न्हाय् धस्वाकेत ताःलाःम्ह निशिला शाक्य थनतक याउँक थ्यंगु धाःसा मखु । उकिया निंतिं चान्हन्हिन मधासे साधना याःगु दु । न्यादँसिबें अप्वः ला भारतय् च्वनाः नृत्यकलाया अध्ययन याःगु दु । वयागु धापू कथं, “प्याखं हुले सयेकेत शायद उलि थाकु मजू जुइमाः तर नृत्य दुने दुबिनाच्वंगु कलात्मकता आत्मसात यायेत छगू साधना माः ।

आत्मविश्वास माः । धैर्य माः । थौंया कन्हय् हे जुइमखु ।” थः अबु नं कलाख्यलय् हे भ्यलय्पुंम्ह नांजाःम्ह संगीतकार जूगुलिं थःत थ्व ख्यलय् पलाः न्ह्याकेत अःपुगु खँ न्ह्यथनीम्ह निशिलां नाईटिंगेल उच्च माध्यामिक विद्यालयय् आखः ब्वंगु खःसा स्कूलया इलंनिसें हे हुलाप्याखंपाखे थःगु पलाः न्ह्याकेगु शुरु याःगु खः ।

निशिलां स्कूलय् आखः ब्वनाच्वंगु इलय् हे टिभीइ वइगु डान्स रियालिटी शो स्वयाः उकीया कथं थःम्हेसिनं छेँय् न्हाय्कं न्ह्यःने च्वनाः डान्स यायेगु कुतः याइगु जुयाच्वन । उगु इलय् विशेष यानाः हिन्दी च्यानलय् वइगु डान्स इन्डिया डान्स नांयागु रियालिटि शो खनाः प्रभावित जूम्ह निशिला अज्याःगु रियालिटिया जज रेमो डि’सुजाया पहःचहः खनाः प्रभावित जूगु जुयाच्वन ।

लिपा निशिलां रेमोया जीवनी नं ब्वन । जीवनी ब्वने धुंकाः ला रेमोयात वं थः आदर्श पुरुष हे भाःपिल । मचाबलय् वं थथे याःगुया लिच्वः कथं लिपा वनाः वयागु जीवनय् रेमो थेंज्याःम्ह भारतया तसकं नांजाःम्ह कोरीयोग्राफरलिसे ज्या यायेगु ह्वःताः नं चूलात ।

स्वअध्ययनं हे नृत्यकलाया बारे ज्ञान कयाः पलाः न्ह्याकूम्ह निशिला शाक्यं झिगू तगिंतक ला हुलाप्याखंयात शोखया रुपय् जक कयाच्वंगु खःसा एसएलसी पास जुइवं कलेज जीवन शुरु याःबलय् अर्जुन गौतम नांयाम्ह कोरीयोग्राफरलिसे दकलय् न्हापां औपचारिक रुपं ज्ञान कायेगु शुरु याःगु खः ।

अनं लिपा निशिलां भारतया बैंग्लोरय् अट्टकलरी सेण्टर फर मुभमेन्ट आर्ट नांयागु स्यनाकुथिइ वनाः डान्सय् डिप्लोमा यात । अन ब्वनेगु झ्वलय् हुलाप्याखंया म्युजिकल थिएटरया रुपय् दुग्यंक्क ज्ञां काल । नृत्यकलाया छगूछगू पक्षयात कयाः दुग्यंक अध्ययन यानाःलि निशिला बलिउड धकाः नांजाःगु मुम्बई फिल्म नगरीपाखे स्वयावन ।

अन वं श्यामक डाबरलिसे निदँ नापं सहायक जुयाः ज्या यात । थ्व निदँया दुने “जाने जिगर” नांयागु म्युजिकल थिएटर नं यातसा निशिलां थः आदर्श नालातःम्ह रेमो डि’सुजालिसे म्युजिकल एडय् नं ज्या याये खन । थुकथं नच्चागु वैंशनिसें हे थःत नृत्य कलाकारिताय् समर्पण याःम्ह निशिलां नेपालय् आपालं प्रोग्रामय् थःगु हुलाप्याखंया कला न्ह्यब्वयेधुंकूगु दु ।

“नृत्यकला धइगु छगू तसकं तब्यागु ख्यः । थन आपालं आपाः प्रतिभावान मनूत दु । अले छम्हथे मेम्ह गुबलें जुइमखु । जिं याःथें मेम्हं याइमखु वा याये फइमखु अले मेम्हं याःथें जिं यायेफइमखु । थ्व खँयात थुइकाः छम्ह कलाकारया प्रतिभायात गुकथं न्ह्यब्वयेफइ धइगु खँय् न्ह्याब्लें ध्यान तया च्वनेफत धाःसा जक थः सफल जुइ फइ” धकाः दुग्यंगु बिचाः प्वंकूम्ह निशिला शाक्यया बिचाः कथं थौंकन्हय् थीथी त्वह चिनाः नेपाःया युवा विदेशय् पलायन जुयाच्वंगु खं तसकं नुगः मछिनेयः ।

वयागु बिचाः कथं विदेशय् शिप सयेके जिउ, तर व अन सयेकागु शीप अन हे मी मजिउ । नेपालय् वयाः छ्यलेमाः धइगु खनेदु । निशिला नेपालय् च्वनाः नृत्यकला ख्यलय् थःगु शीप व कला न्ह्यब्वयेगु मति तयाच्वंम्ह युवा प्रतिभा खः ।

“थःगु भविष्य नेपालय् हे बांलाःगुलिं विदेशय् वनाः शीप मिउवने मखु” धकाः निर्णय याःम्ह निशिलां फ्रान्सं नेपाः वयाः च्वनाच्वंम्ह एलिज ब्यान्सीं चायेकातःगु सोलिस पर्फमेन्स आर्टस्लिसे जानाः नेपालय् नृत्यया कलात्मकताया बारे थःम्हेसिनं नं सयेकेगु व सःगु ज्ञान मेपिन्त नं स्यनेगु ग्वसाः ग्वयाच्वंगु दुसा विदेशय् वने हे माःसां अन ज्ञान कायेत वा प्रतिभा न्ह्यब्वयेत जक वनेगु अले थन हे लिहां वयाः नृत्य कलाया विकासय् लगे जुइगु बिचाः प्वंकूगु दु ।

निशिला मय्जुं कोरियोग्राफी ज्या याःगु छगू खस नेपाली संकिपा “च च हुइ” या जवानी नांयागु म्ये थौंकन्हय् लोकंह्वानाच्वंगु दु । थ्व म्येय् नेपाःया लोकंह्वाःम्ह हिरो आर्यन सिग्देलं प्याखं हुलातःगु दु ।

सम्बन्धित बुखँ

LEAVE YOUR COMMENTS